នាយករដ្ឋមន្ត្រីអាល្លឺម៉ង់ អំពាវនាវឱ្យរឹតចំណងពាណិជ្ជកម្មអឺរ៉ុបនិងអាស៊ីអាគ្នេយ៍
ក្នុងបរិបទនៃសង្គ្រាមអ៊ុយក្រែន និងដើម្បីកាត់បន្ថយភាពរំពឹងលើចិន សហភាពអឺរ៉ុប ត្រូវតែពង្រឹងកិច្ចសហប្រតិបត្តិការជាមួយប្រទេសអាស៊ាន។ នេះជាសេចក្តីប្រកាសរបស់លោក អូឡាហ្វ ស្ហុលស៍ ប្រមុខរដ្ឋាភិបាលអាល្លឺម៉ង់ ក្នុងជំនួបជាមួយមេដឹកនាំក្រុមហ៊ុនសហគ្រាសនៅប្រទេសសិង្ហបុរី។ មុនមកដល់សិង្ហបុរី លោក អូឡាហ្វ ស្ហុលស៍បានឆៀងចូលក្រុងហាណូយដើម្បីពិភាក្សាអំពីទំនាក់ទំនងពាណិជ្ជកម្មនិងថាមពលជាមួយនាយករដ្ឋមន្ត្រីវៀតណាម។
ចុះផ្សាយនៅថ្ងៃ៖
ស្តាប់ - ០១:៥១
វៀតណាមនិងសិង្ហបុរី ជាប្រទេសនៅអាស៊ីអាគ្នេយ៍តែពីរគត់ដែលមានកិច្ចព្រមព្រៀងពាណិជ្ជកម្មផ្តោះប្តូរសេរីជាមួយសហភាពអឺរ៉ុប និងជាប្រទេសដៃគូពាណិជ្ជកម្មដ៏ចម្បងរបស់អឺរ៉ុបប្រចាំតំបន់។ ហេតុដូច្នេះហើយបានក្នុងដំណើរឆ្ពោះទៅចូលរួមជំនួបកំពូលហ្សេ២០ នៅបាលីប្រទេសឥណ្ឌូណេស៊ី លោកប្រមុខរដ្ឋាភិបាលអាល្លឺម៉ង់បានឆ្លៀតចូលបំពេញទស្សនកិច្ចក្នុងប្រទេសគន្លឹះទាំងពីរ។
នេះជាលើកទីមួយ គិតតាំងពីជាង១០ឆ្នាំមក ដែលប្រមុខដឹកនាំអាល្លឺម៉ង់អញ្ជើញទៅក្រុងហាណូយ។ ក្នុងសន្និសីទកាសែតរួមជាមួយសមភាគីវៀតណាម លោក អូឡាហ្វ ស្ហុលស៍ បានប្រកាសថាប៊ែរឡាំងចង់ពង្រឹងពង្រីកទំនាក់ទំនងពាណិជ្ជកម្មជាមួយវៀតណាមឱ្យកាន់តែស៊ីជម្រៅ និងគាំទ្រវៀតណាមក្នុងការធ្វើអន្តរកាលថាមពលស្អាត។
សូមបញ្ជាក់ថា ក្នុងចំណោមសមាជិកសហភាពអឺរ៉ុបទាំងអស់ អាល្លឺម៉ង់ជាដៃគូពាណិជ្ជកម្មទីពីររបស់វៀតណាម និងមានក្រុមហ៊ុនប្រមាណ៥០០កំពុងរកស៊ីនៅក្នុងប្រទេសនេះ ក្នុងនោះ៨០ក្រុមហ៊ុនមានដំឡើងរោងចក្រផលិតកម្មផង។ រោងចក្រធំគួរឱ្យកត់សម្គាល់ជាងគេ គឺរោងចក្រ Bosch រោងចក្រថាមពលMesser និងរោងចក្រផលិតគ្រឿងបន្លាស់សម្រាប់ផលិតរថយន្ត។ មានក្រុមហ៊ុនអាល្លឺម៉ង់ច្រើនទៀត កំពុងស្វែងរកជម្រើសថ្មី ដែលស្ថិតនៅក្រៅទឹកដីចិន។ ៩០%សំឡឹងឃើញ វៀតណាម និងថៃ។
ប្រព្រឹត្តទៅតែមួយសប្តាហ៍ក្រោយការធ្វើដំណើរទៅប្រទេសចិន ទស្សនកិច្ចរបស់លោក ស្ហុលស៍នៅវៀតណាម មានកម្មវត្ថុពង្រីកជម្រើសនៃការផ្តោះប្តូរពាណិជ្ជកម្មនៅអាស៊ី ដែលប្រទេសខ្លះ ដូចយ៉ាងវៀតណាម មានកំណើនសេដ្ឋកិច្ចស្ទុះលឿនខ្លាំងជាងគេមួយនៅលើពិភពលោក។ អាល្លឺម៉ង់ប្រាថ្នាចង់កាត់បន្ថយភាពរំពឹងខ្លាំងលើដៃគូពាណិជ្ជកម្មលំដាប់ទីមួយរបស់ខ្លួន គឺចិន ព្រោះសង្គ្រាមរុស្ស៊ីនៅអ៊ុយក្រែនដែលបង្កឱ្យមានវិបត្តិថាមពលនៅអឺរ៉ុប បានដាស់អាល្លឺម៉ង់ឱ្យកាន់តែយល់អំពីហានិភ័យនៃការមានប្រភពផ្គត់ផ្គង់តែមួយ។
សម្រាប់លោក ស្ហុលស៍ កាត់បន្ថយការពឹងផ្អែកលើប្រភពតែមួយ និងមានហានិភ័យ សម្រាប់វិស័យចាំបាច់ខ្លះ មានតួនាទីសំខាន់ណាស់ក្នុងយុទ្ធសាស្ត្រសន្តិសុខជាតិអាល្លឺម៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ