ជប៉ុនអនុញ្ញាតឱ្យធ្វើចរាចរណ៍ប្រដាប់ជួសឈាមរកមើលជំងឺវង្វេងវង្វាន់
ជាដំណឹងល្អក៏កម្រមួយផ្នែកវេជ្ជសាស្ត្រ ប្រឈមនឹងកើនឡើងជាលំដាប់នៃជំងឺចុះខ្សោយប្រព័ន្ធប្រសាទ បាត់បង់ការចងចាំ។ ប្រដាប់ជួសឈាមរកមើលជំងឺវង្វេងវង្វាន់ “អាល់ហ្សៃមែរ” របស់ក្រុមហ៊ុនជប៉ុន Sysmex Corporation បានទទួលការអនុញ្ញាតឱ្យចេញលក់ទីផ្សារហើយ។ នេះបើតាមសេចក្តីជូនដំណឹងរបស់ក្រុមហ៊ុននៅថ្ងៃព្រហស្បតិ៍ ទី ២២ធ្នូឆ្នាំ២០២២។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ប្រដាប់ជួសឈាម អភិវឌ្ឍដោយក្រុមហ៊ុនSysmex Corporation ជាឧបករណ៍ងាយស្រួលប្រើ មិនប៉ះពាល់ដល់សរីរាង្គកាយខ្លាំង ហើយអាចផ្តល់លទ្ធផលបានយ៉ាងឆាប់រហ័សបំផុត។ ដោយប្រើពេលតែប្រមាណជាង១៥នាទីបន្តិច ឧបករណ៍នេះអាចវិភាគឈាមរកឃើញកំរិតជាតិប្រូតេអ៊ីនបេតាអាម៊ីឡូអ៊ីដ ដែលជាភ្នាក់ងារដ៏ចម្បងមួយបង្កឱ្យមានជំងឺ វង្វេងវង្វាន់អាល់ហ្សៃមែរ Alzheimer។ នៅក្នុងសេចក្តីថ្លែងការណ៍ ក្រុមហ៊ុនជប៉ុនអះអាងថានឹងចេញលក់លើផ្សារ នូវកញ្ចប់ប្រដាប់ជួសឈាមរកមើលជំងឺវង្វេងវង្វាន់ ក្នុងពេលឆាប់ៗ។
ក្រៅពីជប៉ុន ក៏មានក្រុមហ៊ុនជាច្រើនផ្សេងទៀត នៅលើលោកកំពុងព្យាយាមផលិតប្រដាប់ជួសឈាមរកជំងឺអាល់ហ្សៃមែរ និងកំពុងរង់ចាំការអនុញ្ញាតឱ្យធ្វើចរាចរណ៍នៅលើទីផ្សារ។ ការធ្វើតេស្តឈាមវិភាគរកជំងឺអាល់ហ្សៃមែរ ឬជំងឺភ្លេចវង្វេងផ្សេងទៀត ជាវិធីសាស្ត្រ ដែលនឹងត្រូវលូតលាស់ខ្លាំងនៅពេលអនាគត។ នេះបើតាមអង្គការក្រៅរដ្ឋាភិបាលអាមេរិក alzheimer’s association ដោយគូសបញ្ជាក់ថា ពិភពលោកត្រូវការជាបន្ទាន់នូវឧបករណ៍ ដ៏សាមញ្ញ ថោក មិនប៉ះពាល់ដល់សរីរាង្គកាយ (មិនផ្តល់ការឈឺចាប់ខ្លាំង) និងងាយស្រួលប្រើ ដើម្បីឆាប់វិភាគឃើញជំងឺវង្វេងវង្វាន់តាំងពីដំណាក់កាលដំបូងៗភ្លាម។ ឆាប់ដឹងថាមានជំងឺវង្វេងវង្វាន់អាល់ហ្សៃមែរ គេកាន់តែមានលទ្ធភាពច្រើនក្នុងការសង្គ្រោះព្យាបាល ដោយទប់កុំឱ្យជំងឺវិវឌ្ឍទៅមុខបានលឿន។
គ្មានថ្នាំព្យាបាលឱ្យជា គេអាចវិភាគអាការៈជំងឺនេះបាន រហូតមកទល់ពេលនេះ ដោយប្រើវិធីសាស្ត្រដែលចំណាយធំ និងពិបាកខ្លាំង ដូចជាថតឆ្លុះខួរក្បាល ឬដោយចាក់ឆ្អឹងខ្នងយកទឹករងៃមកវិភាគ ដែលឈឺចាប់ខ្លាំងបំផុត។ កាលពីខែវិច្ឆិកា ក្រុមហ៊ុនឱសថអាមេរិកសហការជាមួយក្រុមហ៊ុនជប៉ុន Eisai ដៃគូរបស់Sysmex បានប្រកាសសាកល្បងគ្លីនិកនូវថ្នាំមួយមុខថ្មីឈ្មោះ Lecanemab ដែលមានសក្តានុពលទប់ប្រព័ន្ធបញ្ញាញាណរបស់អ្នកជំងឺវង្វេងមិនឱ្យធ្លាក់ចុះលឿនពេក។ អ្នកវិទ្យាសាស្ត្រអន្តរជាតិមានសង្ឃឹមច្រើនលើប្រសិទ្ធភាពនៃការព្យាបាល បើទោះបីជាផលប៉ះពាល់រំខាននៃថ្នាំមានលក្ខណៈធ្ងន់ធ្ងរក៏ដោយ។
ភ្លេចវង្វេងវង្វាន់អាល់ហ្សៃមែរ ជាជំងឺខូចប្រព័ន្ធប្រសាទគួរឱ្យខ្លាច ដែលមានកំណើនជាលំដាប់នៅទូទាំងពិភពលោក។ ជាង៥៥លាននាក់នៅពេលនេះ និងដល់១៣០លាននាក់នៅឆ្នាំ២០៥០។ នេះបើតាមការព្យាកររបស់អង្គការសុខភាពពិភពលោក។ ជំងឺបាត់បង់ការចងចាំនេះ ជាបញ្ហាសុខភាពសាធារណៈដ៏ចម្បងជាងគេមួយនៅជប៉ុន ព្រោះជាប្រទេសដែលមានប្រជាជនចាស់ជាងគេនៅលើពិភពលោក (ជប៉ុនរាប់ឃើញមានជាមនុស្សចាស់អាយុលើស៦៥ឆ្នាំ ដល់២៩,១%)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ