អង្គការសហប្រជាជាតិទាមទារឲ្យស៊ើបអង្កេតលើករណីដុតសម្លាប់ប្រជាជនស៊ីវិលនៅភូមា
អគ្គលេខាធិការរងអង្គការសហប្រជាជាតិទទួលបន្ទុកផ្នែកមនុស្សធម៌ បានសំដែងក្តីរន្ធត់ នៅក្រោយមានសេចក្តីរាយការណ៍ ដ៏គួរឲ្យជឿជាក់ដែលថា ប្រជាជនស៊ីវិល យ៉ាងតិច ៣៥នាក់ ត្រូវបានដុតសម្លាប់ នៅភាគខាងកើតប្រទេសភូមា។ នៅថ្ងៃសៅរ៍ទី២៥ធ្នូ ២០២១ គេបានប្រទះឃើញ សាកសពមនុស្សជាង៣០នាក់ ឆេះខ្លោច នៅក្នុងរថយន្ត ជាច្រើនគ្រឿង ដែលអង្គការក្នុងស្រុកភូមាចោទប្រកាន់ថា ជាស្នាដៃដុតកម្ទេចរបស់កងទ័ពភូមា។
ចុះផ្សាយនៅថ្ងៃ៖
ស្តាប់ - ០២:១៣
អគ្គលេខាធិការរងអង្គការសហប្រជាជាតិ ទទួលបន្ទុក កិច្ចការមនុស្សធម៌ លោក ម៉ារតាំង គ្រីហ្វ៊ី បានសំដែងការតក់ស្លុតនៅចំពោះមុខហេតុការណ៍ ដុតសម្លាប់មនុស្ស នៅរដ្ឋកាយ៉ា Kayah ភាគខាងកើត ប្រទេសភូមា។ សម្រាប់លោកម៉ារតាំង គ្រីហ្វី ព័ត៌មានសម្លាប់ប្រជាជនស៊ីវិល ភូមា ដែលនៅក្នុងនោះ យ៉ាងហោចមានម្នាក់ជាកុមារ ជាព័ត៌មានគួរឲ្យជឿជាក់។
កាលពីថ្ងៃសៅរ៍ រូបថតជាច្រើនសន្លឹក ដែលបង្ហោះផ្សាយនៅលើបណ្តាញសង្គម បានបង្ហាញ រថយន្តដឹកអ្នកដំណើរពីរគ្រឿង និងរថយន្តធុនធ្ងន់មួយគ្រឿងឆេះ សល់តែគ្រោងឆ្អឹងដែក។ កងកម្លាំងការពារប្រជាជន ដែលជាក្រុមប្រដាប់អាវុធ ប្រឆាំងរបបសឹកភូមា បាននិយាយប្រាប់ទីភ្នាក់ងារព័ត៌មានបារាំង AFP ថា នៅក្រោយធ្វើដំណើរទៅដល់កន្លែងកើតហេតុ ពួកគេបានប្រទះឃើញ សាកសពមនុស្ស២៧នាក់ ដែលដុតឆេះ ខ្លោច នៅក្នុងរថយន្តដឹកអ្នកដំណើរ២គ្រឿង។
ដោយផ្អែកលើសាក្សី និងកាសែតក្នុងស្រុក អង្គការក្នុងស្រុកភូមាមួយឈ្មោះ Myanmar Witness បានបញ្ជាក់ថា មនុស្ស៣៥នាក់ ដែលក្នុងនោះ មានទាំងស្ត្រី និងកុមារ ត្រូវបានសម្លាប់ និងដុតឆេះខ្លោច នៅក្នុងហេតុការណ៍ កាលពីថ្ងៃសុក្រ។ តាមអង្គការខាងលើ សកម្មភាពដុតសម្លាប់មនុស្សយ៉ាងព្រៃផ្សៃ ជាស្នាដៃរបស់កងទ័ពភូមា។
នៅក្នុងសេចក្តីថ្លែងការណ៍ ចេញផ្សាយនៅថ្ងៃអាទិត្យម្សិលមិញ អគ្គលេខាធិការរងរបស់អង្គការសហប្រជាជាតិ បាននិយាយ ថ្កោលទោស ហេតុការណ៍ដុតសម្លាប់ប្រជាជនស៊ីវិល និងបានទាមទារឲ្យអាជ្ញាធរភូមា បើកការស៊ើបអង្កេតបន្ទាន់ និងមានតម្លាភាព។
របបសឹកភូមានៅមិនទាន់ អត្ថាធិប្បាយអ្វីទាក់ទងនឹងហេតុការណ៍ ដែលកើតឡើងនៅរដ្ឋកាយ៉ានៅឡើយទេ។ ប៉ុន្តែ កាសែតកងទ័ពភូមា ដែលមិនបានបញ្ជាក់ពីវត្តមានប្រជាជនស៊ីវិលសោះនោះ បានចុះផ្សាយថា កងទ័ពបានបាញ់សម្លាប់ភេរវជនប្រដាប់អាវុធមួយចំនួន កាលពីថ្ងៃសុក្រ។
អ្នកនាំពាក្យកងទ័ពភូមាវិញ ដែលទីភ្នាក់ងារព័ត៌មានបារាំង AFPបានសាកសួរសម្ភាសន៍ធ្លាប់បានទទួលស្គាល់ថា មានការផ្ទុះអាវុធ នៅរដ្ឋកាយ៉ា នៅក្រោយ កងទ័ពព្យាយាមស្ទាក់ចាប់រថយន្ត គួរឲ្យសង្ស័យជាច្រើនគ្រឿង។
អង្គការអង់គ្លេស Save The Children វិញបានបញ្ជាក់ថា បុគ្គលិកពីររូប ដែលធ្វើដំណើរត្រលប់មកពីបំពេញបេសកកម្ម នៅក្នុងតំបន់នោះ បានបាត់ខ្លួន ចំណែករថយន្តរបស់ពួកគេ ត្រូវដុតបំផ្លាញ នៅក្នុងហេតុការណ៍កាលពីថ្ងៃសុក្រ។
នៅក្នុងសេចក្តីថ្លែងការណ៍ អគ្គលេខាធិការរងអង្គការសហប្រជាជាតិបានអំពាវនាវ ឲ្យកងទ័ពភូមា និងគ្រប់ក្រុមប្រដាប់អាវុធនៅភូមា ចាត់វិធានការបន្ទាន់ដើម្បីការពារជីវិតប្រជាជនស៊ីវិល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ