អង្គការFAO ថាតម្លៃទំនិញចំណីអាហារ បានចុះថោក១៣,៧% ក្នុងឆ្នាំ២០២៣
អត្រាតម្លៃទំនិញចំណីអាហារ បានចុះថោកជាមធ្យម ចំនួន១៣,៧% ក្នុងឆ្នាំ២០២៣ បើប្រៀបធៀបទៅឆ្នាំមុន។ នេះ បើផ្អែកតាមតួលេខប្រមូលដោយអង្គការសហប្រជាជាតិ ដើម្បីចំណីអាហារនិងកសិកម្ម ហៅកាត់ថាអង្គការFAO។ ការធ្លាក់តម្លៃ បន្ទាប់ពីឆ្នាំ២០២២ ទំនិញបានឡើងថ្លៃខ្លាំង ដោយសារតែអត្រាអតិផរណាកើនឡើងខ្ពស់ ក្នុងបរិបទសង្គ្រាមនៅអ៊ុយក្រែន។
ចុះផ្សាយនៅថ្ងៃ៖
ស្តាប់ - ០៣:០៨
អង្គការFAO បានតាមដានជាប្រចាំ នូវការឡើងចុះនៃតម្លៃទំនិញចំណីអាហារ នៅទូទាំងពិភពលោក។ យោងតាមតួលេខប្រមូលបាន តម្លៃទំនិញចំណីអាហារ បានធ្លាក់ចុះចំនួន ១៣,៧%ជាមធ្យមក្នុងឆ្នាំ២០២៣។ ជាក់ស្តែង តម្លៃគ្រាប់ធញ្ញជាតិ ដូចជាស្រូវសាឡីជាដើម គឺបានធ្លាក់ចុះចំនួន ១៥,៤% បើប្រៀបធៀបទៅឆ្នាំ២០២២។ យោងតាមអង្គការ FAO ការធ្លាក់ចុះថ្លៃបន្តិចនេះ បានបង្ហាញថាស្តុកវត្ថុធាតុដើមចំណីអាហារ គឺមានគ្រប់គ្រាន់វិញហើយ។
គួររំលឹកថា ឆ្នាំ២០២២ ទំនិញគ្រប់មុខជាពិសេសចំណីអាហារ បានហក់ឡើងថ្លៃខ្លាំងបំផុត បន្ទាប់ពីសង្គ្រាមនៅអ៊ុយក្រែន បានផ្ទុះឡើង។ តម្លៃទំនិញខ្លះ ដូចជាគ្រាប់ធញ្ញជាតិ និង ប្រេងឆាជាដើម បានឡើងថ្លៃស្រឺតៗ បន្ទាប់ពីអ៊ុយក្រែន ត្រូវរុស្ស៊ីលើកទ័ពចូលមកឈ្លានពាន។ អ៊ុយក្រែន គឺជាប្រទេសផលិតនាំចេញ ប្រេងឆាគ្រាប់ផ្កាឈូករត្នន៍ ធំជាងគេបង្អស់ និងជាប្រទេសធំលំដាប់ទី៤ នាំចេញគ្រាប់ពោតនិងគ្រាប់ស្រូវសាឡី។
ផ្អែកតាមអង្គការ FAO ក្នុងឆ្នាំ២០២៣ មានកត្តាជាច្រើន ដែលបានធ្វើឲ្យស្តុកវត្ថុធាតុដើមចំណីអាហារ បានឡើងពេញវិញ។ អ៊ុយក្រែនបានព្យាយាមនាំចេញបានខ្លះ ទោះបីក្នុងទំហំមួយតិចជាងកាលពីមុនសង្គ្រាម។ មួយវិញទៀត គឺរុស្ស៊ីបានសំរុកនាំចេញខ្លាំង ក្នុងតម្លៃថោក ដើម្បីដណ្តើមទីផ្សារពីអ៊ុយក្រែន។ ចំណែកអូស្ត្រាលីក៏បាននាំចេញគ្រាប់ធញ្ញជាតិច្រើនដែរក្នុងឆ្នាំកន្លងទៅ។ បន្ថែមពីនេះ ទិន្នផលដំណាំពោត និងសណ្តែកសៀងនៅប្រេស៊ីល ក្នុងឆ្នាំ២០២៣ គឺបានកើនឡើងខ្ពស់គួរឲ្យកត់សំគាល់។
ដោយឡែក តម្លៃអង្ករវិញ នៅក្នុងឆ្នាំ២០២៣ បានឡើងថ្លៃចំនួន ២១%។ ផ្អែកតាមការពន្យល់របស់អ្នកជំនាញ តម្លៃអង្ករឡើងថ្លៃ គឺដោយសារតែមានការព្រួយបារម្ភ ទាក់ទិននឹងបាតុភូតEl Ninõ ដែលអាចធ្វើឲ្យប៉ះពាល់ដល់ដំណាំស្រូវ និងកត្តាមួយទៀត គឺដោយសារតែឥណ្ឌាបានប្រកាសកាត់បន្ថយទំហំអង្ករនាំចេញ។
ក្នុងចំណោមទំនិញចំណីអាហារដែលបានចុះថ្លែខ្លាំងបំផុត ក្នុងឆ្នាំ២០២៣ គឺមានប្រេងធញ្ញជាតិ ដែលបានចុះថ្លៃចំនួន៣២,៧% ជាមធ្យម។ ប្រេងសណ្តែក បានចុះថ្លៃខ្លាំង ដោយសារវិស័យផលិតប្រេងម៉ាស៊ីនដោយប្រើប្រេងធញ្ជាតិ បានចុះខ្សោយ និងដោយសារទិន្នផលល្អ នៃសណ្តែកសៀងនៅប្រេស៊ីល។ ដោយឡែក ស្ករសវិញ មិនបានចុះថ្លៃទេ គឺបានឡើងថ្លៃចំនួន ២៦,៧% មុននឹងចាប់ផ្តើមចុះថ្លៃប្រមាណ១៦,៦%វិញ នៅខែធ្នូ។
ចំណែកផលិតផលធ្វើពីទឹកដោះគោវិញ បានចុះថ្លៃជាមធ្យម ២៣,៦% មុននឹងឡើងបន្តិចបន្តួចនៅខែធ្នូ ខ្ទង់១,៦%។ ផលិតផលសាច់សត្វ ដូចជាសាច់គោ សាច់មាន់ បានធ្លាក់ថ្លៃបន្តិចបន្តួច ពោលគឺ ៣,៥% ក្នុងឆ្នាំ២០២៣។ ចិនដែលជាអ្នកនាំចូលទំនិញសាច់សត្វ ច្រើនជាគេ បានកាត់បន្ថយការនាំចូល ដោយសារតែជីវភាពសេដ្ឋកិច្ចប្រជាជនចិន ជួបការលំបាក។ ដោយឡែក ប្រជាជនចិនភាគច្រើន បានងាកទៅបរិភាគសាច់ជ្រូកវិញ ដែលធ្វើឲ្យតម្លៃសាច់ជ្រូកឡើងថ្លៃបន្តិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ