Amnesty International៖ របបសិកភូមា បង្វែរប្រេងឥន្ធនៈពីវិស័យអាកាសចរណ៍ស៊ីវីល យកទៅប្រើដើម្បីធ្វើអំពើឧក្រិដ្ឋ
របបសិកភូមា បានបង្វែរប្រេងឥន្ធនៈ ដែលសម្រាប់ប្រើប្រាស់ ក្នុងវិស័យអាកាសចរណ៍ស៊ីវីល យកទៅឲ្យកងទ័ពអាកាសភូមាប្រើ ដើម្បីធ្វើការវាយប្រហារ បាញ់សម្លាប់ជីវិតជនស្លូតត្រង់។ នេះគឺជាការសន្និដ្ឋាន និងចោទប្រកាន់នៅក្នុងរបាយការណ៍ របស់អង្គការ Amnesty International ដែលចេញផ្សាយនៅថ្ងៃព្រហស្បតិ៍នេះ។ ប៉ុន្មានខែចុងក្រោយនេះ កងទ័ពភូមាបានបើកការវាយប្រហារ បាញ់រះពីលើអាកាស មកលើភូមិស្រុក ផ្ទះសម្បែងប្រជាជនដោយឥតរើសមុខ ដោយចោទថាជាទីតាំងរបស់ក្រុមឧទ្ទាមប្រឆាំងរដ្ឋាភិបាល។
ចុះផ្សាយនៅថ្ងៃ៖
ស្តាប់ - ០២:៥៩
ក្រុមការងាររបស់អង្គការ Amnesty International បានតាមដានយ៉ាងជាប់ស្អិត នូវក្បួនដឹកជញ្ជូនប្រេងឥន្ធនៈចំនួន៨នាវា ទៅកាន់កំពង់ផែ Thilawa ប្រទេសភូមា នៅរវាងខែកុម្ភៈឆ្នាំ២០២១ ដល់ខែកញ្ញាឆ្នាំ២០២២។ យ៉ាងហោចណាស់ ប្រេងឥន្ធនៈចំនួន២នាវា ដែលមួយមកពីក្រុមហ៊ុនចិន PetroChina មួយទៀតជារបស់ Thail Oil ត្រូវបានប្រគល់ដោយផ្ទាល់ទៅដល់ដៃកងទ័ពភូមា។ នេះបើផ្អែកតាមការពិនិត្យ ឯកសារគយ និងឯកសារផ្ទៃក្នុងផ្សេងទៀត។
របាយការណ៍បានអះអាងថា ការដឹកជញ្ជូនប្រេងឥន្ធនៈទាំងនេះ គឺត្រូវបានចាត់ចែងប្រតិបត្តិការ ដោយក្រុមហ៊ុនភូមា២ ដែលជាសាខារបស់ក្រុមហ៊ុនប្រេងស្វ៊ីស Puma ហើយក្នុងចំណោមនោះ គឺមាន១ជាក្រុមហ៊ុនរដ្ឋភូមា។ យោងតាម Amnesty International ក្រុមហ៊ុនភូមាមួយក្នុងចំណោម២នោះ បានបង់ប្រាក់ជួលក្រុមហ៊ុនដឹកជញ្ជូនមួយទៀត ឲ្យដឹកប្រឹងឥន្ធនៈទៅដល់ទីកន្លែងស្តុកប្រេង១កន្លែង របស់កងទ័ពភូមា។ ហើយយោងតាមសាក្សីអតីតទាហានភូមា ការវាយប្រហារកន្លងមកនេះ គឺត្រូវបានបញ្ជាចេញពីមូលដ្ឋានទ័ពអាកាស២ទីតាំង ហើយដែលធម្មតាតែងតែប្រើប្រេងបានមកពីទីតាំងស្តុកខាងលើ។
គួរបញ្ជាក់ថា ចាប់តាំងពីក្រោយរដ្ឋប្រហារយោធាមក របបសិកបានប្រើប្រាស់កងទ័ពអាកាស ឲ្យបើកការវាយប្រហារជាច្រើនលើកច្រើនសារទៅលើភូមិស្រុក ផ្ទះសម្បែងរបស់ប្រជាជន ដោយចោទថាជាទីតាំងលាក់ខ្លួន របស់ក្រុមឧទ្ទាមប្រដាប់អាវុធ ដែលប្រឆាំងនឹងរបបសិកភូមា។ ជាក់ស្តែង កាលពីខែតុលា ការវាយប្រហារបាញ់រះពីលើអាកាស នៅតំបន់ភាគខាងជើង បានបណ្តលឲ្យស្លាប់ជនស៊ីវីលជាង៥០នាក់។ ការវាយប្រហារដោយឥតរើសមុខបែបនេះ អាចត្រូវបានចាត់ទុកជា ឧក្រិដ្ឋកម្មសង្គ្រាម។
ក្រុមហ៊ុន Singapore Petroleum Companay Rosneft Chevron និង Thai Oil ជាដើម សុទ្ធតែបានអះអាងប្រាប់ Amnesty International ថាខ្លួននឹកស្មានថា ប្រេងដែលខ្លួនផ្គត់ផ្គង់ទៅឲ្យភូមា គឺសម្រាប់ប្រើតែក្នុងវិស័យអាកាសចរណ៍ស៊ីវីល ដោយមិនដឹងថា ត្រូវកងទ័ពភូមាយកទៅប្រើនោះទេ។ ក្រុមហ៊ុនស្វ៊ីល Puma ក្រុមហ៊ុនថៃ Thai Oil និងក្រុមហ៊ុនន័រវែស Wilhelmsen បានបញ្ជាក់ថា គេកំពុងពិចារណា ដកខ្លួនឈប់រកស៊ីជាមួយភូមា បន្ទាប់ពីបានទទួលដំណឹងថា ប្រេងឥន្ធនៈរបស់ខ្លួន ត្រូវកងទ័ពភូមាបង្វែរយកទៅប្រើ ដោយខុសនឹងលក្ខន្តិកៈ។
Amnesty International បានអំពាវនាវ ឲ្យក្រុមហ៊ុនប្រតិបត្តិករទាំងអស់ ត្រូវដកខ្លួន ឬព្យួរសកម្មភាពដឹកជញ្ជូនប្រេងឥន្ធនៈទៅកាន់ភូមា មិនថាដោយផ្ទាល់ ឬដោយប្រយោល។ លោកស្រី Montse Ferrer អ្នកស្រាវជ្រាវម្នាក់របស់ Amnesty International ទទួលស្គាល់ថា ប្រការនេះពិតជាប៉ះពាល់ដល់វិស័យអាកាសចរណ៍ស៊ីវីលដោយចៀសមិនរួច តែដរាបណាកងទ័ពភូមានៅតែបង្វែប្រេងឥន្ធៈទាំងនោះ នោះជនស្លូតត្រង់និងបន្តស្លាប់ ហើយត្រូវភៀសខ្លួនកាន់តែច្រើន ជារៀងរាល់ថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ