សិង្ហបុរីរងការដង្ហើយហៅពីគ្រប់ច្រកឲ្យផ្អាកការប្រហារជីវិត អ្នកទោសជួញដូរកញ្ឆា
ការិយាល័យសិទ្ធិមនុស្សរបស់អង្គការសហប្រជាជាតិប្រចាំទីក្រុងសិង្ហបុរី បានសំដែងក្តីបារម្ភជុំវិញការអនុវត្តិនីតិវិធី និងការជំនុំជម្រះជនជាតិសិង្ហបុរីម្នាក់ ដែលត្រូវតុលាការកាត់ទោសប្រហារជីវិតពីបទចូលរួមក្នុងសកម្មភាពជួញដូរ កញ្ឆា ប្រមាណ១គីឡូក្រាម។ នៅថ្ងៃអង្គារ ការិយាល័យសិទ្ធិមនុស្សរបស់អង្គការសហប្រជាជាតិ បានចេញសេចក្តីថ្លែងការណ៍ អំពាវនាវសុំឲ្យរដ្ឋាភិបាលសិង្ហបុរី ពិចារណាឡើងវិញជាបន្ទាន់ កុំប្រហារជីវិត អ្នកទោស ឈ្មោះ Tangaraju Suppiah ដែលតាមគម្រោងត្រូវប្រព្រឹត្តទៅ នៅថ្ងៃពុធទី ២៦មេសានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២១
តាមលិខិតជូនដំណឹងរបស់អាជ្ញាធរសិង្ហបុរី Tangaraju Suppiah អាយុ៤៦ឆ្នាំ ដែលត្រូវតុលាការសិង្ហបុរីកាត់ទោសប្រហារជីវិត កាលពីឆ្នាំ ២០១៨ ពីបទចូលរួមក្នុងសកម្មភាពជួញដូរកញ្ឆា ជាង១គីឡូក្រាម ត្រូវប្រហារជីវិត ដោយការព្យួរក នៅថ្ងៃពុធនេះ នៅពន្ធនាគារ Changi ភាគខាងកើតសិង្ហបុរី។ ប៉ុន្តែ នៅមួយថ្ងៃមុននេះ ការិយាល័យសិទ្ធិមនុស្សរបស់អង្គការសហប្រជាជាតិ បានចេញសេចក្តីថ្លែងការណ៍ អំពាវនាវសុំឲ្យរដ្ឋាភិបាលសិង្ហបុរីពិចារណា ឡើងវិញជាបន្ទាន់ ពីសំណុំរឿងនេះ។
នៅក្នុងសេចក្តីថ្លែងការណ៍ ការិយាល័យសិទ្ធិមនុស្សរបស់អង្គការសហប្រជាជាតិសំដែងការបារម្ភជុំវិញ ការទទួលបានការជំនុំជម្រះប្រកបដោយយុត្តិធម៌ និងទាមទារសុំឲ្យរដ្ឋាភិបាលសិង្ហបុរីផ្អាកដំណើរការប្រហារជីវិតអ្នកទោស។ សម្រាប់ការិយាល័យសិទ្ធិមនុស្សរបស់អង្គការសហប្រជាជាតិ នៅមានប្រទេសមួយចំនួនតូចប៉ុណ្ណោះ ដែលនៅបន្តអនុវត្តទោសប្រហារជីវិត ដោយសារជំនឿទេវកថាដែលថា វាអាចបញ្ចុះបញ្ចូលកុំឲ្យគេប្រព្រឹត្តបទឧក្រិដ្ឋ។
នៅមុន សេចក្តីថ្លែងការណ៍របស់ការិយាល័យសិទ្ធិមនុស្សរបស់អង្គការសហប្រជាជាតិ មហាសេដ្ឋីអង់គ្លេស លោក Richard Branson ដែលមាននាទីជាសមាជិកគណៈកម្មការពិភពលោកប្រយុទ្ធប្រឆាំងគ្រឿងញៀនក៏បានស្នើសុំឲ្យរដ្ឋាភិបាលសិង្ហបុរីបោះបង់ចោលគម្រោងការប្រហារជីវិត Tangaraju Suppiah ក្នុងហេតុផលថា សិង្ហបុរីអាចប្រហារជីវិតជន គ្មានកំហុស។
មហាសេដ្ឋីអង់គ្លេស ជឿថា អាចមានចន្លោះប្រហោងនៅក្នុងសំណុំរឿងនេះ ពីព្រោះថា ដូចការលើកឡើងរបស់សកម្មជនការពារសិទ្ធិមនុស្ស Tangaraju Suppiahមិនបានប៉ះពាល់កញ្ឆាដែលធ្វើឲ្យខ្លួនគេ ត្រូវប្រហារជីវិតដោយការព្យួរក។ ក្រុមគ្រួសាររបស់ជនជាប់ទោសវិញ បានអំពាវនាវសុំឲ្យតុលាការបើកសវនាការសាជាថ្មីព្រោះថា Tangaraju Suppiahត្រូវបានប៉ូលិសសិង្ហបុរីចាប់សួរចម្លើយ ដោយគ្មានវត្តមានមេធាវី និងគ្មានអ្នកបកប្រែភាសាតាមិល។
ដោយចាត់ទុក ការលើកឡើងរបស់លោកRichard Branson ថា ខុសទាំងស្រុង ក្រសួងមហាផ្ទៃសិង្ហបុរីនៅបានចោទប្រកាន់មហាសេដ្ឋីអង់គ្លេសថា បានមើលងាយចៅក្រម និងប្រព័ន្ធតុលាការសិង្ហបុរី។ តាមក្រសួងមហាផ្ទៃសិង្ហបុរី តុលាការមានភស្តុតាងគ្រប់គ្រាន់ រឹងមាំដើម្បីកាត់ទោសប្រហារជីវិតអ្នកទោសជួញដូរកញ្ឆា។
គិតចាប់តាំងពីដើមឆ្នាំ ២០២៣ Tangaraju Suppiahនឹងអាចក្លាយជាអ្នកទោសជួញដូរកញ្ឆាលើកដំបូងគេ ដែលត្រូវសិង្ហបុរីប្រហារជីវិតដោយការព្យួរក។ បន្ទាប់ពីផ្អាកអស់រយៈពេល២ឆ្នាំ សិង្ហបុរីបានត្រលប់មកប្រហារជីវិតអ្នកទោស ចំនួន១១នាក់ កាលពីឆ្នាំ២០២២ ដែលសុទ្ធសឹងតែជាប់ពាក់ព័ន្ធនឹងការជួញដូរគ្រឿងញៀន។ សម្រាប់សិង្ហបុរី ដែលជាមជ្ឈមណ្ឌលហិរញ្ញវត្ថុ ដ៏សំខាន់នៅអាស៊ី ការអនុវត្តទោសប្រហារជីវិតជាមធ្យោបាយតែមួយគត់ ដើម្បីការពារកូនប្រទេសមួយនេះ ពីការលុកលុយរបស់ក្រុមជួញដូរគ្រឿងញៀន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ