ជម្លោះអ៊ីស្រាអែល-ហាម៉ាស៖ចិនចង់ធ្វើការជាមួយអេហ្ស៊ីបដើម្បីស្ថិរភាពតំបន់មជ្ឈិមបូព៌ា
នៅក្នុងប្រទេសចិន ប្រធានាធិបតីលោកស៊ី ជីនពីងបានថ្លែងក្នុងថ្ងៃព្រហស្បតិ៍ ទី១៩ តុលាថា ចិនចង់ចូលរួមធ្វើការជាមួយអេហ្ស៊ីបដើម្បីស្វែងរកស្ថិរភាពឲ្យតំបន់មជ្ឈិមបូព៌ា។ លោកស៊ីបានថ្លែងយ៉ាងដូចនេះប្រាប់នាយករដ្ឋមន្រ្តីអេហ្ស៊ីបលោកមូស្តាហ្វា អាល់ ម៉ាដប៊ូលីដែលបានចូលរួមនៅក្នុងវេទិកាផ្លូវ និងខ្សែក្រវ៉ាត់លើកទី៣ ក្នុងក្រុងប៉េកាំង។
ចុះផ្សាយនៅថ្ងៃ៖
ស្តាប់ - ០៣:២០
មានមូលហេតុសំខាន់ចំនួន ៣ដែលបានធ្វើឲ្យចិនចង់ដើរតួនាទីជាមួយអេហ្ស៊ីបដើម្បីស្វែងរកស្ថិរភាពឲ្យតំបន់មជ្ឈិមបូព៌ាដែលកំពុងផ្ទុះកញ្ជ្រោលដោយសង្រ្គាមអ៊ីស្រាអែល និងហាម៉ាស ទី១ អេហ្ស៊ីបមានខ្សែព្រំដែនជាប់នឹងតំបន់ហ្កាហ្សាដែលគ្រប់គ្រងដោយចលនាប៉ាឡេស្ទីនហាម៉ាស ទី២ អេហ្ស៊ីបជាអន្តរការីប្រពៃណីដ៏យូរលង់រវាងអ៊ីស្រាអែល និងពួកហាម៉ាស ហើយមូលហេតុសំខាន់ទី៣ អេហ្ស៊ីបជាប្រទេសអារ៉ាប់ដំបូងបង្អស់ដែលបានចុះកិច្ចព្រមព្រៀងសន្តិភាពជាមួយអ៊ីស្រាអែលក្នុងឆ្នាំ ១៩៧៩។
តាមទូរទស្សន៍ចិន CCTV ប្រធានាធិបតីចិនលោកស៊ី ជីនពីងបានថ្លែងប្រាប់នាយករដ្ឋមន្រ្តីអេហ្ស៊ីបលោកមូស្តាហ្វា អាល់ ម៉ាដប៊ូលីថា ចិនបានត្រៀមខ្លួនរួចជាស្រេចដើម្បីពង្រឹងកិច្ចសហប្រតិបត្តិការជាមួយអេហ្ស៊ីបនៅលើគ្រប់វិស័យ និងធ្វើការជាមួយអេហ្ស៊ីបដើម្បីស្វែងស្ថិរភាពពិតប្រាកដឲ្យតំបន់មជ្ឈិមបូព៌ា និងពិភពលោក។ តាមលោកស៊ី ជីនពីង អាទិភាពដាច់ខាតដែលត្រូវមានមុនគេនៅក្នុងសង្រ្គាមរវាងអ៊ីស្រាអែល និងពួកហាម៉ាសពេលនេះ គឺការបិទបញ្ចប់សង្រ្គាមឲ្យបានឆាប់បំផុតដែលអាចធ្វើទៅបានដើម្បីបញ្ជៀសកុំឲ្យសង្រ្គាមមួយនេះរីករាលដាល ឬមិនអាចគ្រប់បាន និងបង្កឲ្យមានវិបត្តិមនុស្សធម៌ធ្ងន់ធ្ងរ។
តែប្រធានាធិបតីចិនដដែលរូបនេះមិនភ្លេចលើកឡើងពីដំណោះស្រាយសម្រាប់ជម្លោះរវាងអ៊ីស្រាអែល និងប៉ាឡេស្ទីនដោយបញ្ជាក់ថា ដំណោះស្រាយជាមូលដ្ឋានដើម្បីបិទបញ្ចប់ជម្លោះដ៏រ៉ាំរ៉ៃ និងអូសបន្លាយមួយនេះ គឺការឈានទៅបង្កើតរដ្ឋប៉ាឡេស្ទីនមួយឯករាជ្យរស់ក្បែររដ្ឋអ៊ីស្រាអែល។ គួរបញ្ជាក់ថា ចិនបានរក្សាទំនាក់ទំនងល្អទាំងជាមួយអ៊ីស្រាអែល និងប៉ាឡេស្ទីន។ តែក្នុងពេលជាមួយគ្នា ក្រុងប៉េកាំងបានគាំទ្របុព្វហេតុប៉ាឡេស្ទីនតាំងពីច្រើនទសវត្សរ៍ដោយចាត់ទុកប៉ាឡេស្ទីនជារដ្ឋមួយ និងបានទទូចឲ្យមានដំណោះស្រាយរដ្ឋពីរ។
មែនទែនទៅ និងក្រៅពីចិន ដំណោះស្រាយរដ្ឋពីរនៅក្នុងជម្លោះអ៊ីស្រាអែល ប៉ាឡេស្ទីនក៏ជាការចង់បានរបស់ប្រទេសជាច្រើនផ្សេងទៀតដែរ។ ដោយឡែកក្នុងថ្ងៃព្រហស្បតិ៍ ទី១៩ តុលាដដែល ចិនតាមរយៈអ្នកនាំពាក្យក្រសួងការបរទេសលោកស្រីម៉ាវ នីងបានសម្តែងការខកចិត្តដែលអាមេរិកបានបោះឆ្នោតប្រឆាំងនឹងសេចក្តីសម្រេចស្តីពីបញ្ហាប៉ាឡេស្ទីននៅក្រុមប្រឹក្សាសន្តិសុខក្នុងថ្ងៃពុធ ទី១៨ តុលា។ សេចក្តីសម្រេចដែលស្នើដោយប្រទេសប្រេស៊ីលបានអំពាវនាវឲ្យមានការផ្អាកបាញ់គ្នារវាងអ៊ីស្រាអែល និងពួកហាម៉ាសដើម្បីនាំជំនួយមនុស្សធម៌ឲ្យប្រជាជនប៉ាឡេស្ទីននៅតំបន់ហ្កាហ្សា។
អាមេរិកបានពន្យល់ហេតុផលដែលខ្លួនបានបោះឆ្នោតប្រឆាំងថា គឺមកពីសេចក្តីសម្រេចនោះមិនបានចែងពីសិទ្ធិរបស់អ៊ីស្រាអែលដើម្បីការពារខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ