ថៃចាប់ពង្រឹងទ័ពនៅព្រំដែនជាប់ភូមាជាទីដែលរបបសឹកភូមាបើកការវាយប្រហារលើក្រុមឧទ្ទាម
ខណៈដែលប្រតិកម្មថ្កោលទោស ធ្លាក់ចុះព្រោងព្រាត នៅក្រោយសោកនាដកម្មដុតសម្លាប់ប្រជាជនស៊ីវិល នៅរដ្ឋកាយ៉ា ភាគខាងកើតប្រទេសភូមា ការប្រយុទ្ធគ្នាដ៏ហិង្សា កំពុងផ្ទុះខ្លាំងផងដែរ រវាងកងទ័ពរបស់របបសឹកភូមា និងក្រុមឧទ្ទាមការ៉ែននៅរដ្ឋកាយីន។ មួយសប្តាហ៍មកហើយ ជម្លោះប្រដាប់អាវុធរវាងកងទ័ពភូមា និងក្រុមប្រដាប់អាវុធប្រឆាំងរបបសឹកបានបណ្តាលឲ្យមានលំហូរជនភៀសខ្លួនភូមារាប់ពាន់នាក់ ទៅក្នុងទឹកដីថៃ។ នៅថ្ងៃចន្ទ ថៃ ប្រកាសបញ្ជូនកងទ័ពបន្ថែម ទៅកាន់ព្រំដែនថៃ ភូមា នៅត្រង់ចំនុចជាប់ព្រំដែន រវាងរដ្ឋកាយីនភូមា និងខេត្តតាក់ ប្រទេសថៃ។
ចុះផ្សាយនៅថ្ងៃ៖
ស្តាប់ - ០២:៤០
នៅភូមា ការប្រយុទ្ធគ្នាកាន់តែសន្ធឹកខ្លាំង នៅរដ្ឋកាយីន ក្បែរព្រំដែនប្រទេសថៃ។ ប៉ុន្មានថ្ងៃមកនេះ កងទ័ពភូមាបានបើកធ្វើសង្រ្គាម ជាចំហរ ប្រឆាំងក្រុមឧទ្ទាមជនជាតិភាគតិចការ៉ែន និងកងកម្លាំងការពារជនជាតិការ៉ែន ដែលជាក្រុមទើបបង្កើតថ្មី ដើម្បីប្រឆាំងរដ្ឋប្រហារយោធាភូមា។
នៅសប្តាហ៍មុន អ្នកនាំពាក្យរបស់របបសឹកភូមាបាននិយាយប្រាប់ទីភ្នាក់ងារព័ត៌មានបារាំង AFP ថា កងទ័ពបានបើកការវាយប្រហារតាមផ្លូវអាកាស ទៅលើក្រុមឧទ្ទាមជាតិការ៉ែន និងសមាជិករបស់កងកម្លាំងការពារប្រជាជន ដែលកើតចេញ មកពីចលនាងើបបះបោរប្រឆាំងការវិលត្រលប់របស់របបសឹកភូមា។
ការបាញ់គ្រាប់ផ្លោង ការប្រយុទ្ធគ្នានៅលើដីគោក និងការវាយប្រហារ ដុតបំផ្លាញ រថយន្ត។ ទាំងនេះជាវិធីសាស្រ្តរបស់កងទ័ពភូមា ដែលកំពុងក្រពុលមុខ ដោយសារមិនអាច បង្រ្កាបបំបាក់ ក្រុមបះបោរប្រដាប់អាវុធ។ កងទ័ពភូមាបានរងការចោទប្រកាន់ផងដែរថា បានប្រើយុទ្ធសាស្រ្ត ព័ទ្ធគ្រញឹក ចាប់អ្នកភូមិ ប្រជាជនស៊ីវិល ដែលកងទ័ពចោទប្រកាន់បានចូលដៃជើង ជួយក្រុមប្រដាប់អាវុធ ប្រឆាំងរបបសឹក។
ការប្រយុទ្ធគ្នាកាន់តែខ្លាំងកា្លរវាង កងទ័ព និងក្រុមឧទ្ទាមការ៉ែន រួមទាំងក្រុមប្រដាប់អាវុធជាច្រើនក្រុមផ្សេងទៀត បានបណ្តាលឲ្យប្រជាជនភូមាជាច្រើនពាន់នាក់រត់ភៀសខ្លួន ចេញពីរដ្ឋកាយីន ចូលទៅក្នុងទឹកដីថៃ។
នៅក្នុងហេតុផលមនុស្សធម៌ អាជ្ញាធរថៃ បានបើកផ្លូវអនុញ្ញាតឲ្យប្រជាជនភូមា ជាង៥ពាន់នាក់មកជ្រកកោន ក្នុងទឹកដីរបស់ខ្លួន។ កាយវិការខុសទម្លាប់របស់អាជ្ញាធរថៃ បានឆ្លុះបញ្ចាំងពីស្ថានភាពធ្លាក់ធ្ងន់ធ្ងរ នៅរដ្ឋការ៉ែន ក្នុងទឹកដីភូមា។ កងទ័ពថៃ បានប្រកាសផងដែរ ពង្រឹងវត្តមានទ័ពរបស់ខ្លួន នៅក្នុងខេត្តតាក់ ជាប់ព្រំដែន ចំណែកប្រជាជនដែលរស់នៅក្បែរនឹងសមរភូមិប្រយុទ្ធ ក្នុងទឹកដីភូមាត្រូវបានអនុញ្ញាតឲ្យចូលមកជ្រកកោន បណ្តោះអាសន្ន នៅតាមវត្តអារ៉ាម ក្នុងទឹកដីថៃ។
នៅចំពោះមុខនៃការកើនឡើងអំពើហិង្សា ការប្រយុទ្ធគ្នា រវាង កងទ័ពភូមា និងក្រុមប្រដាប់អាវុធជាច្រើនក្រុម ក្នុងទឹកដី ប្រេសិតពិសេសរបស់អង្គការសហប្រជាជាតិទទួលបន្ទុកកិច្ចការភូមាបានសំដែងក្តីកង្វល់ដ៏ជ្រាលជ្រៅ និងបានអំពាវនាវគេបិទបញ្ចប់ការប្រយុទ្ធគ្នា នៅក្នុងឱកាសចូលឆ្នាំថ្មី។ តាំងពីត្រូវតែងតាំងដោយអគ្គលេខាធិការអង្គការសហប្រជាជាតិ នៅខែ តុលា នេះជាលើកទី១ ដែលបេ្រសិតពិសេសថ្មី ទទួលបន្ទុក កិច្ចការភូមា លោកស្រី Noeleen Heyzerបានចេញសេចក្តីថ្លែងការណ៍ ទាក់ទងនឹងអំពើហិង្សានៅប្រទេសភូមា។ ជាជនជាតិសិង្ហបុរី លោកស្រី Heyzer ត្រូវបានអគ្គលេខាធិការអង្គការសហប្រជាជាតិជ្រើសតាំងជំនួស បេសកជនពិសេសចាស់ លោកស្រី Christine Burgener ជនជាតិស្វ៊ីស ដែលរបបសឹករិះគន់ និងបដិសេធមិនព្រមឲ្យចូលជួបលោកស្រីអ៊ុងសានស៊ូជី។
នៅសប្តាហ៍មុន របបសឹកភូមាបានសម្រេចបិទការិយាល័យអ្នកតំណាងអង្គការសហប្រជាជាតិនៅប្រទេសភូមា ក្រោមហេតុផលថា លោកស្រីChristine Burgener អតីតបេសកជនពិសេសរបស់អង្គការសហប្រជាជាតិ បានបិទបញ្ចប់សកម្មភាព នៅប្រទេសភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ