ចិន៖ទស្សនកិច្ចលើកទី១ គិតតាំងពីឆ្នាំ ២០១៤ របស់លោកស៊ី ជីនពីងនៅតំបន់ស៊ីនជាំង
នៅក្នុងប្រទេសចិន កាសែតផ្លូវការស៊ីនហួរបានប្រាប់ឲ្យដឹងនាថ្ងៃសុក្រ ទី១៥ កក្កដាពីដំណើរទស្សនកិច្ចរបស់ប្រធានាធិបតីលោកស៊ី ជីនពីងនៅក្នុងតំបន់ស៊ីនជាំង។ គឺទស្សនកិច្ចដែលមិនបានប្រកាសឲ្យដឹងមុន និងជាលើកទី១ គិតតាំងពីឆ្នាំ ២០១៤។ គួរបញ្ជាក់ថា ស៊ីនជាំងជាតំបន់ដែលរស់នៅច្រើនដោយជនជាតិភាគតិចអ៊ុយហ្គួរអ្នកកាន់សាសនាអ៊ីស្លាម និងជាតំបន់ដែលកំពុងបន្តមានភាពចម្រូងចម្រាសខ្លាំងរវាងរដ្ឋាភិបាលចិន និងសហគមន៍អន្តរជាតិ។
ចុះផ្សាយនៅថ្ងៃ៖
ស្តាប់ - ០២:២៧
គេត្រូវរង់ចាំនៅប៉ុន្មានថ្ងៃក្រោយមកទើបកាសែតចិនស៊ីនហួរទម្លាយព័ត៌មានស្តីពីទស្សនកិច្ចរបស់លោកស៊ី ជីនពីងនៅក្នុងតំបន់ស៊ីនជាំង។ តាមកាសែតស៊ីនហួរ លោកស៊ីបានផ្តើមទស្សនកិច្ចនៅអ៊ូរុមជីដែលជាទីក្រុងតំបន់ស៊ីនជាំងក្នុងថ្ងៃអង្គារ ទី១២ កក្កដា។ នៅទីនោះ លោកស៊ីបានកោតសរសើរពីការរីកចម្រើននៅក្នុងផ្នែកសង្គម និងសេដ្ឋកិច្ច។ បន្ទាប់មកក្នុងថ្ងៃពុធ ទី១៣ កក្កដា លោកស៊ីបានធ្វើដំណើរទៅកាន់ស្រុកស្ហ៊ីហេហ្ស៊ីដែលស្ថិតនៅប៉ែកខាងជើងតំបន់ស៊ីនជាំង។ នៅទីនោះ លោកស៊ីបានកោតសរសើរពីការងាររបស់ក្រុមហ៊ុនផលិតកម្ម និងសំណង់តំបន់ស៊ីនជាំងឈ្មោះ « ប៊ីងទ័ន »។
តាមលោកស៊ី ក្រុមហ៊ុន « ប៊ីងទ័ន » ដែលទទួលបន្ទុកលើការអភិវឌ្ឃន៍វិស័យកសិកម្ម និងសន្តិសុខព្រំដែនធ្វើការងារបានល្អណាស់។ ក្រៅពីបានធ្វើដំណើរទៅកាន់ទីកន្លែងទាំងពីរ អ៊ូរុមជី និងស្ហ៊ីហេហ្ស៊ី បណ្តាញសារព័ត៌មានរដ្ឋចិនក៏បានបង្ហាញពីរូបភាពដែលលោកស៊ីបានជួបសំណោះសំណាលជាមួយសិស្ស និស្សិត និងក្រុមអ្នកទទួលខុសត្រូវក្នុងតំបន់ដែរ។ គួរបញ្ជាក់ថា នេះជាទស្សនកិច្ចលើកទី១ របស់លោកស៊ី ជីនពីងនៅតំបន់ស៊ីនជាំងគិតតាំងពីទស្សនកិច្ចរបស់លោកក្នុងឆ្នាំ ២០១៤។ ឆ្នាំ ២០១៤ ដែលមានការកត់សម្គាល់ចំនួនពីរ ទី១ មានអំពើភេរវកម្មនៅថ្ងៃទស្សនកិច្ចចុងក្រោយរបស់លោកស៊ី និងទី២ រដ្ឋអំណាចចិនបានបើកយុទ្ធនាការប្រឆាំងភេរវនិយមនៅក្នុងតំបន់ស៊ីនជាំង។
ជនជាតិភាគតិចអ៊ុយហ្គួរអ្នកកាន់សាសនាអ៊ីស្លាមត្រូវបានគេមើលឃើញថា ជាផ្ទាំងស៊ីបនៃយុទ្ធនាការប្រឆាំងភេរវនិយមរបស់រដ្ឋអំណាចចិន។ តាំងពីពេលនោះមក ចិនបានសាងសង់មជ្ឈមណ្ឌលធំល្វឹងល្វើយមួយដើម្បីដាក់ពួកអ៊ុយហ្គួរ។ តាមបស្ចិមលោក មានពួកអ៊ុយហ្គួរជាង ១លាននាក់ត្រូវបានឃុំនៅក្នុងជំរំដែលជាកន្លែងលត់ដំ បង្ខំឲ្យធ្វើការ និងជាកន្លែងធ្វើទារុណកម្ម។ តែចិនបន្តបដិសេធ និងការពារថា គឺជាមជ្ឈមណ្ឌលអប់រំវិជ្ជាជីវៈ។ នៅក្នុងដំណើរទស្សនកិច្ចនាខែឧសភាថ្មីៗនេះ ឧត្តមស្នងការសិទ្ធិមនុស្សអន្តរជាតិលោកស្រីមីស្ហែល បាស្ហឺឡេបានអំពាវនាវឲ្យចិនបញ្ជៀសវិធានការក្រៅច្បាប់ និងបរិហារពីទង្វើហិង្សាជ្រុលខ្លាំងលើពួកអ៊ុយហ្គួរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ