អង្គការសហប្រជាជាតិ៖ ច្បាប់ព្រហ្មទណ្ឌថ្មីរបស់ឥណ្ឌូណេស៊ីប្រាសចាកពីការគោរពសិទ្ធិមនុស្សជាមូលដ្ឋាន
អង្គការសហប្រជាជាតិបានសំដែងក្តីបារម្ភ បន្ទាប់ពីសភាឥណ្ឌូណេស៊ីបោះឆ្នោតអនុម័តច្បាប់ព្រហ្មទណ្ឌថ្មី ដែលមានគោលដៅហាមឃាត់ទំនាក់ទំនងផ្លូវភេទក្រៅចំណងអាពាហ៍ពិពាហ៍។ ក្នុងសេចក្តីថ្លែងការណ៍ នៅថ្ងៃព្រហស្បតិ៍ទី៨ធ្នូ ការិយាល័យរបស់អង្គការសហប្រជាជាតិនៅទីក្រុងហ្សាកាតា បានប្រកាសចាត់ទុក ច្បាប់ព្រហ្មទណ្ឌថ្មីរបស់ឥណ្ឌូណេស៊ីថា ប្រាសចាកពីការគោរពសិទ្ធិសេរីភាព សិទ្ធិមនុស្សជាមូលដ្ឋាន និងអាចលើកទឹកចិត្តឲ្យមានការប្រព្រឹត្តអំពើហិង្សា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
អង្គការសហប្រជាជាតិស្វាគមឥណ្ឌូណេស៊ីដែលធ្វើបច្ចុប្បន្នភាព ច្បាប់ព្រហ្មទណ្ឌដែលបន្សល់ទុកតាំងពីសម័យអាណានិគមហូឡង់។ ប៉ុន្តែ ជាមួយគ្នានោះ អង្គការសហប្រជាជាតិក៏ត្រូវមកខកចិត្ត និងកើតក្តីបារម្ភ នៅពេលសង្កេតឃើញថា មាត្រាជាច្រើនរបស់ច្បាប់ព្រហ្មទណ្ឌថ្មីដែលសភាឥណ្ឌូណេស៊ីបានអនុម័តកាលពីថ្ងៃចន្ទ មានន័យ រើសអើង បិទសិទ្ធិសេរីភាព និងរំលោភសិទ្ធិមនុស្សជាមូលដ្ឋាន។
នៅក្នុងសេចក្តីថ្លែងការណ៍ នៅថ្ងៃព្រហស្បតិ៍ ការិយាល័យអង្គការសហប្រជាជាតិ នៅទីក្រុងហ្សាកាតាបានវាយតម្លៃថា ច្បាប់ព្រហ្មទណ្ឌថ្មី ប៉ះពាល់ដល់សិទ្ធិសុខភាព ជីវិតឯកជន រឹតត្បិតសិទ្ធិនយោបាយ និងសាសនា និងជំរុញលើកទឹកចិត្តឲ្យមានការប្រព្រឹត្តអំពើហិង្សា និងការរើសអើងផ្លូវភេទ នៅឥណ្ឌូណេស៊ី។
តាមអង្គការការពារសិទ្ធិមនុស្ស ច្បាប់ថ្មី ដែលហាមឃាត់ ទំនាក់ទំនងក្រៅអាពាហ៍ពិពាហ៍ នឹងអាចប៉ះពាល់ខ្លាំងជាងគេ ក្រុមអ្នកស្រឡាញ់ភេទដូចគ្នា ព្រោះថា នៅឥណ្ឌូណេស៊ី គ្មានទេ ការអនុញ្ញាត ឲ្យមានអាពាហ៍ពិពាហ៍រវាងមនុស្សស្រឡាញ់ភេទដូចគ្នា។ ក្រៅពីដាក់ទោស អ្នកដែលមានទំនាក់ទំនងផ្លូវភេទក្រៅចំណងអាពាហ៍ពិពាហ៍ ច្បាប់បានហាមឃាត់ផងដែរ មិនឲ្យគេបង្ហាញ ឬផ្តល់មធ្យោបាយសម្រាប់ពន្យារកំណើត ឬការពារពីការមានផ្ទៃពោះ ដល់មនុស្សអាយុក្រោម ១៨ឆ្នាំ។
ច្បាប់ព្រហ្មទណ្ឌថ្មីដែលអាចចូលជាធរមាននៅ៣ឆ្នាំខាងមុខ នឹងទៅពង្រឹងផងដែរ ការអនុវត្តច្បាប់អ៊ីស្លាម ដែលមានលក្ខណៈតឹងរ៉ឹងរួចទៅហើយ នៅឥណ្ឌូណេស៊ី។ ជាក់ស្តែង អ្នកដែលផ្សព្វផ្សាយមនោគមវិជ្ជាផ្ទុយប្រឆាំងនឹងមនោគមផ្លូវការរបស់រដ្ឋ ដែលនិយាយឯកភាព និងការគោរពជនជាតិភាគតិច និងសាសនានឹងអាចប្រឈមនឹងការដាក់ទោស ជាប់ពន្ធនាគារ ៤ឆ្នាំ។ តាមអង្គការសហប្រជាជាតិ ច្បាប់ថ្មីរបស់ឥណ្ឌូណេស៊ីនឹងអាចនឹងប៉ះពាល់ផងដែរ ដល់សិទ្ធិសេរីភាពសារព័ត៌មាន ព្រោះថា អ្នកកាសែត អាចប្រឈមនឹងការដាក់ទោសពន្ធនាគារ សម្រាប់ការចុះផ្សាយព័ត៌មានដែលគេចាត់ទុកថា មានលក្ខណៈញុះញង់ បង្កឲ្យមានចលាចលក្នុងសង្គម។
នៅក្នុងច្បាប់ព្រហ្មទណ្ឌថ្មី ឥណ្ឌូណេស៊ីបានបង្កើតផងដែរ ការដាក់ទោសពន្ធនាគារសម្រាប់អ្នកដែលជេរប្រមាថប្រធានាធិបតី។ ច្បាប់ព្រហ្មទណ្ឌថ្មី ដែលត្រូវការចុះហត្ថលេខារបស់ប្រធានាធិបតី និងអាចចូលជាធរមាននៅ៣ឆ្នាំ ខាងមុខបានទាក់ទាញចំណាប់អារម្មណ៍របស់សហគមន៍អន្តរជាតិ។ សហរដ្ឋអាមេរិកធ្លាប់សំដែងការបារម្ភ ពីការដើរថយក្រោយផ្នែកសិទ្ធិមនុស្សរបស់ឥណ្ឌូណេស៊ី និងការផលប៉ះពាល់ផ្នែកសេដ្ឋកិច្ច នៅក្រោយការអនុវត្តច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ