សកម្មជនប្រឆាំងដើម្បីប្រជាធិបតេយ្យហុងកុង រត់និរទេសខ្លួនទៅបរទេស ម្តងមួយៗ
ក្នុងសប្តាហ៍នេះ យុវជនហុងកុង តូនី ចុង បានប្រកាសថារត់ភៀសខ្លួនទៅដល់ អង់គ្លេស ហើយ។ សកម្មជនដើម្បីលិទ្ធិប្រជាធិបតេយ្យហុងកុងដ៏លេចធ្លោ រូបនេះ បានផ្តល់បទសម្ភាសជាច្រើន នៅថ្ងៃសុក្រ ទី២៩ធ្នូ។ ការភៀសខ្លួនទៅទីក្រុងឡុងដ្រ៍ របស់យុវជនវ័យ២២ឆ្នាំនេះគឺបន្ទាប់ពី សកម្មនារីហុងកុងម្នាក់ទៀត គឺនាង អានីញ៉ែស ចូវ ដែលបានរត់និរទេសខ្លួន ដល់ប្រទេស កាណាដា កាលដើមខែធ្នូ។
ចុះផ្សាយនៅថ្ងៃ៖
ស្តាប់ - ០៣:៣០
ដើម្បីគេចពីក្រសែភ្នែកប៉ូលិសហុងកុង យុវជន តូនី ចុង យកតាមខ្លួន ត្រឹមតែបង្វេចស្ពាយមួយកាតាប ហើយនិងកុហកថា ទៅដើរលេងវិស្សមកាលនៅកោះអូគីណាវ៉ា ប្រទេសជប៉ុន ហើយនឹងត្រឡប់មកហុងកុងវិញពេលបុណ្យទានចប់។ ក៏ប៉ុន្តែ ពេលជិះយន្តហោះទៅដល់ កោះអូគីណាវ៉ា តូនី ចុង ក៏បានទិញសំបុត្របន្តធ្វើដំណើរទៅដល់រាជធានីឡុងដ្រ៍។ ឡុងដ្រ៍ ប្រទេសអង់គ្លេស ជាទីដែល តូនី ចុង បានសុំសិទ្ធជ្រកកោណនយោបាយ ដូចរៀមច្បងរបស់គេ គឺ ណាថាន់ ឡ ហើយនិងកូនប្រុសរបស់ចៅហ្វាយកាសែតប្រឆាំង ជីមី ឡៃ ។ សកម្មជនដើម្បីលិទ្ធិប្រជាធិបតេយ្យហុងកុង បាននាំគ្នារត់និរទេសខ្លួនទៅបរទេស ម្តងមួយៗ ខណៈពេល យុវជន ចូសហ័រ វុង មេក្រុមប្រឆាំងដ៏លេចធ្លោ កំពុងជាប់ក្នុងមន្ទីរឃុំឃាំងហុងកុងនៅឡើយ។
ក្នុងបទសម្ភាសជាមួយកាសែតបរទេស តូនី ចុង បកអាក្រាតអំពើធ្វើទុក្ខបុកម្នេញ និងការឈ្លបតាមដានឃ្លាំមើលទាំងថ្ងៃទាំងយប់របស់អាជ្ញាធរហុងកុង។ អាជ្ញាធរហុងកុង ក៏បានបញ្ចុះបញ្ជូលរូបគេដែរ និងផ្តល់ឲ្យលុយកាក់ទាក់ទាញទឹកចិត្ត ដើម្បីឲ្យរូបគេផ្តល់ដំណឹងឈានដល់ការចាប់ខ្លួន មេៗសកម្មជនប្រឆាំងសំខាន់ៗ ១៣ នាក់ ដែលរដ្ឋអំណាចចេញប្រកាសតាមចាប់ខ្លួន។ នគរបាលហុងកុង ក៏ស្នើយោបល់ល្បួងចង់នាំរូបគេទៅទស្សនាចិនដីគោក។ ក៏ប៉ុន្តែ តូនី ចុង បានបដិសេធដាច់ខាត។ ចំពោះមុខស្ថានការណ៍ដ៏លំបាក គឺមានជម្រើសពីរ ដែល តូនី ចុង បានពិចារណាថ្លឹងថ្លែងជាយូរមកហើយ។ នោះគឺថាត្រូវបន្តជាប់គុកតទៅទៀត ឬត្រូវបង្ខំចិត្តចាកចេញពីហុងកុង។
គួរជ្រាបថា តាំងពីនៅជាសិស្សវិទ្យាល័យមកម្ល៉េះ ដែល តូនី ចុង មានគំនិតប្រឆាំងនឹងរដ្ឋអំណាច។ ឆ្នាំ២០១៦ រូបគេបានផ្តួចផ្តើមបង្កើតសមាគមសិស្សក្នុងស្រុង ដើម្បីអំពាវនាវទាមទារឯករាជ្យហុងកុង ដាច់ចេញពីអំណាចចិនប៉េកាំង។ សមាគមនេះត្រូវរដ្ឋអំណាចហុងកុងរំលាយចោល នៅឆ្នាំ២០២០ ក្រោមអំណាចឥទ្ធិពលច្បាប់សន្តិសុខជាតិហុងកុង ដែលតាក់តែងញាក់ខ្សែដោយចិនប៉េកាំង។ តូនី ចុង ត្រូវចាប់ឃុំខ្លួននិងកាត់ទោសឲ្យជាប់ពន្ធនាគារ ៣ ឆ្នាំកន្លះ ហើយក្រោយមក ត្រូវដោះលែងឲ្យនោះក្រៅឃុំបណ្តោះអាសន្ន ជាថ្នូរនឹងប្រាក់ធានា។ រូបគេត្រូវនគរបាលកោះហៅចូលខ្លួនជាថ្មី ក្រោយពីបង្ហាញខ្លួននៅមុខកុងស៊ុលអាមេរិក ជាមួយនឹងមានចេតនាដាក់ពាក្យសុំសិទ្ធជ្រកកោននយោបាយ នៅអាមេរិក។
កាលពីថ្ងៃសុក្រ អ្នកនាំពាក្យស្ថានទូតចិននៅទីក្រុងឡុងដ្រ៍ បានព្រមាន អង់គ្លេស ថាឲ្យនាំខ្លួន យុវជន តូនី ចុង និរទេសខ្លួនគេឲ្យត្រឡប់ទៅហុងកុងវិញ ដើម្បីប្រឈមមុខនឹងការជម្រះក្តីនៅតុលាការ។ ប៉ុន្តែ យុវជន តូនី ចុង សង្ឃឹមថា រដ្ឋាភិបាលអង់គ្លេស នឹងមិនធ្វើតាមសំណើរបស់ចិនឡើយ។ ទោះជាយ៉ាងនេះក្តី តូនី ចុង ក៏ថ្លែងក្តីសោកស្តាយ ដែលត្រូវចាកចោលស្រុកកំណើត ប្រហែលជារៀងរហូតផងក៏មិនដឹង ដោយរំពឹងខ្លះៗថា អាចត្រឡប់ទៅហុងកុងវិញ នៅថ្ងៃណាមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ