គណៈកម្មាធិការអូឡាំពិកអន្តរជាតិក្រើនរំលឹកចិន កុំឲ្យយកកីឡាឡូកឡំជាមួយនយោបាយ
កីឡា និងនយោបាយត្រូវបែងចែក ឲ្យដាច់ពីគ្នា។ ប្រធានគណៈកម្មាធិការអូឡាំពិកអន្តរជាតិបាននិយាយនៅថ្ងៃសុក្រនេះថា លោកបានសុំជួបជាបន្ទាន់ ភាគីចិនដែលជាម្ចាស់ផ្ទះរៀបចំកីឡាអូឡាំពិករដូវរងានៅទីក្រុងប៉េកាំង នៅបន្ទាប់ពីអ្នកនាំពាក្យ របស់គណៈកម្មការអូឡាំពិកជាតិចិន បានលើកឡើងពីការភូតកុហកទាក់ទងនឹងបញ្ហាស៊ីនជាំង និងរឿងកោះតៃវ៉ាន់។
ចុះផ្សាយនៅថ្ងៃ៖
ស្តាប់ - ០២:៣៨
ប្រធានគណៈកម្មាធិការអូឡាំពិកអន្តរជាតិ លោកថូម៉ាស់ បាច់ និយាយថា នៅក្រោយសន្និសីទរបស់អ្នកនាំពាក្យគណៈកម្មាធិការអូឡាំពិកជាតិចិន លោកបានទាមទារជំនួបបន្ទាន់ជាមួយអ្នករៀបចំកីឡាអូឡាំពិក នៅទីក្រុងប៉េកាំង ដើម្បី រំលឹកឲ្យគេដាក់រឿងនយោបាយ ឲ្យនៅដាច់ឆ្ងាយពីកីឡាអូឡាំពិក។
សម្រាប់លោកថូម៉ាស់ បាច់ ទាំងគណៈកម្មការធិការអូឡាំពិកអន្តរជាតិ ហើយនិងភាគីចិន ដែលជាអ្នករៀបចំកីឡាអូឡាំពិករដូវរងា នៅទីក្រុងប៉េកាំង ត្រូវប្រកាន់ខ្ជាប់ជានិច្ចអព្យាក្រិតភាព មិនយករឿងនយោបាយមកលាយឡំជាមួយកីឡា ដែលមានចែងនៅក្នុងច្បាប់កីឡាអូឡាំពិក។
នៅក្នុងសន្និសីទកាសែតកាលពីថ្ងៃព្រហស្បតិ៍ អ្នកនាំពាក្យរបស់គណៈកម្មាធិការអូឡាំពិជាតិចិន ត្រូវបានអ្នកកាសែតសួរពីរដងទាក់ទងនឹងបញ្ហារំលោភសិទ្ធិមនុស្សនៅខេត្តស៊ីនជាំង និងរឿងតៃវ៉ាន់។ ដំបូងឡើយ លោកស្រី យ៉ាន ជៀរុង Yan Jiarong បាននិយាយថា សំណួររបស់អ្នកកាសែតគ្មានជាប់ទាក់ទងនឹងការប្រកួតកីឡាអូឡាំពិក នៅប៉េកាំង ប៉ុន្តែ លោកស្រីនៅតែចង់ឆ្លើយបញ្ជាក់ថា សំណួររបស់អ្នកកាសែតធ្វើឡើងដោយផ្អែកទៅលើព័ត៌មានភូតកុហក និងថា អាជ្ញាធរចិនធ្លាប់បានបកស្រាយ និងទាត់ចោលរួចហើយ ព័ត៌មានក្លែងក្លាយទាំងនោះ ជាមួយភស្តុតាងដ៏រឹងមាំ។
ចោទប្រកាន់អាជ្ញាធរចិនថា បានធ្វើទុក្ខបុកម្នេញ និងអនុវត្តនយោបាយបំបាត់ពូជសាសន៍ ជនជាតិអ៊ុយហ្គួរ និងបង្កើតពន្ធនាគារដ៏ធំសម្រាប់ដាក់ជនជាតិអ៊ុយហ្គួរ នៅខេត្តស៊ីនជាំង អង្គការការពារសិទ្ធិមនុស្ស បានអំពាវនាវឲ្យសហគមន៍អន្តរជាតិធ្វើពហិការ កុំចូលរួមក្នុងកីឡាអូឡាំពិកនៅទីក្រុងប៉េកាំង។ ប្រទេសលោកខាងលិច មួយចំនួននាំមុខដោយអាមេរិក បានធ្វើពហិការការទូត ដោយសម្រេចមិនបញ្ជូនមន្រ្តីរបស់ខ្លួន ទៅចូលរួមក្នុងកម្មវិធីប្រកួតកីឡាអូឡាំពិករដូវរងានៅប៉េកាំង។
អាជ្ញាធរចិនវិញ បានបដិសេធការចោទប្រកាន់។ ប៉ុន្តែ នៅក្រោយការចុះផ្សាយរបាយការណ៍ និងសក្ខីកម្មរបស់ជនជាតិអ៊ុយហ្គួរ ដែលបានរត់គេចខ្លួននៅក្រោយជាប់ក្នុងជំរំ ឃុំខ្លួន នៅខេត្តស៊ីនជាំង ប៉េកាំងបានទទួលស្គាល់ថា ពិតមានមជ្ឈមណ្ឌលអប់រំ សម្រាប់ជួយបណ្តុះបណ្តាលជនជាតិអ៊ុយហ្គួរ ប៉ុន្តែ មិនមែនមន្ទីរឃុំឃាំង ដូចការចោទប្រកាន់។
ទាក់ទងនឹងបញ្ហាតៃវ៉ាន់ អ្នកនាំពាក្យរបស់គណៈកម្មាធិការអូឡាំពិកចិន នៅតែអះអាងថា តៃវ៉ាន់ជាដែនដីខេត្តមួយរបស់ប្រទេសចិន។ នៅលើលោកនេះ មានចិនតែមួយ ហើយវាជាគោលការណ៍ដែលអន្តរជាតិបានទទួលស្គាល់រួចហើយ។
នៅប៉េកាំង កីឡាករតៃវ៉ាន់ចូលរួមក្នុងការប្រកួតកីឡាអូឡាំពិកក្រោមឈ្មោះ ចិនតៃវ៉ាន់។ នៅក្នុងកម្មវិធីបើកសម្ពោធ កីឡាអូឡាំពិក ពួកគេមិនអាចលើកទង់ជាតិ និងប្រើភ្លេងជាតិតៃវ៉ាន់ បាននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ