នាយករដ្ឋមន្ត្រីជប៉ុនប្រាប់លោកស៊ីជីនពីងថាខ្វល់នឹងសកម្មភាពយោធាចិន
ក្នុងឱកាសជួបពិភាក្សាគ្នា ក្រៅក្របខ័ណ្ឌជំនួបAPEC លោកនាយករដ្ឋមន្ត្រីជប៉ុន ហ្វូមីអូ គីស៊ីដា បានប្រាប់ប្រធានាធិបតីចិនលោកស៊ីជីនពីង អំពីក្តីព្រួយបារម្ភរបស់ជប៉ុនជុំវិញសកម្មភាពយោធាចិននៅតំបន់អាស៊ីប៉ាស៊ីហ្វិក និងជុំវិញកិច្ចសហការចិនជាមួយរុស្ស៊ី។ ចំណែកលោកស៊ីជីនពីងវិញ បានរំលឹកប្រមុខរដ្ឋាភិបាលជប៉ុនថាការបង្ហូរទឹកពីមជ្ឈមណ្ឌលនុយក្លេអ៊ែរហ្វូគុស្ហ៊ីម៉ាប៉ះពាល់ដល់សុខភាពមនុស្សជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
លោកនាយករដ្ឋមន្ត្រីជប៉ុន ហ្វូមីអូ គីស៊ីដា បានប្រកាសតាមកញ្ចក់ទូរទស្សន៍ជាតិជប៉ុនថា ចិននិងជប៉ុនបានព្រមព្រៀងស្វែងរកដំណោះស្រាយតាមផ្លូវចរចា និងជជែកពិភាក្សាគ្នាក្រោមគោលការណ៍ស្ថាបនា ព្រោះប្រទេសទាំងពីរជាមហាអំណាច មានទំនួលខុសត្រូវខ្ពស់ ត្រូវបង្ហាញវត្តមានទន្ទឹមគ្នា លូតលាស់រុងរឿងរួមគ្នា ដើម្បីដឹកនាំតំបន់-សង្គមអន្តរជាតិ ពិភពលោកឆ្ពោះទៅរកសន្តិភាពនិងស្ថិរភាព។ លោកនាយករដ្ឋមន្ត្រីបានលើកឡើងជាថ្មីអំពីសារៈសំខាន់នៃសន្តិភាពក្នុងតំបន់ច្រកសមុទ្រតៃវ៉ាន់ សម្រាប់សហគមន៍អន្តរជាតិនិងជប៉ុនផ្ទាល់ទៅកាន់លោកប្រធានាធិបតីចិនស៊ី ជីនពីង ដោយបញ្ជាក់អំពីការព្រួយបារម្ភរបស់ជប៉ុនចំពោះសកម្មភាពយោធាចិនក្នុងតំបន់អាស៊ីប៉ាស៊ីហ្វិក និងបានស្នើសុំផងដែរឱ្យចិនដកពោងចេញពីតំបន់សេដ្ឋកិច្ចផ្តាច់មុខរបស់ជប៉ុន។ នេះបើតាមប្រសាសន៍របស់លោក គីស៊ីដាដដែល។
តំបន់ប៉ាស៊ីហ្វិកបានស្គាល់ភាពតានតឹង ដោយហេតុតែវត្តមានចិនក្នុងសមុទ្រចិនខាងត្បូងផង និងសមយុទ្ធចិនជុំវិញកោះតៃវ៉ាន់ផង ព្រមទាំងការពង្រីកសកម្មភាពយោធាកាន់តែខ្លាំងនិងកាន់តែឆ្ងាយឡើងៗផង។ តូក្យូបានអះអាងថា កាលពីខែកញ្ញា នាវាចិនចំនួន៦គ្រឿង ក្នុងទម្រង់ជានាវាចម្បាំង នាវាសង្គ្រាម នាវាប្រតិកម្មរហ័ស និងនាវាផ្ទុកយន្តហោះស្ហានដុង បើកមកកៀកកោះMIYAKOJIMAកោះភាគខាងត្បូងរបស់ជប៉ុន ប្រមាណតែ៦៥០គីឡូម៉ែត្រ។ ជប៉ុនចាប់បានសញ្ញាឧទ្ធម្ភាគចក្រ ហោះចេញនិងហោះចុះលើនាវាស្ហានដុងទៀត តែចិនមិនបញ្ជាក់ជាផ្លូវការករណីធ្វើសមយុទ្ធក្នុងសមុទ្ទប៉ាស៊ីហ្វិកខាងត្បូងនេះទេ។
លោកគីស៊ីដា បានអះអាងទៀតថា លោកបានស្នើសុំដោយទទូចទៅកាន់លោក ស៊ី ជីនពីង ឱ្យបញ្ចេញប្រតិកម្មដោយស្ងប់ស្ងាត់ដោយឈរលើមូលដ្ឋានវិទ្យាសាស្ត្រ និងលើកចេញជាបន្ទាន់នូវបម្រាមនាំចូលផលិតផលចំណីអាហារជប៉ុន។
ប៉ុន្តែបើតាមអ្នកនាំពាក្យក្រសួងការបរទេសចិន លោកប្រធានាធិបតីចិនស៊ីជីនពីង បានឆ្លើយតបទៅនឹងលោកនាយករដ្ឋមន្ត្រីជប៉ុនវិញថាការបង្ហូរទឹកចេញមជ្ឈមណ្ឌលនុយក្លេអ៊ែរហ្វូគូស៊ីម៉ាទៅក្នុងសមុទ្រ ប៉ះពាល់ដល់សុខភាពមនុស្សជាតិទាំងមូល។ តែយ៉ាងណាក៏ដោយក៏ចិននិងជប៉ុនត្រូវតែផ្ចង់គិតគូរលើប្រយោជន៍រួម ហើយចាត់ចែងទំនាស់ឱ្យសមរម្យ។ សម្រាប់លោកប្រធានាធិបតីចិន ទំនាក់ទំនងចិនជប៉ុន មានតួនាទីវិជ្ជមានសម្រាប់ផ្តល់សន្ទុះដល់សន្តិភាព វឌ្ឍនភាព និងភាពរុងរឿងក្នុងតំបន់។
ទោះបីមានទំនាស់ប្រវត្តិសាស្ត្រនិងដែនដីក៏ដោយ តូក្យូនិងប៉េកាំងគួរស្ថាបនាទំនាក់ទំនងទ្វេភាគីដោយសន្តិវិធី ដោយមិត្តភាពជានិរន្តនិងមានកិច្ចសហប្រតិបត្តិការផ្តល់ប្រយោជន៍ប្រកបដោយវឌ្ឍនភាពឱ្យគ្នាទៅវិញទៅមក។ នេះបើតាមការគូសបញ្ជាក់របស់លោកស៊ីជីនពីង ដែលចុះផ្សាយដោយទូរទស្សន៍ជាតិចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ