មន្រ្តីការទូតជាន់ខ្ពស់ចិន និងអាមេរិកបានជួបជជែកគ្នានៅក្នុងទីក្រុងប៉េកាំង ប្រទេសចិន
ក្រសួងការបរទេសចិនបានបញ្ជាក់ក្នុងថ្ងៃអង្គារ ទី៦ មិថុនាអំពីជំនួបថ្នាក់មន្រ្តីការទូតជាន់ខ្ពស់ចិន និងអាមេរិកនៅក្នុងទីក្រុងប៉េកាំង។ កម្មវត្ថុនៃជំនួប គឺដើម្បីស្វែងរកវិធីកែលម្អ និងធ្វើឲ្យប្រសើរនូវទំនាក់ទំនងទ្វេភាគីដែលបានរកាំរកូសដោយភាពមិនចុះសម្រុងគ្នានៅក្នុងសំណុំរឿងជាច្រើន។ តាមក្រសួងការបរទេសចិនដដែល កិច្ចសន្ទនារវាងភាគីទាំងពីរជាកិច្ចសន្ទនាត្រង់ទៅ ត្រង់មក និងប្រកបដោយលក្ខណៈស្ថាបនា។
ចុះផ្សាយនៅថ្ងៃ៖
ស្តាប់ - ០២:១២
អ្នកតំណាងឲ្យភាគីអាមេរិកនៅក្នុងជំនួបជាមួយភាគីចិនមានចំនួន ២នាក់ គឺអនុរដ្ឋមន្រ្តីការបរទេសទទួលបន្ទុកកិច្ចការអាស៊ីខាងកើតលោក Daniel Kritenbrink និងលោកស្រី Sarah Beran ដែលជាទីប្រឹក្សារបស់ប្រធានាធិបតីលោកចូ បៃដិនទទួលបន្ទុកកិច្ចការចិន និងតៃវ៉ាន់។ ចំណែកអ្នកតំណាងឲ្យភាគីចិនមានអនុរដ្ឋមន្រ្តីការបរទេសលោក Ma Zhaoxu និងនាយកទទួលបន្ទុកទទួលបន្ទុកកិច្ចការអាមេរិកខាងជើង និងអូសេអានីលោក Yang Tao។ ជំនួបទ្វេភាគីនេះត្រូវបានក្រសួងការបរទេសចិន និងអាមេរិកផ្សព្វផ្សាយដាច់ដោយឡែកពីគ្នាតាមរយៈសេចក្តីប្រកាសព័ត៌មានរបស់ខ្លួន។
តាមសេចក្តីប្រកាសព័ត៌មានរបស់ក្រសួងការបរទេសចិន ភាគីទាំងពីរបាននិយាយគ្នាត្រង់ទៅ ត្រង់មកប្រកបដោយភាពស្មោះត្រង់ និងលក្ខណៈស្ថាបនាស្តីពីការកែលម្អនូវទំនាក់ទំនងទ្វេភាគី និងការគ្រប់គ្រងជម្លោះឱ្យបានត្រឹមត្រូវ។ នៅក្នុងសេចក្តីប្រកាសព័ត៌មានដដែល ចិនបានបញ្ជាក់ពីការពន្យល់ប្រាប់ភាគីអាមេរិកនូវជំហររបស់ចិនចំពោះតៃវ៉ាន់ ហើយថា ចិន និងអាមេរិកបានព្រមព្រៀងគ្នាដើម្បីបន្តការនិយាយគ្នា។ ពីខាងភាគីអាមេរិកវិញ ក្រសួងការបរទេសក៏បានបញ្ជាក់នៅក្នុងសេចក្តីប្រកាសព័ត៌មានពីជំនួបត្រង់ទៅ ត្រង់មក និងមានលក្ខណៈស្ថាបនាដែរ។
តែសេចក្តីប្រកាសព័ត៌មានមិនភ្លេចបញ្ជាក់ថា ក្រៅពីប្រធានរឿងទាក់ទងនឹងទំនាក់ទំនងទ្វេភាគី ជំនួបអាមេរិក និងចិនបានជជែកពីបញ្ហាតៃវ៉ាន់ កាណាល់ទំនាក់ទំនង រួមទាំងប្រធានរឿងផ្សេងៗទៀត។ ទន្ទឹមគ្នានេះ និងបើតាមសេចក្តីប្រកាសព័ត៌មានរបស់អាមេរិកដដែល ភាគីអាមេរិកបានបញ្ជាក់ប្រាប់ភាគីចិនច្បាស់ៗពីការប្តេជ្ញាចិត្តរបស់ខ្លួនក្នុងការការពារផលប្រយោជន៍ និងតម្លៃរបស់អាមេរិក។ គួរបញ្ជាក់ថា ជំនួបថ្នាក់មន្រ្តីការទូតជាន់ខ្ពស់ចិន និងអាមេរិកបានធ្វើឡើង ប៉ុន្មានថ្ងៃក្រោយពីមានឧប្បត្តិហេតុពីរដែលមានជាប់ពាក់ព័ន្ធនឹងនាវា និងយន្តហោះចម្បាំងរបស់ចិន និងអាមេរិកនៅសមុទ្រចិនខាងត្បូង និងនៅច្រកសមុទ្រតៃវ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ