កូរ៉េខាងជើងបាញ់មីស៊ីលបណ្តែតជាច្រើនទៅក្នុងសមុទ្រលឿង
ស្ថានភាពតានតឹងនៅឧបទ្វីបកូរ៉េពុំស្គាល់ភាពស្រាកស្រាន្តទេ។ នៅថ្ងៃពុធទី ២៤មករានេះ កូរ៉េខាងជើងបានបាញ់មីស៊ីលបណ្តែតជាច្រើនគ្រាប់សំដៅសមុទ្រលឿង។ នេះបើតាមសេចក្តីជូនដំណឹងរបស់កូរ៉េខាងត្បូង។
ចុះផ្សាយនៅថ្ងៃ៖
ស្តាប់ - ០២:៣១
នៅក្នុងសេចក្តីថ្លែងការណ៍របស់អគ្គទីបញ្ជាការដ្ឋានអន្តរយោធាកូរ៉េខាងត្បូង នៅវេលាម៉ោងប្រហែល៧ព្រឹកម៉ោងនៅក្នុងស្រុក យោធាកូរ៉េខាងត្បូងចាប់បានសញ្ញាបាញ់មីស៊ីលបណ្តែតជាច្រើនគ្រាប់ទៅកាន់សមុទ្ទលឿង។ ព័ត៌មានលម្អិតទាក់ទងនឹងលក្ខណៈពិសេសរបស់មីស៊ីលបណ្តែតនេះ នឹងវិភាគដោយភ្នាក់ងារចារកិច្ចកូរ៉េខាងត្បូងនិងអាមេរិក។ នេះបើតាមសេចក្តីថ្លែងការណ៍ដដែល។
ការបាញ់សាកល្បងមីស៊ីលបណ្តែតរបស់កូរ៉េខាងជើងទៅក្នុងអាកាសមិនរំលោភទណ្ឌកម្មរបស់អង្គការសហប្រជាជាតិដូចការសាកល្បងមីស៊ីលបាលីស្ទិកដែលអាចពាំក្បាលនុយក្លេអ៊ែរទេ ប៉ុន្តែការបាញ់នេះប្រព្រឹត្តទៅជួនចំពេលដែលកូរ៉េខាងត្បូងកំពុងធ្វើលំហាត់សឹករហូតដល់ថ្ងៃព្រហស្បតិ៍ទី២៥មករា អំពីរបៀបដែលកងកម្លាំងពិសេសលួចជ្រៀតចូលតាមឆ្នេរខាងកើតនៅពេលមានបញ្ហាសន្តិសុខធ្ងន់ធ្ងរជាមួយកូរ៉េខាងជើង។ ជាបេសកកម្មជ្រៀតចូលយ៉ាងជ្រៅក្នុងដែនដីសត្រូវ រួចកម្ទេចកម្លាំងសត្រូវទាំងស្រុង ក្នុងគ្រប់ស្ថានភាពណា។ នេះបើតាមការលម្អិតរបស់យោធាជើងទឹកកូរ៉េខាងត្បូង។
ម្យ៉ាងវិញទៀត ស្ថានភាពតានតឹងរវាងកូរ៉េទាំងពីរបានធ្លាក់ដុនដាបយ៉ាងខ្លាំងមិនធ្លាប់មានទេ នារយៈពេលប៉ុន្មានខែចុងក្រោយមកនេះ។ បងប្អូនបង្កើតជាគូសត្រូវនឹងគ្នាបានព្យួរកិច្ចសហប្រតិបត្តិការយោធាបញ្ចៀសការប៉ះទង្គិចជាយថាហេតុចុះហត្ថលេខាកាលពីឆ្នាំ២០១៨ ហើយបានពង្រឹងមធ្យោបាយយោធានៅតាមព្រំដែនរៀងៗខ្លួន និងបង្កើនលំហាត់សឹកដោយបាញ់គ្រាប់ពិតនៅជិតព្រំប្រទល់គ្នាទេ។
ក្រៅពីប្រកាសពន្លឿនលក្ខណៈត្រៀមធ្វើសង្គ្រាម បង្កើនការបាញ់សាកល្បងមីស៊ីលអ៊ីពែរសូនិក ប្រព័ន្ធនុយក្លេអ៊ែរមុជទឹក ... កាលពីសប្តាហ៍មុន មេដឹកនាំគីមជុងអ៊ុន បានប្រកាសចាត់ទុកកូរ៉េខាងត្បូងជាសត្រូវ រំលាយភ្នាក់ងារអន្តររដ្ឋាភិបាលទទួលបន្ទុកបង្រួបបង្រួមនិងទំនាក់ទំនងជាមួយកូរ៉េខាងត្បូង និងបានគំរាមបំផ្ទុះសង្គ្រាមតែម្តងបើអ្នកជិតខាងហ៊ានរំលោភដែនដីខ្លួនតែមួយមីល្លីម៉ែត្រ។ ខាងត្បូងក៏ដំឡើងសំឡេងដូចគ្នា។ ប្រធានាធិបតីកូរ៉េខាងត្បូងដែលជាអ្នកអភិរក្សនិយម យូន ស៊ុកយោល បានព្រមានថាសេអ៊ូលនឹងតបតវិញដោយកម្លាំងខ្លាំងក្លាជាងសត្រូវរាប់រយដងប្រសិនបើព្យុងយ៉ាងហ៊ានបង្កហេតុមែន។ សម្រាប់អាមេរិកនិងកូរ៉េខាងត្បូង រាល់ការថ្លោះថ្លោយវាយប្រហាររបស់កូរ៉េខាងជើង នឹងបានទទួលវិញនូវការកម្ទេចបញ្ចប់របបព្យុងយ៉ាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ