ថៃ៖ក្រោយពីបិទ៧ឆ្នាំ អណ្តូងរ៉ែមាសដ៏ចម្រូងចម្រាស បើកឲ្យធ្វើអាជីវកម្មឡើងវិញ
នៅក្នុងប្រទេសថៃ អណ្តូងរ៉ែមាសដ៏ធំជាងគេនៅប៉ែកខាងជើងឈ្មោះ ឆាតទ្រីត្រូវបានបើកឲ្យធ្វើអាជីវកម្មឡើងវិញ ក្រោយពីបានបិទទ្វារអស់រយៈពេល ៧ឆ្នាំ។ ការបិទទ្វារកាលណោះដោយសារតែមានភាពចម្រូងចម្រាសខ្លាំងពាក់ព័ន្ធនឹងការបំពុលបរិស្ថាន។ សម្រាប់ក្រុមហ៊ុនអូស្រា្តលី Kingsgate ដែលជាអ្នកធ្វើអាជីវកម្មលើអណ្តូងរ៉ែឆាតទ្រី ការបើកអណ្តូងរ៉ែមួយនេះឲ្យមានដំណើរការឡើងវិញជាដំណឹងល្អ ព្រោះចំពេលដែលមាសកំពុងឡើងថ្លៃនៅទីផ្សារអន្តរជាតិ។ តើរឿងរ៉ាវជុំវិញអណ្តូងរ៉ែមាសឆាតទ្រីនេះមានដំណើរដើមទងយ៉ាងម៉េចខ្លះ?
ចុះផ្សាយនៅថ្ងៃ៖
ស្តាប់ - ០២:៣០
មានទីតាំងស្ថិតនៅតំបន់ប៉ែកជើងក្បែរខេត្តក្រីក្រចំនួន ៣ របស់ថៃ គឺខេត្តភិជីត ខេត្តផេចៈប៊ូន និងខេត្តភិតសនុឡូក អណ្តូងរ៉ែឆាតទ្រីបានចាប់ដំណើរការដំបូងក្នុងឆ្នាំ ២០០១។ កាលណោះ មានមាសជាង ៥០តោន និងប្រាក់ជិត ២ ៥០០តោនត្រូវបានទាញចេញពីអណ្តូងរ៉ែនោះ។ តែក្នុងពេលជាមួយគ្នា ការធ្វើអាជីវកម្មលើអណ្តូងរ៉ែមួយនេះក៏បានបង្កឲ្យមានក្តីបារម្ភខ្លាំងពីប្រជាជនមួយចំនួនដែលរស់ក្បែរនោះ ព្រោះវាបានជះផលវិបាកធ្ងន់ធ្ងរដល់សុខភាព និងបរិស្ថាន។ តាំងពីជិត ២០ឆ្នាំកន្លងទៅ ក្រុមសកម្មជនបរិស្ថានបាននាំគ្នាធ្វើការតវ៉ាដោយទាមទារឲ្យបញ្ឈប់ការធ្វើអាជីវកម្មលើអណ្តូងរ៉ែនោះ។
ទីបំផុតក្នុងឆ្នាំ ២០១៦ ពោលក្រោយពីបានធ្វើអាជីវកម្មបាន ១៥ឆ្នាំ រដ្ឋាភិបាលថៃក្នុងដៃរបបសឹកកាលណោះក៏បានបញ្ជាឲ្យបិទអណ្តូងរ៉ែឆាតទ្រីដោយចោទពីបទបានបំពុលដីនៅទីនោះ។ នេះជាជោគជ័យដ៏ធំធេងរបស់ក្រុមសកម្មជនបរិស្ថាន។ តែទីបំផុតពេលនេះ ពោលក្រោយពីបានបិទទ្វារអស់រយៈពេល ៧ឆ្នាំមក រដ្ឋាភិបាលថៃក្នុងដៃរបបសឹកដដែលក៏បានសម្រេចបើកទ្វារអណ្តូងរ៉ែឆាតទ្រីដដែលនេះឡើងវិញ។ នេះពិតជាដំណឹងល្អខ្លាំងណាស់សម្រាប់ក្រុមហ៊ុនអូស្រា្តលី Kingsgate ដែលជាអ្នកធ្វើអាជីវកម្មលើអណ្តូងរ៉ែនោះ។ ជាដំណឹងល្អព្រោះចំពេលដែលមាសកំពុងឡើងថ្លៃខ្ពស់។
មួយវិញទៀត នេះក៏ជាដំណឹងល្អសម្រាប់ប្រជាជនមួយចំនួនរស់ក្នុងតំបន់ ព្រោះពួកគេមានការងារធ្វើឡើងវិញ។ អ្នកទទួលខុសត្រូវក្រុមហ៊ុន Akara Ressources ដែលជាសាខារបស់ក្រុមហ៊ុន Kingsgate បានធានាថា ក្រុមហ៊ុននឹងរើសបុគ្គលិកបន្ថែមនាប៉ុន្មានឆ្នាំខាងមុខ។ តែទន្ទឹមនឹងដំណឹងល្អ ការបើកអណ្តូងរ៉ែឆាតទ្រីឡើងវិញពេលនេះក៏កំពុងបង្កឲ្យមានក្តីបារម្ភដល់ប្រជាជនមួយចំនួននៅក្បែរនោះ រួមទាំងក្រុមសកម្មជនបរិស្ថាន។ សកម្មភាពប្រចាំថ្ងៃនៅក្នុងអណ្តូងរ៉ែបង្កសំឡេង និងធ្វើឲ្យដីរង្គើរប្រៀបដូចជាដីរញ្ជួយ។ ទន្ទឹមគ្នានេះ ក្រុមហ៊ុនបានប្រើផលិតផលគីមីដែលបំពុលបរិស្ថានដើម្បីញែកលោហៈមានតម្លៃ ពិសេសមាស និងប្រាក់ចេញពីកម្ទេចដី និងថ្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ