រដ្ឋាភិបាលឥណ្ឌូណេស៊ីហាមមិនឲ្យគេនាំចេញធ្យូងថ្ម នៅខែមករានេះ
ប្រឈមនឹងការតម្រូវការកើនឡើង និងដើម្បីធានាការផ្គត់ផ្គង់ធ្យូងថ្មសម្រាប់ការផលិតថាមពលអគ្គិសនីនៅក្នុងប្រទេស រដ្ឋាភិបាលឥណ្ឌូណេស៊ីបានសម្រេច នៅថ្ងៃសៅរ៍ទី ១មករា ឆ្នាំ ២០២២ ហាមមិនឲ្យគេនាំចេញធ្យូងថ្ម ទៅបរទេស នៅខែមករា។ ជាប្រទេសនាំចេញធ្យូងថ្មច្រើនជាងគេ នៅក្នុងពិភពលោក ឥណ្ឌូណេស៊ីបាននាំចេញធ្យូងថ្ម ប្រមាណ ៣០លានតោន កាលពីខែមករា ដើមឆ្នាំ ២០២១។
ចុះផ្សាយនៅថ្ងៃ៖
ស្តាប់ - ០២:៤៥
នៅក្នុងគោលដៅធានាការផ្គត់ផ្គង់ថាមពលក្នុងស្រុក ឥណ្ឌូណេស៊ី ដែលនាំមុខគេក្នុងពិភពលោកខាងប្រទេសនាំចេញធ្យូងថ្ម សម្រាប់ផលិតថាមពលអគ្គិសនី បានចេញបញ្ជា ហាមមិនឲ្យគេនាំចេញធ្យូងថ្ម នៅខែមករា។
ឥណ្ឌូណេស៊ីនាំចេញធ្យូងថ្មភាគច្រើនទៅបរទេស ប៉ុន្តែ បានកំណត់ឲ្យក្រុមហ៊ុនធ្វើអាជីវកម្មធ្យូងថ្មទុកបរិមាណធ្យូងអប្បបរមា សម្រាប់ រោងចក្រផលិតអគ្គិសនីក្នុងប្រទេស។ រហូតមក អាជ្ញាធរឥណ្ឌូណេស៊ី បានសំដែងការសោកស្តាយ ព្រោះថា ក្រុមហ៊ុនឯកជនមិនបានគោរពបទបញ្ជាឲ្យបានម៉ត់ចត់។
នៅក្នុងសេចក្តីប្រកាសព័ត៌មាន ចេញផ្សាយកាលពីថ្ងៃសៅរ៍ ក្រសួងថាមពល និងធនធានរ៉ែឥណ្ឌូណេស៊ីបានពន្យល់ថា ចំណាត់ការហាមនាំចេញធ្យូងថ្ម នៅខែមករា ធ្វើឡើង បន្ទាប់ពីក្រុមហ៊ុនធ្វើអាជីវកម្មធ្យូងថ្ម ខកខាន មិនបានអនុវត្តតាមគោលនយោបាយរបស់រដ្ឋាភិបាល Domestic Market Obligation ដែលបានតម្រូវឲ្យក្រុមហ៊ុនរក្សាទុក ២៥%នៃធ្យូងថ្ម សម្រាប់ការប្រើប្រាស់ក្នុងស្រុក និងត្រូវលក់ក្នុងតម្លៃ៧០ដុល្លារ ក្នុងមួយតោន ដែលស្មើនឹងពាក់កណ្តាលនៃតម្លៃធ្យូងថ្ម នៅទីផ្សារអន្តរជាតិ។
អ្នកទទួលខុសត្រូវម្នាក់របស់ក្រសួងថាមពល និងធនធានរ៉ែបាននិយាយថា បម្រាមមិនឲ្យនាំចេញធ្យូងថ្ម នៅខែមករា នឹងជួយឲ្យរោងចក្រផលិតអគ្គិសនីជៀសផុត ពីការបិទទ្វារ ដោយសារតែគ្មានថាមពលធ្យូងថ្ម។ ប៉ុន្តែ យ៉ាងណាក៏ដោយ រដ្ឋាភិបាលនឹងពិនិត្យ ពិចារណាគោលនយោបាយថ្មី នៅក្រោយថ្ងៃទី ៥មករា។
ការងើបស្ទុះឡើងវិញ នៃសេដ្ឋកិច្ចសកល នៅក្រោយវិបត្តិកូវីដបានធ្វើឲ្យតម្រូវការធ្យូងថ្មកើនឡើងខ្ពស់ នៅក្នុងពិភពលោក។ នៅក្នុងរបាយការណ៍ ចុះផ្សាយកាលពីថ្ងៃទី១៧ធ្នូកន្លងទៅ ថាមពលអន្តរជាតិ ហៅកាត់ជាភាសាបារាំង AIE បានវាយតម្លៃថា ជាមួយនឹងការងើបស្ទុះឡើងវិញ នៃសេដ្ឋកិច្ចសកល នៅក្រោយវិបត្តិកូវីដ បូកផ្សំ នឹងវិបត្តិថាមពលឡើងថ្លៃ ជាពិសេសហ្គាស តម្រូវការធ្យូងថ្ម សម្រាប់រោងចក្រអគ្គិសនី នឹងអាចកើនឡើងខ្ពស់ ជាប្រវត្តិសាស្រ្ត នៅឆ្នាំ ២០២២។
នៅឆ្នាំ ២០២១ ការផលិតអគ្គិសនីដែលបានមកពីថាមពលធ្យូងថ្មបានកើនឡើង ៩% បន្ទាប់ពីតម្រូវការអគ្គិសនីធ្លាក់ចុះយ៉ាងគំហុក នៅឆ្នាំ ២០២០ ដោយសារវិបត្តិសេដ្ឋកិច្ច។ នៅក្នុងកិច្ចប្រប្រឹងប្រែងកាត់បន្ថយការប្រើប្រាស់ធ្យូងថ្ម ដែលជាប្រភពបញ្ចេញឧស្ម័នកាបូនិក ឧស្ម័នផ្ទះកញ្ចក់ ឥណ្ឌូណេស៊ី ធ្លាប់បានសន្យាឈប់សាងសង់រោងចក្រអគ្គសនី ដើរដោយថាមពលធ្យូងថ្ម ចាប់ពីឆ្នាំ ២០២៣ និងអនុវត្តអព្យាក្រឹត្យកាបូន នៅឆ្នាំ ២០៦០។ ប៉ុន្តែ ការសន្យារបស់ឥណ្ឌូណេស៊ីដែលកំពុងត្រូវការប្រភពថាមពល សម្រាប់ជំរុញសេដ្ឋកិច្ច មិនគ្របដណ្តប់គម្រោងការសាងសង់រោងចក្រអគ្គសនីដើរដោយថាមពលធ្យូងថ្ម នៅកោះស៊ូរ៉ាឡាយ៉ានោះទេ។ រោងចក្រអគ្គិសនី ដើរដោយថាមពលធ្យូងថ្ម នៅស៊ូរ៉ាឡាយ៉ា ជារោងចក្រដ៏ធំមហាសាលមួយ នៅអាស៊ីអាគ្នេយ៍ ដោយវាអាចផលិតអគ្គិសនី សម្រាប់ផ្គត់ផ្គង់ផ្ទះ ជាង ១៤លាន ក្នុងមួយឆ្នាំៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ