របាយការណ៍៖ពិភពលោកកំពុងដើរលើផ្លូវខុសដោយមិនគោរពកិច្ចសន្យាបញ្ឈប់ការកាប់បំផ្លាញព្រៃឈើ
នៅថ្ងៃអង្គារ ទី២៤ តុលា ក្រុមអង្គការក្រៅរដ្ឋាភិបាល និងអ្នកស្រាវជ្រាវបានចេញផ្សាយរបាយការណ៍ប្រចាំឆ្នាំស្តីពីស្ថានភាពព្រៃឈើក្នុងលោក។ របាយការណ៍បានព្រមានពីកំណើននៃការបន្តកាប់បំផ្លាញព្រៃឈើ ទោះបីជាថ្នាក់ដឹកនាំជាង ១០០ប្រទេស និងដែនដីបានសន្យាក្នុងឆ្នាំ ២០២១ ក្នុងការប្រយុទ្ធប្រឆាំងនឹងការបាត់បង់ព្រៃឈើពីពេលនេះទៅឆ្នាំ ២០៣០ ក៏ដោយ។
ចុះផ្សាយនៅថ្ងៃ៖
ស្តាប់ - ០២:៥៨
ការវាយតម្លៃប្រចាំឆ្នាំរបស់ក្រុមអង្គការក្រៅរដ្ឋាភិបាល និងអ្នកស្រាវជ្រាវបានបង្ហាញថា ការកាប់បំផ្លាញព្រៃឈើលើលោកបានកើនឡើង ៤% ក្នុងឆ្នាំ ២០២២ និងថា ពិភពលោកនៅមិនទាន់ដើរចំផ្លូវឆ្ពោះទៅបំពេញកិច្ចសន្យាឆ្នាំ ២០៣០ ទេ។ ជាសរុបក្នុងឆ្នាំ ២០២២ មានការបាត់បង់ព្រៃឈើប្រមាណ ៦លាន ៦សែនហិចតាដែលភាគច្រើនជាព្រៃឈើធម្មជាតិនៅក្នុងតំបន់ត្រូពិច។ លោកស្រី Erin Matson អ្នកនិពន្ធម្នាក់នៃរបាយការណ៍ក្រោមចំណងជើង « ការវាយតម្លៃនៃសេចក្តីថ្លែការណ៍ស្តីពីព្រៃឈើ » បានគូសបញ្ជាក់ថា កម្មវត្ថុបញ្ឈប់ការកាប់បំផ្លាញព្រៃឈើនៅឆ្នាំ ២០៣០ មិនមែនធ្វើឡើងដើម្បីដាក់តាំងឲ្យល្អមើលទេ តែវាសំខាន់ដើម្បីចូលរួមថែរក្សាបរិយាកាសដែលអាចរស់នៅបានសម្រាប់មនុស្សជាតិ។
ទន្ទឹមគ្នានេះ របាយការណ៍ក៏បានលើកឡើងពីការខូចខាតព្រៃឈើដែលនៅជាបញ្ហាចម្បង និងបានធ្វើឲ្យប៉ះពាល់ដល់ស្ថានភាពទូទាំងរបស់ព្រៃឈើ។ ការខូចខាតព្រៃឈើដែលរបាយការណ៍ចង់និយាយក៏មានបញ្ចូលពីភ្លើងឆេះ និងការបាត់បង់ជីវៈចម្រុះដែរ។ តែស្របគ្នានឹងភាពអវិជ្ជមាន របាយការណ៍ដដែលបានលើកឡើងពីភាពវិជ្ជមាននៅក្នុងប្រទេសប្រមាណជា ៥០ប្រទេសដែលកំពុងដើរចំផ្លូវឆ្ពោះទៅបិទបញ្ចប់ការកាប់បំផ្លាញព្រៃឈើ ពិសេសប្រេស៊ីល ឥណ្ឌូណេស៊ី និងប្រទេសម៉ាឡេស៊ី។ ចំណុចវិជ្ជមានបន្ទាប់មក របាយការណ៍បានសរសើរច្បាប់ថ្មីរបស់សហភាពអឺរ៉ុបដែលសំដៅបិទខ្ទប់ការនាំចូលគ្រប់ផលិតផលដែលនាំឲ្យមានការកាប់បំផ្លាញព្រៃឈើ។
តែរបាយការណ៍បានអំពាវនាវឱ្យមានសកម្មភាពជាសកលកាន់តែខ្លាំង ពិសេសបង្កើនខ្ទង់ចំណាយសម្រាប់ការពារព្រៃឈើ និងបិទបញ្ចប់ប្រាក់ឧបត្ថម្ភធនដល់វិស័យណាដែលនាំឲ្យមានការកាប់បំផ្លាញព្រៃឈើ។ ដោយឡែក មូលនិធិពិភពលោកដើម្បីធម្មជាតិ WWF ក៏បានយល់ឃើញថា ទោះជាមានកិច្ចសន្យាជាសកលតាំងពីឆ្នាំ ២០២១ ក៏ដោយក៏ការបាត់បង់ព្រៃឈើកំពុងបន្តមាន ពិសេសនៅតំបន់ត្រូពិចដែលការបាត់បង់មានទំហំប៉ុនផ្ទៃក្រឡាដីរបស់ប្រទេសដាណឺម៉ាក។ អ្វីជាការកត់សម្គាល់ របាយការណ៍របស់ក្រុមអង្គការក្រៅរដ្ឋាភិបាល និងអ្នកស្រាវជ្រាវបានធ្លាក់មក ខណៈដែលសន្និសីទអន្តរជាតិស្តីពីអាកាសធាតុគ្រោងរៀបចំក្នុងក្រុងឌូបៃ ប្រទេសអេមីរ៉ាតអារ៉ាប់រួមពីថ្ងៃទី៣០ វិច្ឆិកាដល់ថ្ងៃទី១២ ធ្នូខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ