ចិនផ្តល់សច្ចាប័នលើអនុសញ្ញាប្រឆាំងនឹងការធ្វើការដោយបង្ខំ
ជាប់ចោទជាប្រទេសប្រើពលរដ្ឋ ជាជនជាតិភាគតិចកាន់សាសនាអ៊ីស្លាម ឱ្យធ្វើការដោយបង្ខំ ចិនបានចុះហត្ថលេខាផ្តល់សច្ចាប័នលើអនុសញ្ញាប្រឆាំងនឹងការធ្វើការដោយបង្ខំនៅថ្ងៃពុធទី ២០ មេសា ២០២២នេះ។ ការផ្តល់សច្ចាប័នលើអនុសញ្ញារបស់អង្គការពលកម្មអន្តរជាតិ ប្រឆាំងនឹងការធ្វើការដោយបង្ខំ ជាលក្ខខណ្ឌមួយរបស់សហភាពអឺរ៉ុប មុននឹងឈានដល់ការផ្តល់សច្ចាប័នដល់កិច្ចព្រមព្រៀងវិនិយោគទ្វេភាគីចិន-អឺរ៉ុប ដែលរកឃើញ កាលពីឆ្នាំ២០២០។
ចុះផ្សាយនៅថ្ងៃ៖
ស្តាប់ - ០២:០១
បន្ទាប់ពីបើកប្រជុំអស់រយៈពេលបីថ្ងៃ គណៈកម្មការអចិន្ត្រៃយ៍របស់សភាប្រជាជនចិន បានប្រកាសផ្តល់សច្ចាប័នលើអនុសញ្ញាឆ្នាំ១៩៣០ របស់អង្គការពលកម្មអន្តរជាតិ ស្តីពីការប្រឆាំងនឹងការធ្វើការដោយបង្ខំ និងបានផ្តល់សច្ចាប័នលើអនុសញ្ញាលុបបំបាត់ការបង្ខំមនុស្សឱ្យធ្វើការ ឆ្នាំ១៩៥៧។
ការផ្តល់សច្ចាប័ននេះបានប្រព្រឹត្តទៅក្នុងខណៈដែលគណៈកម្មការជំនាញអង្គការពលកម្មអន្តរជាតិ បានសម្តែងការព្រួយបារម្ភយ៉ាងជ្រាលជ្រៅ កាលពីខែកុម្ភៈ ២០២២ កន្លងទៅនេះ ចំពោះជោគវាសនារបស់ជនជាតិភាគតិច នៅប្រទេសចិនជាពិសេសនៅតំបន់ស៊ីនជាំង។ បើតាមអង្គការ មានជនអ៊ុយហ្គួរ និងជាតិពិន្ធុ កាន់សាសនាអ៊ីស្លាមផ្សេងទៀត យ៉ាងហោចណាស់មួយលាននាក់កំពុងឬធ្លាប់បានជាប់ឃុំឃាំងក្នុងជំរំលត់ដំនៅភាគពាយ័ព្យប្រទេស។ អ្នកជំនាញរបស់អង្គការពលកម្មអន្តរជាតិ បានជំរុញឱ្យប៉េកាំង តម្រែតម្រង់ទិសដៅ របស់មជ្ឈមណ្ឌលដែលបើតាមប៉េកាំងជា កន្លែងបំពាក់បំប៉នវិជ្ជាជីវៈនិងអប់រំ តែបច្ចុប្បន្នមានទម្រង់ជាមន្ទីរអប់រំនយោបាយ សម្រាប់ឃុំឃាំងមនុស្ស។
សំណុំរឿងជំរំលត់ដំនេះបានធ្វើឱ្យសហគមន៍អន្តរជាតិ ជាពិសេសអាមេរិក ចោទចិនពីបទប្រព្រឹត្តអំពើប្រល័យពូជសាសន៍លើជនជាតិអ៊ុយហ្គួរ និងបានចេញច្បាប់ តាំងពីធ្នូឆ្នាំ២០២១មកហាមឃាត់ការនាំចូលផលិតផលដែលជនអ៊ុយហ្គួរធ្វើដោយបង្ខំ។ សម្រាប់សហភាពអឺរ៉ុប ការផ្តល់សច្ចាប័នលើអនុសញ្ញាប្រឆាំងនឹងការធ្វើការដោយបង្ខំ បានក្លាយជាលក្ខខណ្ឌមួយក្នុងចំណោមលក្ខខណ្ឌជាច្រើននៃកិច្ចព្រមព្រៀងវិនិយោគចិន-សហភាពអឺរ៉ុប ឆ្នាំ២០២០។ នៅក្នុងកិច្ចព្រមព្រៀង ដែលមានអត្ថន័យការពារអ្នកវិនិយោគអឺរ៉ុបនៅចិន ប៉េកាំងបានសន្យាផ្តល់សច្ចាប័នលើគ្រប់អនុសញ្ញារបស់អង្គការពលកម្មអន្តរជាតិ រាប់ទាំងការហាមឃាត់ ការបង្ខំឱ្យធ្វើការផង។ ប៉ុន្តែបន្ទាប់ពីអឺរ៉ុបនិងអាមេរិកព្រមទាំងកាណាដា បាននាំគ្នាដាក់ទណ្ឌកម្មលើឥស្សរជនចិនបួនរូប និងក្រុមហ៊ុនចិនមួយ កាលពីខែមីនា២០២១មក កិច្ចព្រមព្រៀងវិនិយោគចិន-អឺរ៉ុបមិនអាចចូលជាធរមានបាន ដោយចិនយឺតយ៉ាវមិនផ្តល់ សច្ចាប័នលើអនុសញ្ញារបស់អង្គការពលកម្មអន្តរជាតិ។
ចិនទើបព្រមផ្តល់សច្ចាប័ននៅថ្ងៃពុធទី ២០មេសា នេះ ជួនចំពេលដែលលោកស្រីឧត្តមស្នងការសិទ្ធិមនុស្សអង្គការសហប្រជាជាតិ ត្រូវអញ្ជើញទៅបំពេញទស្សនកិច្ចនៅប្រទេសចិន នៅខែឧសភាខាងមុខនេះ។ លោកស្រី Michelle Bachelet បានទទូចសុំប៉េកាំងជាយូរឆ្នាំមកហើយ ចង់ចុះទៅខេត្តស៊ីនជាំង ដោយគ្មានការរារាំងពីអាជ្ញាធរចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ