សិង្ហបុរី៖ឃាត់ខ្លួនរដ្ឋមន្រ្តីដឹកជញ្ជូន និងសេដ្ឋីម្នាក់នៅក្នុងក្របខណ្ឌនៃការស៊ើបអង្កេតរឿងពុករលួយ
នៅក្នុងប្រទេសសិង្ហបុរី អង្គភាពប្រឆាំងអំពើពុករលួយបានប្រកាសនាល្ងាចថ្ងៃសុក្រ ទី១៤ កក្កដាពីការឃាត់ខ្លួនរដ្ឋមន្រ្តីដឹកជញ្ជូន និងសេដ្ឋីម្នាក់នៅក្នុងក្របខណ្ឌនៃការស៊ើបអង្កេតរឿងពុករលួយ។ តាមអង្គភាពប្រឆាំងអំពើពុករលួយដដែល ការឃាត់ខ្លួនរដ្ឋមន្រ្តីដឹកជញ្ជូន និងសេដ្ឋីម្នាក់បានធ្វើឡើងកាលពីថ្ងៃទី១១ កក្កដាដូចគ្នា និងត្រូវបានដោះលែងវិញ បន្ទាប់ពីអ្នកទាំងពីរបានដាក់លុយតម្កល់។
ចុះផ្សាយនៅថ្ងៃ៖
ស្តាប់ - ០១:៥២
រហូតមកដល់ពេលនេះ អង្គភាពប្រឆាំងអំពើពុករលួយមិនបានផ្តល់ព័ត៌មានលំអិតជុំវិញការស៊ើបអង្កេត ឬមួយក៏រឿងអាស្រូវពុករលួយដែលមានជាប់ពាក់ព័ន្ធនឹងរដ្ឋមន្រ្តីដឹកជញ្ជូន និងសេដ្ឋីម្នាក់ឈ្មោះអ៊ុង បេងសេង (Ong Beng Seng) ទេ។ អ្វីដែលគេដឹង ការស៊ើបអង្កេតរឿងពុករលួយបានសំដៅដំបូងតែលើរដ្ឋមន្រ្តីដឹកជញ្ជូនម្នាក់គត់។ តែក្រោយមក អង្គភាពប្រឆាំងអំពើពុករលួយបានសម្គាល់ឃើញថា សេដ្ឋីលោកអ៊ុង បេងសេងក៏មានជាប់ជំពាក់វាក់វិនជាមួយរដ្ឋមន្រ្តីដឹកជញ្ជូនរូបនោះដែរ។
តាមអង្គភាពប្រឆាំងអំពើពុករលួយ រដ្ឋមន្រ្តីដឹកជញ្ជូន និងលោកអ៊ុង បេងសេងត្រូវបានឃាត់ខ្លួនក្នុងថ្ងៃទី១១ កក្កដាដូចគ្នា និងត្រូវបានដកលិខិតឆ្លងដែន។ តែអ្នកទាំងពីរត្រូវបានដោះលែងឲ្យមានសេរីភាពវិញ ក្រោយពីពួកគេបានដាក់លុយតម្កល់។ ទោះជាយ៉ាងនេះក្តី អង្គភាពប្រឆាំងអំពើពុករលួយបានថ្លែងពីការយល់ព្រមឲ្យលោកអ៊ុង បេងសេងទៅបរទេស បន្ទាប់ពីលោកបានដំឡើងប្រាក់តម្កល់ដល់ ១០០ ០០០ដុល្លារសាំងហ្កាពួរ។ តែនៅពេលត្រឡប់ពីបរទេសវិញ សេដ្ឋីរូបនេះត្រូវទៅបង្ហាញខ្លួននៅអង្គភាពប្រឆាំងអំពើពុករលួយ និងត្រូវប្រគល់លិខិតឆ្លងដែនវិញ។
គួរបញ្ជាក់ថា លោកអ៊ុង បេងសេងដែលជាជនជាតិម៉ាឡេស៊ីរស់នៅសិង្ហបុរីជាអចិន្រ្តៃយ៍ជាម្ចាស់ក្រុមហ៊ុន Singapore GP និងការិយាល័យទេសចរណ៍សិង្ហបុរី។ តាមទស្សនាវដ្តីអាមេរិក Forbes លោកអ៊ុង បេងសេង និងភរិយាជាអ្នកមានជាងគេលំដាប់ទី២៤ នៅសិង្ហបុរី។ តែនៅប្រទេសណាមិនដឹងទេ តែបើនៅសិង្ហបុរីក្នុងនាមជាប្រទេសដែលមិនសូវមានអំពើពុករលួយ រដ្ឋអំណាចមិនញញើតនឹងចាត់វិធានការចាស់ដៃទៅលើជនណាដែលមានជាប់ពាក់ព័ន្ធនឹងសកម្មភាពពុករលួយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ