អូស្រ្តាលី៖ពលរដ្ឋជនជាតិដើមភាគតិចបានត្រឹមសម្តែងកំហឹង និងភាពជូរចត់
នៅក្នុងប្រទេសអូស្រ្តាលី ពលរដ្ឋជនជាតិដើមភាគតិចបានសម្តែងកំហឹង និងភាពជូរចត់របស់ខ្លួនក្នុងថ្ងៃអាទិត្យ ទី១៥ តុលា។ កំហឹង និងភាពជូរចត់បានកើតមានឡើងក្រោយពីពលរដ្ឋបានបោះឆ្នោតច្រានចោលលើគម្រោងបញ្ចូលជនជាតិដើមភាគតិចទៅក្នុងច្បាប់រដ្ឋធម្មនុញនាការបោះឆ្នោតប្រជាមតិក្នុងថ្ងៃសៅរ៍ ទី១៤ តុលា។
ចុះផ្សាយនៅថ្ងៃ៖
ស្តាប់ - ០៣:៤៧
លទ្ធផលដែលទទួលបាននៅក្រោយការរាប់សន្លឹកឆ្នោតជាង ៧០% បានបង្ហាញថា មានអ្នកបោះឆ្នោតប្រមាណជា ៦១% បានឆ្លើយ « ទេ » ទៅនឹងសំណួរដែលសួរថា តើច្បាប់រដ្ឋធម្មនុញ្ញឆ្នាំ ១៩០១ គួរតែធ្វើការផ្លាស់ប្តូរដើម្បីទទួលស្គាល់ជនជាតិដើមភាគតិចជាពលរដ្ឋដែលបានរស់លើទឹកដីអូស្រ្តាលីដំបូងគេ ឬអត់។ ទន្ទឹមគ្នានេះ អ្នកបោះឆ្នោតក៏បានបោះឆ្នោតប្រឆាំងនឹងការបង្កើតឲ្យមានក្រុមប្រឹក្សាពិគ្រោះយោបល់មួយដែលហៅ « សំឡេង » ដើម្បីផ្តល់ជាគំនិតស្តីពីច្បាប់ និងនយោបាយសាធារណៈទៅកាន់សភា និងរដ្ឋាភិបាលទាក់ទងនឹងជនជាតិដើមភាគតិច។ គួរបញ្ជាក់ថានៅអូស្រា្តលី ការបោះឆ្នោតជាកាតព្វកិច្ចសម្រាប់អ្នកបោះឆ្នោតទាំង ១៧លាន ៥សែននាក់។
តែដើម្បីឲ្យគម្រោងមួយអាចអនុម័តទៅបាន គឺត្រូវតែមានសំឡេងគាំទ្រភាគច្រើនថ្នាក់ជាតិផង និងសំឡេងគាំទ្រពីរដ្ឋចំនួន ៤យ៉ាងតិចក្នុងចំណោមរដ្ឋទាំង ៦ របស់ប្រទេសផង។ ចំណោតត្រង់ថា គម្រោងផ្លាស់ប្តូរច្បាប់រដ្ឋធម្មនុញ្ញឆ្នាំ ១៩០១ ដើម្បីទទួលស្គាល់ និងផ្តល់សិទ្ធិទូលំទូលាយឲ្យជនជាតិដើមភាគតិចមិនបានទទួលការគាំទ្រពីថ្នាក់ជាតិ និងថ្នាក់រដ្ឋទេ។ នេះស បញ្ជាក់ឲ្យឃើញថានៅទីបំផុត ជនជាតិដើមភាគតិចនឹងគ្មានសំឡេងនៅក្នុងសភា និងបន្តមិនទទួលស្គាល់ដោយរដ្ឋធម្មនុញ្ញជាពលរដ្ឋដំបូងគេរស់លើទឹកដីអូស្រ្តាលី។ ដូច្នេះសម្រាប់ក្រុមជនជាតិដើមភាគតិចនៅអូស្រ្តាលី គឺគ្មានអ្វីក្រៅពីកំហឹង និងភាពជូរចត់ឡើយ។
« ឥឡូវនេះជាពេលវេលាសម្រាប់ភាពស្ងៀមស្ងាត់ សោកសៅ និងគិតឲ្យបានស៊ីជម្រៅពីផលវិបាកនៃលទ្ធផលបោះឆ្នោត» នេះជាការលើកឡើងរបស់ក្រុមមួយនៃសមាគមអ្នកការពារជនជាតិដើមភាគតិចអូស្រ្តាលី។ គួរបញ្ជាក់ថា ជនជាតិដើមភាគតិចអូស្រ្តាលីបានតស៊ូទាមទារតាំងពីយូរដើម្បីមានសិទ្ធិបោះឆ្នោតថ្នាក់សហព័ន្ធ សិទ្ធិកាន់ដីធ្លីប្រពៃណីរបស់ពួកគេ និងសិទ្ធិដើម្បីជាប់ឆ្នោតជាតំណាងរាស្រ្តនៅក្នុងសភា។ សព្វថ្ងៃ ជនជាតិភាគតិចមានប្រមាណ ៩៨៤ ០០០នាក់ពោលស្មើនឹង ៣,៨% នៃចំនួនពលរដ្ឋអូស្រ្តាលីសរុប។ តាមពិត រឿងរ៉ាវមួយនេះទទួលបានការគាំទ្រ និងមិនគាំទ្រ។ ក្នុងចំណោមអ្នកប្រឆាំងក៏មានប្រធានបក្សប្រឆាំងម្នាក់ដែរ។
តែសម្រាប់ក្រុមអ្នកអ្នកគាំទ្រយល់ថា ការទទួលស្គាល់ជនជាតិដើមភាគតិចនៅក្នុងរដ្ឋធម្មនុញ្ញជារឿងចាំបាច់ព្រោះវាចូលរួមព្យាបាលស្នាមរបួសអតីតកាលដែលសល់ពីសម័យអាណានិគមនិយមអង់គ្លេសកាលពីជាង ២០០ឆ្នាំមុន។ នាយករដ្ឋមន្រ្តីអូស្រា្តលីលោកអង់តូនី អាល់បានីដែលជាអ្នកគាំទ្រម្នាក់ដែរបានធ្វើយុទ្ធនាការយ៉ាងសកម្មដោយអំពាវនាវពលរដ្ឋបោះឆ្នោតគាំទ្រលើកំណែទម្រង់ច្បាប់រដ្ឋធម្មនុញ្ញ។ តែទោះជាយ៉ាងនេះក្តី ការអំពាវនាវរបស់លោកអាល់បានីនៅជាការអំពាវនាវដោយគ្មានអ្នកណាស្តាប់ និងធ្វើតាមទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ