អ្នកជំនាញឯករាជ្យ អ.ស.ប. លើកឡើងពីករណីទាសភាពបែបថ្មី នៅស៊ីនជាំង
ជនជាតិភាគតិច រស់នៅតំបន់ស៊ីនជាំង ប្រទេសចិន ជាប់កំហិតត្រូវធ្វើពលកម្មដោយបង្ខំ។ ការចាប់បង្ខំមនុស្សឱ្យធ្វើការបែបនេះ អាចជាចាត់ទុកថាជាឧក្រិដ្ឋកម្មប្រឆាំងនឹងមនុស្សជាតិ។ នេះជារបាយការណ៍របស់ក្រុមអ្នកជំនាញឯករាជ្យអង្គការសហប្រជាជាតិ ដែលអាជ្ញាធរចិនបានបរិហារប្រឆាំងយ៉ាងដាច់អហង្ការ។
ចុះផ្សាយនៅថ្ងៃ៖
ស្តាប់ - ០២:២៩
របាយការណ៍របស់ក្រុមអ្នករាយការណ៍ពិសេសអង្គការសហប្រជាជាតិ ដែលជាក្រុមអ្នកជំនាញឯករាជ្យ បានលើកឡើងថា មានការប្រព្រឹត្តអំពើទាសភាពបែបថ្មី ពីរទម្រង់ នៅតំបន់ស៊ីនជាំង តាមរយៈការបង្ខំឱ្យធ្វើពលកម្ម ដែលរដ្ឋចិនបានរៀបចំឡើង មានជាអាទិ៍នៅក្នុងវិស័យកសិកម្ម និងឧស្សាហកម្មផលិតកម្ម។ មណ្ឌលអប់រំនិងបំពាក់បំប៉នវិជ្ជាជីវៈ ដែលមានឃុំឃាំងជនជាតិភាគតិច ជាកន្លែងរៀនសូត្រដើម្បីមានអាជីព។ ដើម្បីកាត់បន្ថយភាពក្រីក្រ អាជ្ញាធរចិនបានប្រើនយោបាយផ្ទេរផ្លាស់ពលករក្នុងមូលដ្ឋាន។ កម្មវិធីនេះបានផ្តល់ឱកាសការងារនិងបង្កើនចំណូលដល់ជនជាតិភាគតិច ប៉ុន្តែអំណាចគ្រប់គ្រងពលករទាំងអស់នោះ ខ្លះមានទម្រង់ដូចប្រើទាសករ។ ដូច្នេះគួរតែមានការសិក្សាវិភាគឱ្យបានស៊ីជម្រៅបន្ថែមទៀត។ នេះបើតាមរបាយការណ៍ដដែល។
បើតាមម្ចាស់សំណេរ លោក តូម៉ូយ៉ា អូបូកាតា របាយការណ៍ចេញផ្សាយនៅថ្ងៃទី ១៦សីហានេះផ្អែកលើការងាររបស់ក្រុមស្រាវជ្រាវ របស់អង្គការក្រៅរដ្ឋាភិបាល សក្ខីកម្មរបស់ជនរងគ្រោះ និងសេចក្តីពន្យល់របស់រដ្ឋាភិបាលចិន។ ប៉ុន្តែអ្នកនាំពាក្យក្រសួងការបរទេសចិនបានបញ្ចេញប្រតិកម្ម ចោទអ្នកនិពន្ធថាបានស្តាប់ពាក្យភូតភនិងព័ត៌មានមិនពិតផលិតដោយសហរដ្ឋអាមេរិក ព្រមទាំងប្រទេសផ្សេង និងក្រុមប្រឆាំងចិន។
នៅក្នុងពេលបំពេញទស្សនកិច្ចដ៏កម្រនៅស៊ីនជាំងកាលពីខែឧសភាកន្លងទៅ លោកស្រីឧត្តមស្នងការសិទ្ធិមនុស្សអង្គការសហប្រជាជាតិបានបរិហារសកម្មភាពហិង្សានៅស៊ីនជាំង និងបានអំពាវនាវឱ្យប៉េកាំងចៀសកុំប្រើវិធានការបំពានសិទ្ធិមនុស្ស។ កាលពីខែមុន បុរសខ្លាំងចិន លោកស៊ីជីនពីង បានធ្វើដំណើរទៅតំបន់ស៊ីនជាំង ជាលើកទីមួយ និងបានសរសើរអំពីភាពជឿនលឿនរបស់តំបន់។
មានផ្ទៃដីធំជាងប្រទេសបារាំងបីដង ស៊ីនជាំងជាដែនដីចិនដែលរងការត្រួតពិនិត្យតាមដានយ៉ាងល្អិតល្អន់បំផុត ពីសំណាក់អាជ្ញាធរក្រុងប៉េកាំង តាំងពីជាច្រើនឆ្នាំមកហើយ។ អាជ្ញាធរចិនបានចោទក្រុមផ្តាច់ទឹកដីនិយម និងអ៊ីស្លាមជ្រុលនិយមអ៊ុយហ្គួរដែលជនជាតិភាគតិចកាន់សាសនាអ៊ីស្លាមដ៏ចម្បងគេប្រចាំតំបន់ ជាអ្នកបង្កភេរវកម្មសម្លាប់ជនស៊ីវិល។
ឯក្រុមប្រទេសលោកខាងលិច បានចោទប្រកាន់អាជ្ញាធរប៉េកាំង ថាបានប្រើនយោបាយបង្កាប ជនជាតិភាគតិចអ៊ុយហ្គួរនិងជនជាតិភាគតិចកាន់សាសនាអ៊ីស្លាមផ្សេងទៀត ចំនួនជាងមួយលាននាក់ ដោយចាប់ឃុំក្នុងជំរំអប់រំ ឬចាប់បង្ខំឱ្យធ្វើការជាទម្ងន់ ឬចាប់បង្ខំមិនឱ្យបង្កកំណើតបាន។ សម្រាប់សហរដ្ឋអាមេរិកនិងបណ្តាប្រទេសជាច្រើនទៀត នេះជាទង្វើបែបប្រល័យពូជសាសន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ