កូរ៉េខាងជើងចារជាមហាអំណាចនុយក្លេអ៊ែរក្នុងរដ្ឋធម្មនុញ្ញរបស់ប្រទេស
មេដឹកនាំកូរ៉េខាងជើង លោកគីម ជុងអ៊ុនបានបញ្ជាឲ្យបង្កើនការផលិតអាវុធនុយក្លេអ៊ែរក្នុងចំនួនដ៏ច្រើន។ លើសពីនោះលោកចង់ឲ្យកូរ៉េខាងជើង ដើរតួនាទីសំខាន់ក្នុងចំណោមប្រទេសប្រទេសសម្ព័ន្ធមិត្តដែលមានជំហរប្រឆាំងអាមេរិក នៅក្នុងបរិបទសង្រ្គាមត្រជាក់សាជាថ្មី។ បទបញ្ជារបស់មេដឹកនាំកូរ៉េខាងជើងធ្វើឡើង នៅក្នុងកិច្ចប្រជុំសភាកូរ៉េខាងជើង ដែលនៅក្នុងនោះ គេបានបោះឆ្នោតកែប្រែរដ្ឋធម្មនុញ្ញ ដើម្បីចារកូរ៉េខាងជើងជាប្រទេសមហាអំណាចនុយក្លេអ៊ែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១០
ក្តីសង្ឃឹមរបស់សម្ព័ន្ធមិត្តអាមេរិក ដែលចង់ឲ្យកូរ៉េខាងជើងបោះបង់ចោលកម្មវិធីផលិតអាវុធនុយក្លេអ៊ែរត្រូវរលាយសាបសូន្យ នៅថ្ងៃពុធម្សិលមិញ នៅពេល រដ្ឋសភាកូរ៉េខាងជើងបោះឆ្នោត យល់ព្រមឲ្យកូរ៉េខាងជើងចារជាមហាអំណាចនុយក្លេអ៊ែរ នៅក្នុងរដ្ឋធម្មនុញ្ញរបស់ប្រទេស។
តាមការចុះផ្សាយរបស់ទីភ្នាក់ងារព័ត៌មានផ្លូវរដ្ឋKCNA នៅក្នុងសេចក្តីថ្លែងទៅកាន់អង្គសភាកូរ៉េខាងជើង ដែលបានបើកកិច្ចប្រជុំ នៅថ្ងៃអង្គារនិងថ្ងៃពុធម្សិលមិញ មេដឹកនាំកូរ៉េខាងជើង លោកគីម ជុងអ៊ុនប្រកាសថា ក្នុងនាមជាច្បាប់មូលដ្ឋានគ្រឹះរបស់ប្រទេស នយោបាយកសាងកម្លាំងនុយក្លេអ៊ែររបស់សាធារណរដ្ឋប្រជាធិបតេយ្យកូរ៉េខាងជើង ក្លាយជានយោបាយអចិន្ត្រៃយ៍។
នៅឆ្នាំមុន សភាកូរ៉េខាងជើងបោះឆ្នោតចាត់ទុកមនោគមវិជ្ជានុយក្លេអ៊ែរជាច្បាប់ជាតិ ដែលអនុញ្ញាតឲ្យបើកការវាយប្រហារនុយក្លេអ៊ែរក្នុងករណីដែលថ្នាក់ដឹកនាំយល់ឃើញថា កូរ៉េខាងជើងកំពុងរងការគំរាមកំហែង។ នៅថ្ងៃពុធ លោកគីម ជុងអ៊ុងនិយាយដោយមិនរារែក ចោទប្រកាន់វ៉ាស៊ីនតោន តូក្យូ និងសេអ៊ូលថា កំពុងចាប់ដៃបង្កើតសម្ព័ន្ធមិត្ត ត្រីកោណ។ មេដឹកនាំកូរ៉េខាងជើងចាត់ទុក សម្ព័ន្ធមិត្តយោធាអាមេរិក កូរ៉េខាងត្បូង និងជប៉ុន ថាជាការគំរាមកំហែងពិតៗ ពោលគឺមិនមែនជាការនិយាយគំរាម ឬក្តីស្រមៃនោះទេ។
ដើម្បី ប្រឆាំងអាមេរិកនិងសម្ព័ន្ធមិត្ត លោកគីម ជុងអ៊ុនបានបញ្ជាឲ្យគេធ្វើទំនើបកម្មអាវុធនុយក្លេអ៊ែរកូរ៉េខាងជើង ដើម្បីធ្វើយ៉ាងណាឲ្យកូរ៉េខាងជើងមានប្រៀបនៅក្នុងយុទ្ធសាស្រ្តប្រយុទ្ធប្រឆាំងអាវុធនុយក្លេអ៊ែររបស់សត្រូវ។
នៅថ្ងៃពុធ មេដឹកនាំកូរ៉េខាងជើង នៅបានជំរុញឲ្យមន្រ្តីទូត បង្កើនការផ្សព្វផ្សាយ ចាប់ដៃសហការជាមួយបណ្តាប្រទេសដែលមានជំហរប្រឆាំងនឹងអាមេរិក និងការវាតទីនិយមរបស់បស្ចិមលោក។
នៅមហាសន្និបាតអង្គការសហប្រជាជាតិ កាលពីថ្ងៃអង្គារ ឯកអគ្គរដ្ឋទូតកូរ៉េខាងជើង បានដំឡើងសំឡេង ទម្លាក់កំហុសលើនយោបាយរបស់អាមេរិកនៅអាស៊ីថា ជាដើមហេតុធ្វើឲ្យឧបទ្វីបកូរ៉េនៅមាត់ជ្រោះនុយក្លេអ៊ែរដ៏មរណៈ។ អ្នកសង្កេតការណ៍លោកខាងលិចវាយតម្លៃថា នៅពេលឆាប់ៗខាងមុខ កូរ៉េខាងជើងអាចធ្វើការសាកល្បងអាវុធនុយក្លេអ៊ែរ ជាលើកទី ៧ បន្ទាប់ពីស្ងាត់ ផ្អាកតាំងពីឆ្នាំ ២០១៧។
នៅថ្ងៃទី ២កញ្ញាដើមឆ្នាំនេះ របបព្យុងយ៉ាងបានរៀបចំសមយុទ្ធក្នុងរូបភាពបាញ់មីស៊ីលចម្ងាយឆ្ងាយដែលមានសមត្ថភាពនាំយកក្បាលគ្រាប់នុយក្លេអ៊ែរ។
សេអ៊ូល និងតូក្យូបានចេញមុខប្រឆាំងការអភិវឌ្ឍអាវុធនុយក្លេអ៊ែរនិងមីស៊ីលរបស់កូរ៉េខាងជើង ដែលគេចាត់ទុកជាការគំរាមកំហែងសន្តិភាព និងសន្តិសុខរបស់កូរ៉េខាងត្បូង ជប៉ុន និងសហគមន៍អន្តរជាតិ។ សម្រាប់អ្នកនាំពាក្យរបស់រដ្ឋាភិបាលជប៉ុន ជប៉ុនមិនអាចទទួលយកបានទេដែលកូរ៉េខាងជើង ចារនៅក្នុងរដ្ឋធម្មនុញ្ញ របស់ខ្លួន ជាមហាអំណាចនុយក្លេអ៊ែរ។ ប្រធានាធិបតីកូរ៉េខាងត្បូង លោកយុន សុខយោលធ្លាប់ព្រមានហើយថា បើកូរ៉េខាងជើងប្រើអាវុធនុយក្លេអ៊ែរ នោះអាមេរិក និងកូរ៉េខាងត្បូងនឹងឆ្លើយតបវិញ ដើម្បីបិទបញ្ចប់របបកុម្មុយនិស្តកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ