សេដ្ឋកិច្ចចិនរង្គើជាថ្មី ដោយក្រុមហ៊ុនអចលនទ្រព្យដ៏ធំមួយទៀតជួបបញ្ហាហិរញ្ញវត្ថុ
ជិតពីរឆ្នាំក្រោយវិបត្តិបំណុលរបស់ក្រុមហ៊ុនអចលនទ្រព្យEvergrande ក្តីព្រួយបារម្ភកំពុងកើតមានជាថ្មីនៅក្នុងប្រទេសចិន នាពេលនេះ ជុំវិញសុខភាពរបស់ក្រុមហ៊ុនអលចនទ្រព្យCountry Garden ដែលធ្លាប់ជួយអូសទាញកំណើននិងរក្សាស្ថិរភាពសេដ្ឋកិច្ចជាតិ។ លង់ក្នុងបំណុល គ្មានលទ្ធភាពបង់ការប្រាក់ ភាគហ៊ុនរបស់Country Garden បានដាំក្បាលចុះជាង១៥%នៅព្រឹកថ្ងៃចន្ទនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
ស្ថានភាពរបស់ក្រុមហ៊ុនអចលនទ្រព្យCountry Garden ជាផលវិបាកផ្ទាល់នៃវិបត្តិដ៏ធ្ងន់ធ្ងរគ្មានប្រៀបក្នុងវិស័យអចលនទ្រព្យដែលជាមួយវិស័យសំណង់ តំណាងឱ្យមួយភាគបួននៃផលិតផលសរុបក្នុងស្រុកចិន(PIB)។
តើCountry Gardenមានទម្ងន់សេដ្ឋកិច្ចយ៉ាងណា?
Country Garden ជាក្រុមហ៊ុនឯកជនយក្សផ្នែកអចលនទ្រព្យ ដែលទស្សនាវដ្តីForbes ចាត់បញ្ចូលក្នុងចង្កោម៥០០ក្រុមហ៊ុនដ៏ធំជាងបំផុត នៅលើពិភពលោក។ ចំណែកម្ចាស់ក្រុមហ៊ុន លោកស្រី Yang Huiyan ដែលក្លាយជាមហាសេដ្ឋី តាំងពីអាយុ២៥ឆ្នាំ តាមរយៈការទទួលមរតកពីឪពុក ជាប់ឈ្មោះជាស្ត្រីមានជាងគេបំផុតប្រចាំអាស៊ី កាលពីប៉ុន្មានឆ្នាំមុន។ ក្រុមហ៊ុនរកស៊ីនៅបរទេសទៀត ដោយទទួលវិនិយោគគម្រោងអចលនទ្រព្យដ៏សម្បើមលើកោះសិប្បនិម្មិតរបស់ម៉ាឡេស៊ី។
មានទីស្នាក់ការនៅខេត្តហ្វូសាន់ ភាគខាងត្បូងប្រទេស ក្រុមហ៊ុនមានបុគ្គលិកបម្រើការចំនួនជិត៧ម៉ឺននាក់ គិតត្រឹមចុងឆ្នាំ២០២២។ ល្បីខាងមានសុខភាពហិរញ្ញវត្ថុល្អរឹងមាំខ្លាំង កាលពីឆ្នាំទៅ និងក្នុងពេលវិស័យអចលនទ្រព្យកំពុងមានវិបត្តិ Country Garden ជាក្រុមហ៊ុនលក់ផ្ទះដ៏ចម្បងគេនៅប្រចាំប្រទេស។
Country Gardenកំពុងជាន់ដានEvergrande?
ប៉ុន្តែកាលពីថ្ងៃចន្ទសប្តាហ៍មុន ក្រុមហ៊ុនស្រាប់តែមិនអាចបង់ការប្រាក់លើកម្ចីពីរ។ ក្រុមហ៊ុនបានទទួលការអនុគ្រោះ៣០ថ្ងៃ ពោលគឺក្រុមហ៊ុននឹងធ្លាក់ក្នុងវិបត្តិបំណុលនៅខែកញ្ញា បើនៅតែគ្មានលទ្ធភាពសង។ បន្ថែមពីលើនេះ កាលបរិច្ឆេទសងត្រូវផុតនៅឆ្នាំ២០២៤។ លោកស្រី យ៉ង់ ហ៊ុយយ៉ាន បានចេញលិខិតសុំទោសនិងទទួលស្គាល់ថាក្រុមហ៊ុនកំពុងជួបការលំបាកយ៉ាងខ្លាំងមិនធ្លាប់មានទេ តាំងពីបង្កើតឡើងនៅឆ្នាំ១៩៩៥។ ក្រុមហ៊ុនដែលត្រូវប្រកាសលទ្ធផលប្រចាំឆមាសនៅចុងខែសីហា អាចនឹងខាតបង់ប្រមាណ៥,៦ ទៅ៧ពាន់លានអឺរ៉ូ។ កាន់តែផុយស្រួយថែមទៀត ៦០%នៃគម្រោងអចលនទ្រព្យមានទីតាំងនៅតាមខេត្តក្រុងតូចៗដែលតម្លៃផ្ទះបានដាំក្បាលចុះខ្លាំង ហើយអតិថិជនសំខាន់ៗមានលទ្ធភាពទិញមានកំរិត។ ដើម្បីទ្រទ្រង់ក្រុមហ៊ុន លោកស្រី យ៉ង់ បានយកលុយផ្ទាល់ខ្លួនមកបង្គប់អស់ប្រមាណ៤៩០០លានដុល្លារហើយ។ ក្នុងរយៈពេលពីរឆ្នាំមកនេះលោកស្រីបានបាត់បង់ថវិកាអស់ជិត២៩ពាន់លានដុល្លារបើតាមBloombergនិងសល់ទ្រព្យធនប្រមាណ៥៣០០លាន។
កាលពីចុងឆ្នាំ២០២២ Country Garden មានបំណុលឡើងដល់ប្រមាណ១៥០ពាន់លានអឺរ៉ូ។ ជាការប្រៀបធៀប ក្រុមហ៊ុនEvergrande ជាប់បំណុលជាង៣០០ពាន់លានអឺរ៉ូ។ តែការដួលរលំក្រុមហ៊ុន Country Garden ច្បាស់ជាជះគ្រោះមហន្តរាយដល់ប្រព័ន្ធហិរញ្ញវត្ថុនិងសេដ្ឋកិច្ចចិនទាំងមូល។
ក្រៅអំពីអចលនទ្រព្យ ក្រុមហ៊ុនពង្រីកសកម្មភាពតាំងពីឆ្នាំ២០១៩មក ក្នុងវិស័យផលិតម៉ាស៊ីនផ្សេងៗនិងរ៉ូប៉ូសម្រាប់ធ្វើម្ហូប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ