ចិនប្តូរផ្លាស់មេដឹកនាំនៅតំបន់ស៊ីនជាំង ក្រោយរងទណ្ឌកម្មអាមេរិក
ប៉េកាំងបានប្រកាសតែងតាំងមេដឹកនាំតំបន់ស៊ីនជាំងថ្មី នៅថ្ងៃសៅរ៍ទី ២៥ធ្នូ ២០២១ មកជំនួសបុរសខ្លាំងចាស់ ដែលជាប់ក្នុងបញ្ជីខ្មៅអាមេរិក។ ការប្តូរផ្លាស់មេដឹកនាំតំបន់ប្រកបដោយយុទ្ធសាស្ត្រនេះប្រព្រឹត្តទៅចំពេលដែលវិបត្តិជនជាតិភាគតិចអ៊ុយហ្គួរកំពុងបំពុលទំនាក់ទំនងចិនជាមួយបស្ចិមលោកឱ្យឡើងតានតឹងខ្លាំង។
ចុះផ្សាយនៅថ្ងៃ៖
ស្តាប់ - ០២:០៩
ចាប់ពីថ្ងៃសៅរ៍ទី ២៥ធ្នូ ២០២១នេះទៅ គឺលោក ម៉ា ស៊ីងហ្គូអ៊ី Ma Xingrui ដែលជាចៅហ្វាយខេត្តខ្វាងទុង នឹងក្លាយជាប្រមុខដឹកនាំថ្មី នៃតំបន់ស៊ីនជាំង។ ចំណែក លោក Chen Quanguo លោក ឆេង ហ្គ័ងហ្កឡូ អាយុ៦៦ឆ្នាំ លែងមានតួនាទីជាមេដឹកនាំតំបន់ស៊ីនជាំងទៀតហើយ។ នេះបើតាមសេចក្តីជូនដំណឹងរបស់ទីភ្នាក់ងារសារព័ត៌មានផ្លូវការចិន ដែលមិនបានបញ្ជាក់អំពីមូលហេតុនៃការដោះដូរមេដឹកនាំតំបន់ទេ។
ជាអតីតយោធា លោក ឆេង ហ្គ័ងហ្កឡូ បានឡើងមកគ្រប់គ្រង់តំបន់ស៊ីនជាំងដ៏ធំ (ធំជាងប្រទេសបារាំងដល់ទៅបីដង) នៅឆ្នាំ២០១៦។ តំបន់ដែលល្បីខាងមានអស្ថិរភាព ភេរវកម្មបង្កឡើងដោយពួកចង់ផ្តាច់ទឹកនិង ពួកអ៊ីស្លាមជ្រុលនិយមអ៊ុយហ្គួរ ហើយត្រូវដាក់ឱ្យស្ថិតក្រោមការត្រួតពិនិត្យយ៉ាងតឹងពីប៉េកាំង។ គឺក្រោមអាណត្តិរបស់លោក ឆេង ហ្គ័តហ្កឡូ នេះហើយដែលស៊ីនជាំងមានជំរំលត់ដំនិងឃុំឃាំងជនជាតិអ៊ុយហ្គួរ ដល់ទៅជាងមួយលាននាក់ ក្រោមផ្លាក មជ្ឈមណ្ឌលអប់រំវិជ្ជាជីវៈ ប្រឆាំងនឹងភាពជ្រុលនិយមអ៊ីស្លាម។ មានស្នាដៃល្អ បានរុញច្រាន លោក ឆេង ឱ្យក្លាយជាសមាជិកនៃការិយាល័យនយោបាយបក្សកុម្មនិស្តចិន(សមាជិកតែ២៥រូប) ដែលជាស្ថាប័នដឹកនាំកំពូលរបស់ចិន នៅឆ្នាំ២០១៧។ តែជាប់ទណ្ឌកម្ម និងមានឈ្មោះក្នុងបញ្ជីខ្មៅអាមេរិកតាំងពីឆ្នាំ២០២០មក ក្នុងនាមជាប្រមុខដឹកនាំតំបន់ ពីបទរំលោភបំពានសិទ្ធិជនជាតិភាគតិចអ៊ុយហ្គួរ។
មុនមកកាន់តួនាទីនៅស៊ីនជាំង លោក ឆេង ហ្គ័ងហ្កឡូ ធ្លាប់ជាលេខាបក្សកុម្មុយនិស្តចិនប្រចាំតំបន់ទីបេ ពីឆ្នាំ ២០១១-២០១៦ លោកក៏មានស្នាដៃលេចធ្លោ ដោយបានបង្ក្រាបបាតុកម្មសង្ឃនិងការដុតសម្លាប់ខ្លួនរហូតទីបេមានសណ្តាប់ធ្នាប់ល្អឡើងវិញ។
តើពេលនេះ លោក ឆេង ហ្គ័ងហ្កឡូ នឹងទៅកាន់តួនាទីអ្វីវិញ ? ប៉េកាំងមិនបានលម្អិតទេ។ ប៉ុន្តែការប្តូរផ្លាស់តួនាទីប្រព្រឹត្តទៅតែប៉ុន្មានថ្ងៃក្រោយទណ្ឌកម្មថ្មីរបស់អាមេរិកដាក់លើក្រុមហ៊ុនបច្ចេកវិទ្យាធំៗចិន ពីបទរំលោភសិទ្ធិជនជាតិភាគតិចកាន់សាសនាអ៊ីស្លាមអ៊ុយហ្គួរ និងចំថ្ងៃបុណ្យណូអែល។ ដូចទម្លាប់ ប៉េកាំងតែងឆ្លៀតដោះស្រាយវិបត្តិរសើបៗខ្លាំងក្នុងស្រុក ឱ្យចំពេលក្រុមបស្ចឹមលោកសម្រាកវិស្សមកាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ