ចិនទាត់ចោលការរិះគន់យុទ្ធសាស្ត្រប្រឆាំងកូវីដ របស់មូលនិធិរូបិយវត្ថុអន្តរជាតិ
សេដ្ឋកិច្ចចិនមានសុខភាពល្អគួរជាទីកត់សម្គាល់។ នេះជាការយល់ឃើញរបស់ចិនក្រោយពីបានឮសេចក្តីអំពាវនាវរបស់អង្គការមូលនិធិរូបិយវត្ថុអន្តរជាតិ ដែលជំរុញឱ្យប៉េកាំងបន្ធូរបន្ថយវិធានការប្រយុទ្ធប្រឆាំងនឹងកូវីដ។ បើតាមIMF យុទ្ធសាស្ត្រសូន្យកូវីដ ដ៏តឹងតែងរបស់ចិន ប៉ះពាល់ដល់ការងើបឡើងវិញនៃសេដ្ឋកិច្ចពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
ចិនត្រូវតែតម្រែតម្រឹមយុទ្ធសាស្ត្រប្រយុទ្ធប្រឆាំងនឹងកូវីដ១៩របស់ខ្លួនឡើងវិញ។ ការបិទខ្ទប់ខេត្តក្រុង ធ្វើតេស្តទ្រង់ទ្រាយធំ និងធ្វើតេស្តម្តងហើយម្តងទៀត កំរិតការធ្វើដំណើរ ឱ្យតែមានផ្ទុះករណីវិជ្ជមានច្រើនបន្តិច បានរារាំងមេរោគកូវីដមិនឱ្យរីកសាយភាពខ្លាំងបានតាំងពីនិទាឃរដូវឆ្នាំ២០២០មក ហើយជីវភាពរស់នៅប្រចាំថ្ងៃអាចមានសកម្មភាពស្ទើរដូចធម្មតាឡើងវិញមែន ប៉ុន្តែវិធានការនេះជះឥទ្ធិពលធ្ងន់ធ្ងរណាស់លើសេដ្ឋកិច្ច។ បើតាមលោកស្រីនាយកអង្គការរូបិយវត្ថុអន្តរជាតិ Gita Gopinath ជាមួយមេរោគបំប្លែងអូមីក្រុង ដ៏មហាឆ្លង តែមិនសូវកាច ការបិទខ្ទប់ខេត្តក្រុងច្រើននឹងជះផលអវិជ្ជមានដល់សេដ្ឋកិច្ច ៖ កំណើនសេដ្ឋកិច្ចអាចនឹងត្រូវបន្ថយល្បឿន ហើយផលវិបាកនឹងធ្ងន់ធ្ងរខ្លាំងហៀរដល់ប្រព័ន្ធផ្គត់ផ្គង់ពិភពលោក។
ជាឧទាហរណ៍ ការបិទខ្ទប់និងផ្អាកសកម្មភាពកំពង់ផែក្បែរទីក្រុងសៀងហៃ ដែលជាកំពង់ផែដ៏ធំជាងគេបំផុតមួយនៅលើពិភពលោក កាលពីខែសីហា២០២១ ព្រោះមូលហេតុកូវីដ បានធ្វើឱ្យចរាចរណ៍ដឹកជញ្ជូនភស្តុភារ រអាក់រអួលយ៉ាងខ្លាំង និងប៉ះពាល់យ៉ាងខ្លាំងដល់ប្រព័ន្ធផ្គត់ផ្គង់ពិភពលោកដែលកំពុងមានការលំបាកស្រាប់ទៅហើយផង។
ប៉ុន្តែជាប្រតិកម្មតប នៅចំពោះមុខអ្នកសារព័ត៌មាន អ្នកនាំពាក្យក្រសួងការបរទេសចិនបានអះអាង សេដ្ឋកិច្ចចិនមានលទ្ធផលគួរជាទីកត់សម្គាល់ សេដ្ឋកិច្ចចាប់មានកំណើនឡើងវិញ ហើយចិននៅតែក្បាលម៉ាស៊ីនអូសទាញកំណើនសេដ្ឋកិច្ចពិភពលោកដដែល។ ម្យ៉ាងវិញ ចិនចាំបាច់ត្រូវតែមានវិធានការទប់ទល់កូវីដ ដើម្បីការពារ សុខភាពរបស់ប្រជាពលរដ្ឋ ហើយវិធានការនេះ ជាវិធីសាស្ត្រ ដែលមានលក្ខណៈវិទ្យាសាស្ត្រ ទូទៅ និងដ៏រឹងមាំ ក្នុងការការពារនិងគ្រប់គ្រងវីរុស។
អង្គការមូលនិធិរូបិយវត្ថុអន្តរជាតិបានព្យាករណ៍ កាលពីថ្ងៃអង្គារទី ២៥មករា ថាកំណើនសេដ្ឋកិច្ចចិននៅ ឆ្នាំនេះមានកំរិតត្រឹមតែ៤,៨% មិនមែន៥,៦% ដូចការព្យាករកាលពីខែតុលាឡើយ។ ក្នុងកំរិតពិភពលោកវិញ កំណើនផលិតផលសរុបក្នុងស្រុកពិភពលោកមានត្រឹមតែ៤,៤%ទល់នឹងជិត៥,៩%កាលពីឆ្នាំទៅ។ អូមីក្រុង អតិផរណា និងការដំឡើងអត្រាការប្រាក់ សុទ្ធសឹងជាកត្តាដែលមកបណ្តុះបង្អាប់សេដ្ឋកិច្ចពិភពលោកនៅដើមឆ្នាំ២០២២នេះ។ នេះជាពាក្យព្រមានរបស់អង្គការមូលនិធិរូបិយវត្ថុដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ