ប្រមុខការទូតថៃថាបានជួបអ្នកស្រី អ៊ុង សានស៊ូជី និងថាអ្នកស្រីចង់ឲ្យចរចាបញ្ចប់វិបត្តិភូមា
ថ្ងៃពុធ ឥណ្ឌូណេស៊ី ក្នុងនាមប្រធានផ្លាស់វេន បានជំរុញឲ្យ អាស៊ាន រកដំណោះស្រាយនយោបាយ ដើម្បីបញ្ចប់វិបត្តិភូមា។ ក្នុងសុន្ទរកថាបើកកិច្ចប្រជុំថ្នាក់រដ្ឋមន្ត្រីការបរទេសអាស៊ាន, ប្រមុខការទូតឥណ្ឌូណេស៊ី បានថ្លែងបញ្ជាក់ថា «មានតែដំណោះស្រាយនយោបាយទេ ទើបនាំឲ្យមកនូវសន្តិភាពយូរអង្វែងសម្រាប់ភូមា»។ លោកអំពាវនាវឲ្យគ្រប់ភាគីបញ្ចប់អំពើហិង្សា ដែលជាកត្តាទី១នៃការស្តារទំនុកចិត្តឡើងវិញ។ ទន្ទឹមនឹងគ្នានេះដែរ រដ្ឋមន្ត្រីការបរទេសថៃ បានអះអាងប្រាប់អ្នកកាសែតនៅរដ្ឋធានីហ្សាការតាថា លោកបានជួបជាមួយមេបក្សប្រឆាំងភូមាអ្នកស្រី អ៊ុង សានស៊ូជី និងថា អ្នកស្រីបង្ហាញចេតនាចង់ចរចាសម្រុះសម្រួលជាមួយរបបសឹកភូមា ដើម្បីបញ្ចប់វិបត្តិក្នុងប្រទេស។
ចុះផ្សាយនៅថ្ងៃ៖
ស្តាប់ - ០២:២៤
ចំពោះមុខអ្នកកាសែត នៅក្រុងហ្សាការតា រដ្ឋមន្ត្រីការបរទេសថៃ លោក ដន ប្រម័តវិន័យ [វិណៃ] បានអះអាងថា ថ្ងៃអាទិត្យកន្លងទៅ លោកបានជួបប្រាស្រ័យជាមួយនឹងប្រមុខដឹកនាំបក្សប្រឆាំងភូមា អ្នកស្រី អ៊ុងសាន ស៊ូជី នៅទីក្រុងណៃពីដោ។ បើតាមរដ្ឋមន្ត្រីការបរទេសថៃ គឺ អ្នកស្រី អ៊ុង សានស៊ូជី មានសុខភាពល្អធម្មតាទេ និងថា កិច្ចសន្ទនាគ្នារវាងលោករដ្ឋមន្ត្រីនិងអ្នកស្រី ស៊ូជី បានប្រព្រឹត្តិទៅយ៉ាងល្អ។
ប្រសិនបើការអះអាងនេះជាការពិត គឺរដ្ឋមន្ត្រីការបរទេសថៃ ជាអ្នកការទូតបរទេស ទី១ ដែលបានជួបផ្ទាល់ជាមួយអ្នកស្រី ស៊ូជី គិតចាប់តាំងពី របបសឹកភូមា បានចាប់ឃុំខ្លួនអ្នកស្រី ជាង២ឆ្នាំមកនេះ។
ពីរាជធានីបាំងកក អ្នកនាំពាក្យក្រសួងការបរទេសថៃ ក៏អះអាងបញ្ជាក់បន្ថែមដែរ ថា ជំនួបនេះពិតជាកើតមានពិតមែន ហើយលោករដ្ឋមន្ត្រី បានជួបជជែកជាមួយអ្នកស្រីស៊ូជី រយៈពេល ជាង១ម៉ោង។
ប្រភពពីភូមាវិញ មន្ត្រីជាន់ខ្ពស់យោធាភូមាម្នាក់ ក្នុងក្របខណ្ឌមិនបញ្ចេញឈ្មោះ បានប្រាប់ទីភ្នាក់ព័ត៌មានបារាំងAFP ថា អាទិត្យមុន រដ្ឋមន្ត្រីការបរទេសថៃ បានបំពេញទស្សនកិច្ច១ថ្ងៃ នៅភូមា និងពិតជាបានជួបជាមួយនឹង ឧត្តមសេនីយ មីន អ៊ុងឡាំង មេបញ្ជាការកំពូល ក៏ប៉ុន្តែ មន្ត្រីរូបនេះ ថា មិនបានដឹងអំពីជំនួបជាមួយនឹងអ្នកស្រី ស៊ូជី នោះទេ។
ទោះបីជាយ៉ាងណាក៏ដោយចុះ នៅក្រុងហ្សាការតា ប្រមុខទូតថៃ បានពាំនាំប្រសាសន៍អ្នកស្រី ស៊ូជី ថាបានលើកទឹកចិត្តឲ្យមានកិច្ចសន្ទនាគ្នា និងអំពាវនាវឲ្យមានកិច្ចចរចាដើម្បីបញ្ចប់វិបត្តិភូមា។
គួររំលឹកថា រដ្ឋអំណាចរបបសឹកភូមា បានធ្វើរដ្ឋប្រហារនៅដើមខែកុម្ភៈឆ្នាំ២០២១ ហើយនិងចាប់ឃុំខ្លួន ព្រមទាំងកាត់ទោសអ្នកស្រី អ៊ុងសាន ស៊ូជី ឲ្យជាប់ពន្ធនាគារ ៣៣ឆ្នាំ។ ភូមា ត្រូវទណ្ឌកម្មអន្តរជាតិ និងគេផាត់ភូមាចេញ មិនឲ្យចូលរួមកិច្ចប្រជុំអន្តរជាតិ និងកិច្ចប្រជុំថ្នាក់តំបន់។
កាលពីខែមុន ថ្នាក់ដឹកនាំថៃ បានជួបរដ្ឋមន្ត្រីការបរទេសភូមា ក្នុងក្របខណ្ឌក្រៅផ្លូវការ ហើយ ថៃ បានស្នើគំនិតចង់បើកលទ្ធភាពឲ្យមន្ត្រីទូតភូមាចូលប្រជុំអាស៊ាននឹងដែរ ប៉ុន្តែ សិង្ហបុរី ជំទាស់ ថាមិនទាន់ដល់ពេលទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ