កីឡាការនីអុកអ៊ីរ៉ង់រត់ទៅជ្រកកោននៅអេស្ប៉ាញ នៅក្រោយរងការគំរាមកំហែងជីវិត
រងការគំរាមកំហែងដោយសារមិនបានពាក់ក្រណាត់ទទូរក្បាលតាមច្បាប់អ៊ីស្លាម កីឡាការនីអុក ជាតិអ៊ីរ៉ង់ម្នាក់បានបដិសេធមិនត្រលប់ចូលប្រទេស នៅក្រោយចប់ការប្រកួតកីឡាអុកចត្រង្គនៅប្រទេសកាហ្សាក់ស្ថាន។ តាមប្រភពស្និទ្ធិនឹងកីឡាការនីអ៊ីរ៉ង់ ដែលដកស្រង់សំដីដោយទីភ្នាក់ងារព័ត៌មានបារាំង AFP កីឡាការនីអុកអ៊ីរ៉ង់បានធ្វើដំណើរទៅដល់ប្រទេសអេស្ប៉ាញ នៅថ្ងៃអង្គារទី ៣ មករា ឆ្នាំ ២០២៣។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
នៅក្នុងការប្រកួតកីឡាអុកចត្រង្គអន្តរជាតិដែលប្រព្រឹត្តទៅនៅប្រទេសកាហ្សាក់ស្ថាន កាលពីសប្តាហ៍មុន គេឃើញកីឡាការនីអុក អ៊ីរ៉ង់ នាង សារ៉ាសាដាត ហាដេម៉ាលស្ហារៀ ដែលមានរហស្សនាមថា នាងសារ៉ា ខាដេម អង្គុយលេងអុកជាមួយគូប្រកួត ដោយគ្មានពាក់ក្រណាត់ទទូរក្បាល ដែលជាការតម្រូវរបស់ច្បាប់អ៊ីស្លាមអ៊ីរ៉ង់។
តាមច្បាប់អ៊ីរ៉ង់ នៅក្នុងប្រទេស រាល់ស្រ្តីគ្រប់ជាតិសាសន៍ត្រូវតែពាក់ក្រណាត់បាំងក្បាល ចំណែកស្រ្តីអ៊ីរ៉ង់ដែលធ្វើដំណើរទៅបរទេសក៏ត្រូវដាក់ក្រណាត់ទទូរក្បាលដែរ។
តាមប្រភពស្និទ្ធិនឹងកីឡាការនីអ៊ីរ៉ង់ ចាប់តាំងពីថ្ងៃបើកការប្រកួត នាងសារ៉ា ខាដេមដែលគ្មានពាក់ក្រណាត់ទទូរក្បាលទាល់តែសោះនៅក្នុងការប្រកួតកីឡាអុកចត្រង្គអន្តរជាតិ បានទទួលទូរស័ព្ទគំរាមកំហែង ជាច្រើនលើក ជាពិសេសនៅពេលនាងត្រលប់ចូលប្រទេសវិញ។ តាមប្រភពដដែល ដែលដកស្រង់សំដីដោយទីភ្នាក់ងារព័ត៌មានបារាំងអន្តរជាតិ សូម្បីឪពុកម្តាយ និងសាច់ញាតិរបស់កីឡាការនីអុក ដែលកំពុងមានវត្តមាននៅក្នុងប្រទេសអ៊ីរ៉ង់ក៏បានរងការគំរាមកំហែងដែរ។
ក្រសួងការបរទេសអ៊ីរ៉ង់មិនបានឆ្លើយសំណួររបស់អ្នកកាសែតទាក់ទងនឹងករណីគំរាមកំហែងលើរូបកីឡាការនីអុក នាងសារ៉ា ខាដេម ប៉ុន្តែ នៅសប្តាហ៍មុន សហព័ន្ធកីឡាអុកចត្រង្គជាតិអ៊ីរ៉ង់បានប្រកាសថា នាងសារ៉ា ខាដេមដែលមិនបានពាក់ក្រណាត់ទទូរក្បាលតាមច្បាប់អ៊ីរ៉ង់ មិនមែនជាអ្នកតំណាងប្រទេសអ៊ីរ៉ង់ ប៉ុន្តែ នាងចូលលេងដោយចិត្តឯង ជាលក្ខណៈឯកជន។
ដោយសាររងការគំរាមកំហែងនៅពេលត្រលប់ចូលប្រទេស កីឡាការនីអុកអ៊ីរ៉ង់បានបដិសេធមិនត្រលប់ទៅអ៊ីរ៉ង់ ប៉ុន្តែ បែរទិសដៅឆ្ពោះទៅអេស្ប៉ាញ។ តាមប្រភពស្និទ្ធនឹងកីឡាការនីអុកអ៊ីរ៉ង់ នាងសារ៉ា ខាដេមបានធ្វើដំណើរទៅដល់ប្រទេសអេស្ប៉ាញកាលពីថ្ងៃអង្គារ។
មានអាយុ២៧ឆ្នាំ សារ៉ា ខាដេមជាកីឡាការនីជើងឯកខាងកីឡាអុកចត្រង្គរបស់អ៊ីរ៉ង់ ដែលជាប់ចំណាត់ថ្នាក់លេខ ៨០៤នៅក្នុងពិភពលោក។ ការមិនព្រមពាក់ក្រណាត់ទទូរក្បាល អាចជាចេតនារបស់កីឡាការនីអ៊ីរ៉ង់ដើម្បីចូលរួមប្រឆាំងតវ៉ានឹងអំណាចផ្តាច់ការរបស់អាជ្ញាធរអ៊ីរ៉ង់ ដែលមិនបន្ថយដៃបង្រ្កាបលើចលនាបាតុកម្មទាមទារសិទ្ធិសេរីភាពនៅអ៊ីរ៉ង់។
នៅមុនកីឡាការនីអុក សារ៉ា ខាដេម កីឡាការនីអីរ៉ង់ផ្សេងទៀតដែលចូលរួមក្នុងការប្រកួតកីឡាអន្តរជាតិ ក៏ធ្លាប់សំដែងការប្រឆាំងរដ្ឋអំណាចអ៊ីរ៉ង់តាមរយៈ ការបដិសេធមិនពាក់ក្រណាត់ទទូរក្បាលនេះដែរ។ ប៉ុន្តែ កីឡាការនីឡើងជញ្ជាំង នាងអែលណា រេកាប៊ី (Elnaz Rekabi) ដែលរងការរិះគន់ដោយសារតែមិនបានពាក់ក្រណាត់ទទូរក្បាលនៅក្នុងពេលប្រកួតនៅប្រទេសកូរ៉េខាងត្បូង បាននិយាយសុំទោស នៅពេលធ្វើដំណើរត្រលប់ចូលប្រទេសអ៊ីរ៉ង់ នៅខែ តុលា ឆ្នាំមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ