ប្រមុខការទូតអាមេរិកបំពេញទស្សនកិច្ចមួយជុំដំបូងនៅអាស៊ីអាគ្នេយ៍
លោក អង់តូនី ប្លីងកិន រដ្ឋមន្ត្រីក្រសួងការបរទេសអាមេរិក កំពុងបំពេញទស្សនកិច្ចមួយជុំដំបូងនៅអាស៊ីអាគ្នេយ៍ ដោយចាប់ផ្តើមពីប្រទេសឥណ្ឌូណេស៊ី នៅថ្ងៃចន្ទទី ១៣ធ្នូ។ ពីទីក្រុងហ្សាការតា លោកប្រមុខការទូតអាមេរិកនឹងថ្លែងសារស្តីពីនយោបាយអាមេរិកចំពោះតំបន់ឥណ្ឌូប៉ាស៊ីហ្វិក ដែលក្លាយជាស្នូលយុទ្ធសាស្ត្រសម្រាប់ប្រឈមនឹងចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
នៅរសៀលថ្ងៃចន្ទនេះ លោកអង់តូនី ប្លីងកិន បានចូលជួបសន្ទនាជាមួយប្រធានាធិបតីឥណ្ឌូណេស៊ី លោក ចូកូ វីដូដូ ហើយនឹងត្រូវថ្លែងសុន្ទរកថា លាតត្រដាងអំពីនយោបាយអាមេរិកចំពោះតំបន់ឥណ្ឌូប៉ាស៊ីហ្វិកនៅថ្ងៃអង្គារស្អែក ទី១៤ធ្នូ។
បន្ទាប់ពីឥណ្ឌូណេស៊ី លោកប្រមុខការទូត ត្រូវបន្តដំណើរទៅម៉ាឡេស៊ី និងថៃ ដែលនៅទីនោះ លោកនឹងលើកឡើងអំពីការពង្រឹងរចនាសម្ព័ន្ធសន្តិសុខតំបន់ ប្រឈមនឹងការគំរាមកំហែងកាន់តែខ្លាំងឡើងៗពីសំណាក់ចិន នៅសមុទ្ទចិនខាងត្បូង។ នេះបើតាមការគូសបញ្ជាក់របស់លោកប្រមុខការទូតរង ទៅកាន់អ្នកសារព័ត៌មានមុនពេលឡើងយន្តហោះ ដោយលម្អិតថា សហរដ្ឋអាមេរិក ប្រឆាំងរាល់គ្រប់សកម្មភាពនិងទង្វើរបស់ចិន ឬប្រទេសណាផ្សេងទៀត ដែលនាំឱ្យមានអស្ថិរភាពតំបន់។ លោកអង់តូនី ប្លីងកិន ផ្ទាល់ធ្លាប់បានអះអាង មហិច្ឆតាចង់ពង្រីកឥទ្ធិពលនៅលើឆាកអន្តរជាតិរបស់ចិន ជាភាពប្រឈមភូមិសាស្ត្រនយោបាយថ្មីប្រចាំសតវត្សរ៍ទី២១ ដែលចាំបាច់ត្រូវស្វែងរកឱ្យឃើញលំនឹងរវាងការតតាំងគ្នានិងការប្រកួតប្រជែង។
សូមបញ្ជាក់ថា ក្រៅអំពីសំណុំរឿងអាហ្វហ្កានីស្ថាន អ៊ីរ៉ង់ និងរុស្ស៊ី រដ្ឋបាលអាមេរិកក្រោមការដឹកនាំរបស់លោកប្រធានាធិបតីប្រជាធិបតេយ្យ ចូបៃដិន ក៏បានផ្តល់អាទិភាពនយោបាយការបរទេសពិសេសដល់តំបន់អាស៊ីគ្នេយ៍។ តែរដ្ឋបាលលោកបៃដិន មានយុទ្ធសាស្ត្រមិនខុសពីរដ្ឋាភិបាលអាមេរិកមុនដែលដឹកនាំដោយលោកដូណាល់ត្រាំទេ។ តំបន់ដែលបើតាមអាមេរិកកំពុងរងការគំរាមកំហែងខ្លាំងចិន ត្រូវជាតំបន់ “បើកចំហនិងសេរី”។ ហេតុដូច្នេះហើយបានជាក្រុមការងាររបស់លោកចូបៃដិន ចង់ពង្រឹងកម្លាំងឱ្យសម្ព័ន្ធមិត្ត ក្នុងតំបន់ ដូចជាសន្យាបំពាក់នាវាចម្បាំងនុយក្លេអ៊ែរឱ្យអូស្ត្រាលី ដោយមិនខ្វល់នឹងកំហឹងរបស់បារាំងដែលបាត់បង់កិច្ចសន្យាលក់នាវាមុជទឹកដ៏ធំឡើយ។
ជាចុងក្រោយ លោកប្រមុខការទូតអាមេរិក នឹងមិនភ្លេចលើកឡើងអំពីវិបត្តិនៅភូមាទេ ក្នុងដំណើរទស្សនកិច្ចមួយជុំនៅអាស៊ីអាគ្នេយ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ