AIE៖ តម្រូវការអគ្គិសនី ពិភពលោក ថយចុះ តែថាមពលស្អាតនិងធ្យូងថ្មកើនឡើង
ក្រោមឥទ្ធិពលនៃសកម្មភាពសេដ្ឋកិច្ចធ្លាក់ចុះ និងទំនិញឡើងថ្លៃ នៅឆ្នាំ ២០២២នេះ សេចក្តីត្រូវការរបស់ពិភពលោកផ្នែកថាមពលអគ្គីសនី បានបន្ថយល្បឿនយ៉ាងខ្លាំង។ ដូច្នេះការបញ្ចេញឧស្ម័នផ្ទះកញ្ចក់ក៏ត្រូវធ្លាក់ចុះបន្តិចដែរ បើទោះបីជាថាមពលធ្យូងថ្មបន្តកើនឡើងក៏ដោយ។ នេះបើតាមរបាយការណ៍របសទីភ្នាក់ងារថាមពលអន្តរជាតិ (AIE)។
ចុះផ្សាយនៅថ្ងៃ៖
ស្តាប់ - ០២:០៧
សេចក្តីត្រូវការផ្នែកថាមពលអគ្គីសនីឆ្នាំនេះ មានកំណើនតែប្រមាណ២,៤%ប៉ុណ្ណោះទល់នឹង៦%កាលពីឆ្នាំ២០២១។ មានន័យថាពិភពលោកមានកំណើនប្រហាក់ប្រហែលនឹងសម័យមុនកូវីដ។ នេះបើតាមទីភ្នាក់ងារថាមពលអន្តរជាតិ ដែលបានព្យាករ នៅក្នុងរបាយការណ៍ស្តីពីទីផ្សារអគ្គីសនី ចេញផ្សាយនៅថ្ងៃពុធទី ២០កក្កដា២០២២នេះថា ឧស្ម័នពុលកាបូនិកបញ្ចេញដោយឧស្សាហកម្មអគ្គីសនីក៏នឹងត្រូវធ្លាក់ចុះដែរ ក្នុងកំរិត១%។ មូលហេតុមកពីនៅឆ្នាំនេះ ពិភពលោកមានកំណើនសមត្ថភាពផលិតថាមពលស្អាត (ថាមពលព្រះអាទិត្យនិងខ្យល់) សឹងថាលើសសេចក្តីត្រូវការធម្មតា។ អគ្គីសនីបានមកប្រភពថាមពលនេះ កើនឡើង១០%។
ប៉ុន្តែដោយហេតុឧស្ម័នឡើងថ្លៃ និងសង្គ្រាមអ៊ុយក្រែន តំបន់ជាច្រើនបានត្រលប់មកប្រើប្រាស់ថាមពលធ្យូងថ្ម សម្រាប់ផលិតអគ្គីសនីវិញ។ ជាក់ស្តែងគឺអឺរ៉ុប និងចិនដែលខ្វល់ខ្វាយខ្លាំងនឹងសន្តិសុខថាមពល។
ជាប្រទេសបញ្ចេញផ្សែងពុលខ្លាំងជាងគេនៅលើពិភពលោក ចិនបង្កើនការផលិតថាមពលកើតឡើងវិញ តែក៏ព្រមព្រៀងឱ្យបើករោងចក្រអគ្គីសនីដើរដោយធ្យូងថ្មថ្មី កាន់តែច្រើនដែរនៅឆ្នាំនេះ។ បើតាមអង្គការការពារបរិស្ថាន Greenpeace ក្នុងរយៈពេលតែមួយត្រីមាសដំបូងនៃឆ្នាំ២០២២ អាជ្ញាធរចិនបានអនុញ្ញាតឱ្យផលិតអគ្គីសនីដោយប្រើធ្យូងថ្មដល់ទៅ៨,៦៣gigawatts ពោលគឺស្មើនឹងពាក់កណ្តាលនៃបរិមាណផលិតអគ្គីសនីពេញមួយឆ្នាំ២០២១។
ប្រឈមនឹងសេចក្តីត្រូវការថាមពលកាន់តែខ្លាំងឡើងរបស់ប្រជាពលរដ្ឋ អាជ្ញាធរចិនចង់បង្កើនសមត្ថភាពផលិតអគ្គីសនីបានមកពីធ្យូងថ្ម ឱ្យដល់៣០០តោននៅឆ្នាំនេះ ដោយបំរុងថវិកាវិនិយោគចំនួន១៤០០លានអឺរ៉ូក្នុងការផលិតធ្យូងថ្ម។ មានន័យថា កម្មវត្ថុអាកាសធាតុដែលលោកប្រធានាធិបតីស៊ីជីនពីង បានប្រកាសកាលពីឆ្នាំទៅអាចនឹងរងការគំរាមកំហែងហើយ។ ចិនបានសន្យាកាលពីឆ្នាំ២០២០ ថានឹងកាត់បន្ថយការបញ្ចេញឧស្ម័នកាបូនិកចាប់ពីឆ្នាំ២០៣០ ដោយបញ្ចុះការប្រើប្រាស់ថាមពលធ្យូងថ្ម ចាប់ពីឆ្នាំ២០២៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ