កៀហ្ស៊ីស៊ីស្ថាន និងតាហ្សីគីស្ថានផ្ទុះអាវុធដាក់គ្នានៅព្រំដែន ដែលបង្កឲ្យមានមនុស្សរបួសជាង៣០នាក់
បន្ទាប់ពី អាមេនី និងអាស៊ែបៃហ្សង់ អតីតប្រទេសសហភាពសូវៀតពីរទៀតបានផ្ទុះអាវុធដាក់គ្នា នៅព្រំដែន នៅថ្ងៃសុក្រ ទី ១៦កញ្ញា២០២២។ តាមមន្រ្តីកៀហ្ស៊ីស៊ីស្ថាន ការផ្ទុះអាវុធនៅព្រំដែន នៅព្រឹកថ្ងៃសុក្រ បានបង្កឲ្យមានមនុស្សរបួសជាង ៣០នាក់ នៅខាងភាគីកៀហ្សីស៊ីស្ថាន។ ការប៉ះទង្គិចអាវុធដ៏ហិង្សានៅព្រំដែនប្រទេសតាហ្ស៊ីគីស្ថាន និងកៀហ្ស៊ីស៊ីស្ថាន បានកើតឡើងនៅចំពេលដែល ប្រធានាធិបតី របស់ប្រទេសទាំងពីរកំពុងមានវត្តមាន ចូលរួម កិច្ចប្រជុំអង្គការសហប្រតិបត្តិការសៀងហៃ ដែលរៀបចំ ជាផ្លូវការនៅថ្ងៃសុក្រនេះ នៅប្រទេសអ៊ូសបេគីស្ថាន។
ចុះផ្សាយនៅថ្ងៃ៖
ស្តាប់ - ០២:៣១
ខណៈពេលដែលប្រធានាធិបតីរបស់តាហ្ស៊ីគីស្ថាន និងកៀហ្ស៊ីស៊ីស្ថានកំពុងចូលរួមក្នុងកិច្ចប្រជុំអង្គការសហប្រតិបត្តិការសៀងហៃ ដែលផ្តោត ទៅលើបញ្ហាសន្តិសុខ នៅក្នុងតំបន់ កងទ័ពរបស់ប្រទេសទាំងពីរឯណោះវិញ បានផ្ទុះអាវុធ ដាក់គ្នា មួយប្រាវ នៅព្រឹកថ្ងៃសុក្រនេះ ដោយបានបង្កឲ្យមានមនុស្សរបួស ជាង៣០នាក់ នៅខាងភាគី កៀហ្ស៊ីស្ថាន។
តាមរដ្ឋមន្រ្តីក្រសួង សុខាភិបាលកៀហ្ស៊ីស៊ីស្ថាន នៅក្នុងមនុស្សរបួស៣១នាក់ មាន៤នាក់ជាទាហានដែលត្រូវរបួសដោយសារគ្រាប់កាំភ្លើង។
ការប៉ះទង្គិចអាវុធ ដ៏ហិង្សា នៅព្រឹកថ្ងៃសុក្រនេះ កើតនៅត្រង់តំបន់ជម្លោះព្រំដែន កៀហ្ស៊ីស៊ីស្ថាន និងតាហ្ស៊ីគីស្ថាន ដោយភាគីទាំងពីរ បាននិយាយចោទប្រកាន់គ្នាទៅវិញទៅមក ថា ជាអ្នកបង្ករឿងមុន។ តាមសេចក្តីថ្លែងការណ៍របស់ទីភ្នាក់ងារឆ្មាំព្រំដែនកៀហ្ស៊ីស៊ីស្ថាន កងទ័ពតាហ្ស៊ីគីស្ថានបានប្រើប្រាស់សព្វាវុធធុនធ្ងន់ ដូចយន្តហោះចម្បាំង គ្រាប់រ៉ុកកែ្កត រថពាសដែក បាញ់បំផ្លាញ ព្រលានយន្តហោះកៀហ្ស៊ីស៊ីស្ថាន នៅទីក្រុងជាប់ព្រំដែន ក្នុងតំបន់Batken។
តាហ្ស៊ីគីស្ថានវិញ បានចោទប្រកាន់កងកម្លាំងកៀហ្ស៊ីស៊ីស្ថានថា អ្នកចាប់ផ្តើមវាយប្រហារ ដោយបានបាញ់គ្រាប់យ៉ាងសន្ធឹក ទៅលើផ្ទះប្រជាជន និងហេដ្ឋារចនាសម្ព័ន្ធក្នុងទឹកដី តាហ្ស៊ីគីស្ថាន។
អាជ្ញាធរតាហ្ស៊ីគីស្ថានមិនបានបញ្ជាក់ពីចំនួនមនុស្សរងគ្រោះនៅក្នុងការប៉ះទង្គិចអាវុធ នៅថ្ងៃនេះទេ ប៉ុន្តែ ទីភ្នាក់ងារព័ត៌មានរុស្ស៊ី Ria-Novostiបានចុះផ្សាយថា ទាហានតាហ្ស៊ីគីស្ថានម្នាក់ស្លាប់ ចំណែក ឆ្មាំព្រំដែន ៣នាក់ផ្សេងរងរបួស។
នៅក្រោយការប៉ះទង្គិចអាវុធដ៏ហិង្សា នៅព្រំដែនប្រទេសអាស៊ីកណ្តាលទាំងពីរ សម្ព័ន្ធសន្តិសុខ ដឹកនាំដោយរុស្ស៊ី បានចូលខ្លួនអន្តរាគម និងបានប្រកាសបទឈប់បាញ់ ដែលយល់ព្រមព្រៀងដោយភាគីជម្លោះទាំងពីរ។
មានព្រំដែនជាប់គ្នា ប្រវែង ៩៧០គីឡូម៉ែត្រ អតីតប្រទេសសហភាពសូវៀតទាំងពីរ កៀហ្ស៊ីស៊ីស្ថាន និងតាហ្ស៊ីគីស្ថាន ផ្ទុះអាវុធដាក់គ្នា ជាញឹកញាប់ដោយសារជម្លោះដណ្តើមទឹកដីនៅព្រំដែនប្រទេសទាំងពីរ។ នៅឆ្នាំ ២០២១ ការប្រយុទ្ធគ្នាដ៏ហិង្សា បានសម្លាប់ទាហានរបស់ប្រទេសទាំងពីរ ប្រមាណ ៥០នាក់។ ការផ្ទុះអាវុធនៅព្រំដែនតាហ្ស៊ីគីស្ថាន និងកៀហ្ស៊ីស៊ីស្ថាន លើកនេះ ធ្វើឲ្យគេព្រួយបារម្ភថា នឹងអាចរាលដាលទៅជាសង្រ្គាមវាយប្រយុទ្ធគ្នា រវាងប្រទេសអតីតសហភាព សូវៀត ទាំងពីរ។ ហេតុការណ៍នេះ កើតឡើង នៅខណៈពេលដែល ការប្រយុទ្ធគ្នា នៅសប្តាហ៍នេះ រវាងប្រទេសអតីតសហភាពសូវៀតពីរទៀត គឺអាមេនី និងអាស៊ែបៃហ្សង់ បានសម្លាប់មនុស្សយ៉ាងហោច ១៣៥នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ