សិង្ហបុរី៖ប្រធានសភា និងតំណាងរាស្រ្តស្រ្តីបានលាចុះពីតំណែងក្រោយផ្ទុះរឿងអាស្រូវស្នេហាលួចលាក់
នៅសិង្ហបុរី ក្រោយការឃាត់ខ្លួនរដ្ឋមន្រ្តីដឹកជញ្ជូននាសប្តាហ៍កន្លងទៅនៅក្នុងក្របខណ្ឌនៃការស៊ើបអង្កេតរឿងអាស្រូវពុករលួយ គណបក្សកាន់អំណាចបានជួបរឿងអាស្រូវថ្មីមួយទៀតស្តីពីទំនាក់ទំនងស្នេហាលួចលាក់រវាងប្រធានសភា និងតំណាងរាស្រ្តស្រ្តីម្នាក់។ ក្រោយបែករឿងអាស្រូវនេះ អ្នកទាំងនេះក៏បានលាចុះពីមុខតំណែងភ្លាមៗក្នុងសប្តាហ៍នេះ។ គួរបញ្ជាក់ថានៅសិង្ហបរី រឿងអាស្រូវនយោបាយជារឿងកម្រកើតមាន ហើយរឿងអាស្រូវពុករលួយក៏ជារឿងមិនសូវ ឮ។
ចុះផ្សាយនៅថ្ងៃ៖
ស្តាប់ - ០២:០២
គឺជារឿងរ៉ាវដែលសិង្ហបុរី និងរដ្ឋាភិបាលដឹកនាំដោយលោកលី សៀនឡុងមិនបានរង់ចាំទាល់តែសោះក្នុងរយៈពេលតែប៉ុន្មានថ្ងៃ។ រឿងរ៉ាវទី២ គឺទំនាក់ទំនងស្នេហាដោយលួចលាក់រវាងប្រធានសភាលោកតាន់ ឈ័នយីន និងតំណាងរាស្រ្តលោកស្រីឆេង លីហ៊ី។ អ្នកទាំងពីរជាសមាជិករបស់គណបក្សសកម្មប្រជាប្រិយដែលជាគណបក្សប្រវត្តិសាស្រ្តនៅសិង្ហបុរី និងបានកាន់អំណាចតាំងពីការបង្កើតប្រទេសសិង្ហបុរី។ តាមពិតទៅ នាយករដ្ឋមន្រ្តីលោកលី សៀនឡុងបានដឹងរឿងទំនាក់ទំនងស្នេហាដោយលួចលាក់រវាងលោកតាន់ ឈ័នយីន និងលោកស្រីឆេង លីហ៊ី ហើយថា លោកបាននិយាយប្រាប់អ្នកទាំងពីរក្នុងខែកុម្ភៈ។ តែបញ្ហានៅត្រង់ថាក្នុងខែកក្កដានេះ រូបភាពវីដេអូដៃកាន់ដៃរវាងប្រធានសភា និងតំណាងរាស្រ្តស្រ្តីបានបែកធ្លាយលើបណ្តាញសង្គម។
រូបភាពវីដេអូបែកធ្លាយនេះបានបង្ខំឲ្យអ្នកទាំងពីរលាចុះពីតំណែងភ្លាមៗ។ រឿងអាស្រូវថ្មីនេះបានធ្លាក់មកតែប៉ុន្មានថ្ងៃក្រោយការឃាត់ខ្លួនរដ្ឋមន្រ្តីដឹកជញ្ជូននៅក្នុងក្របខណ្ឌនៃការស៊ើបអង្កេតរឿងពុករលួយ។ ប្រឈមនឹងរឿងអាស្រូវផ្ទួនគ្នានេះ នាយករដ្ឋមន្រ្តីលោកលី សៀនឡុងបានព្យាយាមចេញមុខការពារដោយបញ្ជាក់ថា ពេលខ្លះ មានរឿងកើតឡើងដែលគេត្រូវហ៊ានធ្វើការកែតម្រូវ។ លោកលី សៀនឡុងយល់ថា វិធានការដែលធ្វើទៅលើមិត្ត និងទៅលើអ្នករួមអាជីពជារឿងក្តុកក្តួល និងថា វាក៏អាចជារឿងទើសទាល់ និងខាតបង់ផ្នែកនយោបាយដែរ។
តែលោកលី សៀនឡុងបានបន្ថែមថា គណបក្សសកម្មប្រជាប្រិយត្រូវបន្តគោរពវិធាន និងវិន័យរបស់បក្ស ហើយថា កតាព្វកិច្ចរបស់គណបក្ស គឺនៅសភា និងដើម្បីបម្រើប្រជាជនសិង្ហបុរី។ ដោយឡែក លោកលី សៀនឡុងដែលបានកាន់តំណែងតាំងពីឆ្នាំ ២០០៤ បានថ្លែងថា លោកគ្មានបំណងកោះឲ្យមានការរៀបចំបោះឆ្នោតភ្លាមទេ។ ការបោះឆ្នោតដែលតាមធម្មតាគ្រោងរៀបចំនៅខែវិច្ឆិកា ឆ្នាំ ២០២៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ