អ.ស.ប. ៖ កូនក្មេងទីបេ ប្រហែល១លាននាក់ ត្រូវបំបែកពីគ្រួសារ
នៅប្រទេសចិន យ៉ាងហោច កុមារទីបេ ប្រមាណ១លាននាក់ ត្រូវបំបែកចេញពីគ្រួសារ ព្រោះតែយន្តការសមារណកម្មទាំងបង្ខំ របស់រដ្ឋអំណាចចិន។ នេះបើតាមរបាយការណ៍របស់ក្រុមប្រឹក្សាសិទ្ធិមនុស្ស អង្គការសហប្រជាជាតិ ដែលបានផ្សាយ នៅថ្ងៃទី៦កុម្ភៈ។ អ្នកជំនាញសិទ្ធិមនុស្ស បានសម្តែងក្តីព្រួយបារម្ភចំពោះ គម្រោងផែនការរបស់ចិន ដែលប៉ុន្មានឆ្នាំចុងក្រោយនេះ បានបង្កើតអន្តេវាសិកដ្ឋានជាច្រើន និងបង្ខំឲ្យកូនក្មេងទីបេ រៀនភាសានិងវប្បធម៌ចិន។
ចុះផ្សាយនៅថ្ងៃ៖
ស្តាប់ - ០១:៥៨
អន្តេវាសិកដ្ឋាន ដែលដាក់កុមារជនជាតិភាគតិចទីបេឲ្យស្នាក់នៅ គឺដុះដូចផ្សិតប៉ុន្មានឆ្នាំមកនេះ ទាំងក្នុងតំបន់ទីបេ និងក្រៅទីបេ។ កូនក្មេងទីបេ ត្រូវបង្ខំរៀនសូត្រកម្មវិធីសិក្សារបស់រដ្ឋាភិបាល ទាំង ភាសា និង វប្បធម៌។ នោះគឺ ភាសានិងវប្បធម៌របស់ពួក «ហាន់» ជា ជនជាតិច្រើន។
អ្នកជំនាញសិទ្ធិមនុស្សរបស់អង្គការសហប្រជាជាតិ ដែលរៀបចំសរសេររបាយការណ៍ស្តីពីកុមារទីបេ បានបញ្ជាក់ឲ្យដឹងនៅក្នុងសេចក្តីថ្លែងការណ៍ ទៀតថា ការបណ្តុះបណ្តាលបែបនេះ គឺធ្វើឲ្យកូនក្មេងទីបេ មិនបានរៀនសូត្រឈ្វេងយល់ស៊ីជម្រៅ ពីភាសាទីបេ ពីប្រវត្តិសាស្ត្រទីបេ និងពីប្រពៃណីវប្បធម៌ទីបេ របស់ដូនតា តរយជំនាន់របស់ពួកគេឡើង។
លោក Fernand de Varennes អ្នកធ្វើរបាយការណ៍ម្នាក់ក្នុងចំណោមបីនាក់ បញ្ជាក់ដែរថា យន្តការបង្រៀននៅតាមអន្តេវាសិកដ្ឋានទាំងនោះ ជាផលវិបាកអវិជ្ជមាន គឺ បន្តិចម្តងៗ កូនក្មេងទីបេ បាត់បង់ភាសាវប្បធម៌កំណើតដូនតា ហើយយូរទៅៗ នឹងបាត់អត្តសញ្ញាណតែម្តង។
សេចក្តីថ្លែងការណ៍ បង្ហាញទៀតថា អន្តេវាសិកដ្ឋានសម្រាប់កុមារទីបេ នៅឆ្ងាយៗពីទីលំនៅគ្រួសារឪពុកម្តាយរបស់ពួកគេ ដែលធ្វើឲ្យក្មេងៗនោះ លំបាកចុះឡើងផង ហើយម្យ៉ាង ក៏ផ្តាច់ទំនាក់ទំនងពីជីដូនជីតាក្រុមគ្រួសារ ផង។ នេះជាការផ្តាច់ចំណងទាក់ទងខាងភាសា និងផ្តាច់លំហូរផ្ទេរមត៌កវប្បធម៌ពីចាស់ទុំមកក្មេងៗ។
វិធានការបែបនេះ ធ្វើឡើងព្រមៗគ្នាទៅលើច្រើនវិស័យ ទាំងក្នុងការសិក្សាអប់រំ និងកិច្ចការសាសនា ដែល ទំនងដូចជា នយោបាយសមារណកម្មដោយបង្ខំ ផ្តាច់ប្រពៃណីវប្បធម៌ទីបេ និងឲ្យបង្ខំបញ្ចូលមកក្នុងសហគមន៍ចិន «ហាន់» ជាជនជាតិភាគច្រើន ។ នយោបាយបែបនេះ អ្នកជំនាញ បានចាត់ទុកថា ជាការ«រំលោភបំពានសិទ្ធិមនុស្ស»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ