ជប៉ុនប្រកាសឈប់ទិញធ្យូងថ្មរុស្ស៊ី និងបណ្តេញមន្រ្តីទូតរុស្ស៊ីចំនួន ៨នាក់
នៅក្នុងប្រទេសជប៉ុន នាយករដ្ឋមន្រ្តីលោកហ្វូមីអូ គីស៊ីដាបានប្រកាសនាថ្ងៃសុក្រ ទី៨ មេសាថា ជប៉ុននឹងដាក់ទណ្ឌកម្មបន្ថែមប្រឆាំងរុស្ស៊ីក្នុងបទឧក្រិដ្ឋកម្មសង្រ្គាមនៅអ៊ុយក្រែន។ នៅក្នុងទណ្ឌកម្មបន្ថែមនេះ ជប៉ុននឹងឈប់ទិញធ្យូងថ្មរុស្ស៊ី និងបណ្តេញមន្រ្តីទូតរុស្ស៊ីចំនួន ៨នាក់ចេញពីជប៉ុន។ គួរបញ្ជាក់ថា ជប៉ុនដែលជាសម្ព័ន្ធមិត្តរបស់អាមេរិកកំពុងបន្តមានទំនាក់ទំនងរកាំរកូសជាមួយរុស្ស៊ីដោយសារជម្លោះនៅប្រជុំកោះគូរីល។
ចុះផ្សាយនៅថ្ងៃ៖
ស្តាប់ - ០២:១៧
គឺនៅក្នុងបទអន្តរាគមន៍តាមកញ្ចក់ទូរទស្សន៍ដែលនាយករដ្ឋមន្រ្តីជប៉ុនលោកហ្វូមីអូ គីស៊ីដាបានប្រកាសពីការបង្កើនគំនាបដាក់រុស្ស៊ីតាមរយៈការដាក់ទណ្ឌកម្មថ្មីៗបន្ថែមទៀត។ « យើងនឹងហាមការនាំចូលធ្យូងថ្មពីរុស្ស៊ី។ យើងនឹងកាត់បន្ថយការនាំចូលធ្យូងថ្មរុស្ស៊ីបន្តិចម្តងៗ ហើយយើងនឹងកាត់បន្ថយការពឹងលើថាមពលរុស្ស៊ីដោយស្វែងរកថាមពលផ្សេងដាក់ជំនួសវិញ » នេះជាការថ្លែងរបស់លោកហ្វូមីអូ គីស៊ីដា។ ក៏ដូចប្រទេសលោកខាងលិចមួយចំនួនដែរ នាយករដ្ឋមន្រ្តីជប៉ុនរូបនេះបានលើកឡើងពីឧក្រិដ្ឋកម្មសង្រ្គាមរបស់រុស្ស៊ីនៅអ៊ុយក្រែន។
« ទាហានរុស្ស៊ីបានសម្លាប់ជនស៊ីវិល និងបានវាយប្រហារលើទីតាំងនុយក្លេអ៊ែរ។ ទាំងនេះជាទង្វើរំលោភច្បាប់មនុស្សធម៌អន្តរជាតិ និងជាឧក្រិដ្ឋកម្មសង្រ្គាមដែលមិនអត់ឱនឲ្យបានទេ » នេះជាការបន្ថែមរបស់លោកហ្វូមីអូ គីស៊ីដា។ គួរបញ្ជាក់ថា បើតាមទិន្នន័យផ្តល់ដោយក្រសួងហិរញ្ញវត្ថុជប៉ុន ក្នុងចំនួនបរិមាណធ្យូងថ្មដែលជប៉ុននាំចូល មាន ១១% បានទិញពីរុស្ស៊ី។ ក្រៅពីធ្យូងថ្ម លោកហ្វូមីអូ គីស៊ីដាបានប្រកាសឲ្យដឹងពីគម្រោងកាត់បន្ថយការនាំចូលប្រេង និងឧស្ម័នរុស្ស៊ីដែរ។ តែមិនបានបញ្ជាក់ពីពេលវេលាទេ។
បន្ទាប់មក លោកហ្វូមីអូ គីស៊ីដាក៏បានប្រាប់ពីទណ្ឌកម្មផ្សេងទៀតប្រឆាំងរុស្ស៊ី ដូចជាការបង្កកលុយ ការហាមនាំចូលគ្រឿងម៉ាស៊ីនឧស្សាហកម្ម ការហាមនាំចូលស្រា vodka និងធានាថា ជប៉ុននឹងគាំទ្រលើកិច្ចខិតខំប្រឹងប្រែងរបស់សហគមន៍អន្តរជាតិដើម្បីឲ្យតុលាការព្រហ្មទណ្ឌអន្តរជាតិបើកការស៊ើបអង្កេតលើទង្វើរបស់រុស្ស៊ីនៅអ៊ុយក្រែន។ ដោយឡែកនៅមុនអន្តរាគមន៍របស់លោកហ្វូមីអូ គីស៊ីដា ក្រសួងការបរទេសបានប្រកាសពីការបណ្តេញមន្រ្តីទូតរុស្ស៊ីចំនួន ៨នាក់ចេញពីប្រទេស។
គួររម្លឹកថា ជប៉ុនដែលជាសម្ព័ន្ធមិត្តរបស់អាមេរិកកំពុងបន្តមានទំនាក់ទំនងល្អក់ កករជាមួយរុស្ស៊ី។ នេះមកពីក្រុងតូក្យូមិនចុះហត្ថលេខាលើសន្ធិសញ្ញាសន្តិភាពជាមួយក្រុងមូស្គូនៅក្រោយសង្រ្គាមលោកលើកទី២ ដោយសារតែប្រទេសទាំងពីរមានជម្លោះដណ្តើមកូនកោះចំនួន ៤ នៅប្រជុំកោះគូរីល។ កូនកោះទាំង ៤ នេះត្រូវបានទាហានសហភាពសូវៀតយកពីជប៉ុនក្នុងសម័យសង្រ្គាមលោកលើកទី២ និងដែលតាំងពីពេលនោះមក រុស្ស៊ីមិនបានប្រគល់ឲ្យជប៉ុនវិញទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ