អស់ពីបញ្ហាខ្យល់ពុលបរិយាកាស ថៃត្រូវមកជួបភ្លើងឆេះព្រៃ នៅខាងជើងក្រុងបាងកក
ទាហាន និងភ្នាក់ងារពន្លត់អគ្គិភ័យថៃ ជាច្រើនរយនាក់ ត្រូវបញ្ជូនទៅពន្លត់ភ្លើងឆេះបីកន្លែង នៅខេត្តណាខន ណាយុក ភាគខាងជើងទីក្រុងបាងកក។ តាមអ្នកនាំពាក្យរបស់រដ្ឋាភិបាល លោកនាយករដ្ឋមន្រ្តីប្រាយុទ្ធ ចាន់អូចា កំពុងតាមដានស្ថានការណ៍ភ្លើងឆេះព្រៃ និងបានបញ្ជាឲ្យកងទ័ពចូលរួមពន្លត់ភ្លើងឆេះព្រៃ ឲ្យបានឆាប់ជាទីបំផុត។ ភ្លើងឆេះព្រៃកើតឡើងនៅក្នុងខណៈពេលដែលទីក្រុងធំៗរបស់ប្រទេសថៃ ជាពិសេសបាងកក កំពុងប្រឈមនឹងបញ្ហាផ្សែងពុលបរិយាកាស។
ចុះផ្សាយនៅថ្ងៃ៖
នៅថ្ងៃសុក្រ ក្រុមភ្នាក់ងារពន្លត់អគ្គិភ័យ និងទាហានថៃជាច្រើនរយនាក់ នៅបន្តពន្លត់ភ្លើងឆេះព្រៃ នៅខេត្តណាខន ណាយុក ដែលស្ថិតនៅ ចម្ងាយប្រមាណ១០០គីឡូម៉ែត្រពីក្រុងបាងកក។ តាមអាជ្ញាធរថៃ ភ្លើងឆេះព្រៃបំផ្លាញដៃព្រៃ ៨សែនម៉ែត្រការ៉េ ដែលស្មើនឹងតារាងបាល់ទាត់ចំនួន ១០០។
អភិបាលខេត្តណាខន ណាយក ដកស្រង់សំដីដោយកាសែតក្នុងស្រុក Thai Rath បាននិយាយថា កូនភ្នំចំនួន ៣ត្រូវភ្លើងឆេះព្រៃលេបត្របាក់ តាំងពីយប់ថ្ងៃពុធ។ នៅថ្ងៃព្រហស្បតិ៍ ឧទ្ធម្ភាគចក្រដឹកទឹកបានជួយឲ្យគេពន្លត់ភ្លើង នៅលើកូនភ្នំ ខោឡែម ប៉ុន្តែ កូនភ្នំ២ទៀត នៅបន្តឆាបឆេះ។ សម្រាប់អាជ្ញាធរថៃ ខ្យល់បក់ខ្លាំង និងផ្លូវតូចចង្អៀតឡើងទៅលើភ្នំ ជាឧបសគ្គ រារាំង មិនឲ្យគេអាចចូលទៅពន្លត់ភ្លើងឆេះព្រៃ។
អាជ្ញាធរថៃនៅមិនទាន់ដឹងពីមូលហេតុដែលធ្វើឲ្យកើតមានភ្លើងឆេះព្រៃនៅខេត្តណាខន ណាយុក ប៉ុន្តែ កាសែតក្នុងស្រុកថៃ Thai Rathដកស្រង់សំដីអ្នកភូមិដែលថា ភ្លើងឆេះព្រៃដែលកើតឡើងដំបូង នៅកូនភ្នំ ខោឡែម បណ្តាលមកពីរន្ទះបាញ់ និងខ្យល់ខ្លាំង កាលពីយប់ថ្ងៃអង្គារ។
តាម អ្នកនាំពាក្យរដ្ឋាភិបាលលោក Anucha Burapachaisri នៅថ្ងៃសុក្រ លោកនាយករដ្ឋមន្រ្តី ប្រាយុទ្ធ ចាន់អូចាបានបញ្ជូនរដ្ឋមន្រ្តីមហាផ្ទៃឲ្យចុះទៅដឹកនាំផ្ទាល់ ការងារពន្លត់ភ្លើងឆេះព្រៃ នៅខេត្តណាខន ណាយុក។ គិតរហូតមកដល់ថ្ងៃសុក្រ ភ្លើងឆេះព្រៃ នៅមិនទាន់គំរាមកំហែងជីវិតប្រជាជនដែលរស់នៅចម្ងាយ១គីឡូម៉ែត្រ ពីកូនភ្នំដែលឆេះសន្ធោសន្ធៅ ប៉ុន្តែ អាជ្ញាធរថៃបារម្ភខ្លាចថា ដោយសារអាកាសធាតុក្តៅខ្លាំង និងខ្យល់បក់ខ្លាំង នៅតំបន់នោះ ភ្លើងឆេះព្រៃនៅខេត្តណាខន ណាយុក អាចឆេះរាលដាលទៅដល់ឧទ្យានជាតិ ខោយ៉ៃ ដែលជាឧទ្យានវ័យចំណាស់ជាងគេរបស់ថៃ និងជាប់ក្នុងបញ្ជីបេតិកភណ្ឌរបស់អង្គការយូណេស្កូ។
ទីភ្នាក់ងារឧតុនិយមថៃ នៅថ្ងៃសុក្រ បានព្រមានពីគ្រោះថ្នាក់ផ្សែងពុលបរិយាកាសនៅទីក្រុងបាងកក និងតំបន់ជុំវិញ ប្រសិនបើគេមិនអាចទប់ស្កាត់ ពន្លត់ភ្លើងឆេះព្រៃ នៅក្នុងរយៈពេល ៣ ទៅ ៤ថ្ងៃខាងមុខ។
នៅសប្តាហ៍នេះ ថៃបានជួបបញ្ហាខ្យល់ពុលបរិយាកាសខ្លាំងក្លា ដែលបណ្តាលមកពីផ្សែងភ្លើងដុតគល់ជញ្រ្ជាំងដើម្បីសំអាតដីស្រែ។ នៅថ្ងៃព្រហស្បតិ៍ នាយករដ្ឋមន្រ្តីថៃ ស្នើសុំអគ្គលេខាធិការអាស៊ានឲ្យជួយសម្របសម្រួលជាមួយប្រទេសសមាជិក ដើម្បីប្រយុទ្ធប្រឆាំងនឹងការដុតរានដីស្រែចម្ការ ដែលជាប្រភពបញ្ចេញផ្សែងពុលបរិយាកាសនៅតំបន់អាស៊ីអាគ្នេយ៍។ ក្រៅពីទីក្រុងបាងកក តំបន់ខាងជើង ដូចជាឈៀងម៉ៃ និងឈៀងរ៉ៃជាដើមត្រូវអង្គការតាមដានគុណភាពខ្យល់ IQAir ចាត់ទុកជាទីក្រុងដែលមានខ្យល់ពុលបរិយាកាសអាក្រក់ខ្លាំងជាងគេនៅក្នុងលោក ដោយនាំមុខទាំងទីក្រុងញូវដេលីរបស់ឥណ្ឌា និងទីក្រុងប៉េកាំង។
តាមទិន្នន័យរបស់ក្រសួងសុខាភិបាលថៃ គិតចាប់តាំងពីដើមឆ្នាំ នេះ មនុស្សជាង ១លាន ៧សែននាក់ចូលសម្រាកព្យាបាល នៅមន្ទីរពេទ្យ ដោយសារជំងឺផ្លូវដង្ហើម ដែលបណ្តាលមកពីខ្យល់ពុលបរិយាកាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ