របាយការណ៍៖ចិនបានជួយសង្រ្គោះក្រុមប្រទេសស្ថិតក្នុងគម្រោងផ្លូវ និងខ្សែក្រវ៉ាត់តាមរយៈការផ្តល់ប្រាក់កម្ចី
របាយការណ៍មួយចេញក្នុងថ្ងៃអង្គារ ទី២៨ មីនាបានឲ្យដឹងថា តាំងពី ២០ឆ្នាំកន្លងទៅនេះ ប្រទេសចិនបានផ្តល់ប្រាក់កម្ចីជាច្រើនពាន់លានដុល្លារដល់ក្រុមប្រទេសកំពុងអភិវឌ្ឍន៍ចំនួន ២២ប្រទេសដែលជួបការលំបាកផ្នែកហិរញ្ញវត្ថុ។ តាមរបាយការណ៍ដដែល ក្រុមប្រទេសកំពុងអភិវឌ្ឍន៍ទាំង ២២ប្រទេសដែលចិនបានជួយសង្រ្គោះសុទ្ធសឹងជាប្រទេសចូលរួមនៅក្នុងគម្រោងផ្លូវ និងខ្សែក្រវ៉ាត់របស់ចិន។ តែរបាយការណ៍មិនភ្លេចបញ្ជាក់ថា ប្រាក់កម្ចីរបស់ចិនមានបង្កប់ដោយភាពស្រពិចស្រពិល និងមានការប្រាក់ជាមធ្យម ៥%។
ចុះផ្សាយនៅថ្ងៃ៖
ស្តាប់ - ០២:២២
គឺជារបាយការណ៍មួយដែលមានកម្រាស់ ៤០ទំព័រ និងបានរៀបចំតាក់តែងឡើងដោយស្ថាប័ន និងអង្គការចំនួន ៤ គឺធនាគារពិភពលោក មន្ទីរពិសោធន៍ស្រាវជ្រាវអាមេរិក AidData Harvard Kennedy School និងវិទ្យាស្ថាន Kiel ដើម្បីសេដ្ឋកិច្ច។ យោងតាមរបាយការណ៍ មានប្រាក់កម្ចីសរុបចំនួន ២៤០ ០០០លានដុល្លារត្រូវបានចិនផ្តល់ឲ្យក្រុមប្រទេសកំពុងអភិវឌ្ឍន៍ចំនួន ២២ប្រទេសតាំងពី ២០ឆ្នាំកន្លងទៅ។ មួយវិញទៀត ប្រាក់កម្ចីរបស់ចិនចំពោះក្រុមប្រទេសទាំងនេះបានកើនខ្លាំងនៅចន្លោះឆ្នាំ ២០១៦ និង ២០២១។ ចំណែក ២២ប្រទេសកំពុងអភិវឌ្ឍន៍នេះសុទ្ធសឹងជាប្រទេសដែលបានចូលរួមនៅក្នុងគម្រោងផ្លូវ និងខ្សែក្រវ៉ាត់របស់ចិន ពិសេសស្រីលង្កា ប៉ាគីស្ថាន និងតួកគី។
គួររម្លឹកថា គម្រោងផ្លូវ និងខ្សែក្រវ៉ាត់ដែលជាមហិច្ឆតារបស់ប្រធានាធិបតីចិនលោកស៊ី ជីនពីងមានគោលដៅបង្កើនការត ភ្ជាប់ផ្លូវពាណិជ្ជកម្មរវាងចិនជាមួយអាស៊ី អឺរ៉ុប អាហ្រ្វិក និងលើសពីនេះតាមរយៈការសាងសង់កំពង់ផែ ផ្លូវដែក អាកាសយានដ្ឋាន ឬមួយក៏តំបន់ឧស្សាហកម្មជាដើម។ របាយការណ៍បានមើលឃើញថា នៅក្នុងគម្រោងផ្លូវ និងខ្សែក្រវ៉ាត់នេះ ចិនបានបង្កើតឲ្យមានប្រព័ន្ធជួយសង្រ្គោះមួយដែលអនុញ្ញាតឲ្យក្រុមប្រទេសជួបការលំបាកគេចផុតពីការខកខានក្នុងការសងបំណុល និងអាចបន្តសងប្រាក់កម្ចីក្នុងរយៈពេលខ្លី។
តែរបាយការណ៍មិនត្រូវភ្លេចរម្លឹកថា គម្រោងផ្លូវ និងខ្សែក្រវ៉ាត់ដែលមានជាង ១៥០ប្រទេសចូលរួមមួយនេះកំពុងទទួលរងការរិះគន់ខ្លាំងទាក់ទងនឹងបំណុលធ្ងន់ ក ដែលក្រុមប្រទេសក្រីក្រជំពាក់ចិនកាន់តែច្រើន។ ដោយឡែក របាយការណ៍បានប្រៀបធៀបរវាងប្រាក់កម្ចីផ្តល់ដោយចិន និងប្រាក់កម្ចីផ្តល់ដោយមូលនិធិរូបិយវត្ថុអន្តរជាតិ IMF និងធនាគារកណ្តាលអាមេរិក។ របាយការណ៍បានទទួលស្គាល់ថា ប្រាក់កម្ចីរបស់ចិននៅមានចំនួនតិចមែន តែបានកើនឡើងឆាប់រហ័ស។ មួយវិញទៀត ប្រាក់កម្ចីចិនមានបង្កប់ដោយភាពស្រពិចស្រពិល និងមានអត្រាការប្រាក់ជាមធ្យម ៥% ខណៈដែល IMF គិតការប្រាក់តែ ២%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ