អ្នកជំនាញ៖កូរ៉េខាងជើងបាញ់សាកល្បងមីស៊ីលបណ្តែត មុនលក់ឲ្យរុស្ស៊ីធ្វើសង្រ្គាមនៅអ៊ុយក្រែន
នៅថ្ងៃអង្គារទី ៣០មករានេះ អគ្គទីបញ្ជាការដ្ឋានអន្តរយោធាកូរ៉េខាងត្បូងអះអាងថា គេចាប់បានសញ្ញាបាញ់សាកល្បងមីស៊ីលបណ្តែតរបស់កូរ៉េខាងជើងសាជាថ្មី នៅសមុទ្រកូរ៉េខាងកើត។ ទីភ្នាក់ងារព័ត៌មានរដ្ឋកូរ៉េខាងជើងKCNA ទើបចុះផ្សាយកាលពីថ្ងៃចន្ទម្សិលមិញថា មេដឹកនាំកូរ៉េខាងជើងលោក គីម ជុងអ៊ុនតាមដានផ្ទាល់ ការសាកល្បងមីស៊ីលបណ្តែតបាញ់ចេញពីនាវាមុជទឹក នៅថ្ងៃអាទិត្យទី២៨មករា។ អ្នកជំនាញប្រចាំវិទ្យាសា្ថនសម្រាប់ការសិក្សាកូរ៉េខាងជើង ដោយបង្កើនបាញ់សាកល្បងមីស៊ីលបណ្តែត ព្យុងយ៉ាងទំនងដៅបង្កើនការផលិតលក់មីស៊ីលបណ្តែតទៅឲ្យរុស្ស៊ី ធ្វើសង្រ្គាមនៅអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣១
ក្នុងរយៈពេលតែ១សប្តាហ៍ កូរ៉េខាងជើងបាញ់សាកល្បងមីស៊ីលបណ្តែត ដល់ទៅ៣ដង នៅសមុទ្រខាងលិចរបស់ខ្លួន។ នៅក្នុងសេចក្តីថ្លែងការណ៍ ចុះផ្សាយនៅថ្ងៃអង្គារ ទី ៣០មករា អគ្គទីបញ្ជាការដ្ឋានអន្តរយោធាកូរ៉េខាងត្បូងអះអាងថា គេចាប់បានសញ្ញាបាញ់មីស៊ីលបណ្តែតសាជាថ្មី នៅវេលាម៉ោង ៧ព្រឹក ម៉ោងនៅសេអ៊ូល។
តាមអគ្គទីបញ្ជាការដ្ឋានកូរ៉េខាងត្បូង ទីភ្នាក់ងារស៊ើបការណ៍សម្ងាត់កូរ៉េខាងត្បូង និងអាមេរិក កំពុងតាមដានវិភាគសកម្មភាពរបស់កូរ៉េខាងជើងយ៉ាងកៀកកិតបំផុត។
កូរ៉េខាងជើងបាញ់សាកល្បងមីស៊ីលបណ្តែត គឺរំលងតែមួយថ្ងៃប៉ុណ្ណោះ បន្ទាប់ពី ទីភ្នាក់ងារព័ត៌មានរដ្ឋកូរ៉េខាងជើង KCNA ចុះផ្សាយថា នៅថ្ងៃអាទិត្យទី ២៨មករា កូរ៉េខាងជើង សាកល្បងមីស៊ីលបណ្តែត បាញ់ចេញពីនាវាមុជទឹក នៅក្រោមការតាមដានមើលផ្ទាល់របស់មេដឹកនាំកូរ៉េខាងជើង លោកគីម ជុងអ៊ុន។
កូរ៉េខាងជើងធ្លាប់បានប្រកាសរួចហើយថា នៅឆ្នាំ ២០២៤នេះ កូរ៉េខាងជើងនឹងសាកល្បងសព្វាវុធទំនើបៗ សេរីថ្មី ចុងក្រោយរបស់ខ្លួន។ ជាក់ស្តែង ព្យុងយ៉ាង ទើបសាកល្បងប្រព័ន្ធអាវុធនុយក្លេអ៊ែរ ក្រោមទឹក ដែលមានបេសកកម្មបង្កើតរលកយក្សស៊ូណាមី ជន់លិចមូលដ្ឋានទ័ពរបស់សត្រូវ។ បន្ទាប់មកទៀត កូរ៉េខាងជើងបាញ់សាកល្បងមីស៊ីលបាលីស្ទិក អ៊ីពែសូនិក ដើរដោយចំហេះរឹង ដែលជាបច្ចេកវិទ្យាទំនើបចុងក្រោយដើម្បីសម្រួលដល់ការផ្លាស់ទីតាំងបាញ់មីស៊ីល មិនឲ្យសត្រូវងាយចាប់សញ្ញាបាន។ តាំងពីថ្ងៃពុធ ទី ២៤ រហូតដល់ថ្ងៃអង្គារនេះ ព្យុងយ៉ាងសាកល្បង ដល់ទៅ៣លើក មីស៊ីលបណ្តែតរបស់ខ្លួន ដែលនៅក្នុងនោះ មួយលើក មីស៊ីលបណ្តែតត្រូវបាញ់ចេញពីនាវាមុជទឹក។
ផ្ទុយពីមីស៊ីលបាលីស្ទិកដែលត្រូវអង្គការសហប្រជាជាតិ ហាមមិនឲ្យសាកល្បង ព្រោះវាមានសមត្ថភាពបាញ់ទៅឆ្ងាយ និងអាចពាំនាំក្បាលគ្រាប់នុយក្លេអ៊ែរ មីស៊ីលបណ្តែតមិនជាប់ក្នុងបម្រាមរបស់អង្គការសហប្រជាជាតិ។
ប៉ុន្តែ មីស៊ីលប្រភេទនេះ ដែលអាចបាញ់ចេញយន្តហោះ ឬនាវាមុជទឹក អាចហោះបណ្តែតខ្លួនក្នុងកំពស់ទាប ពិបាកនឹងធ្វើឲ្យរ៉ាដា អាចចាប់សញ្ញាបាន បើប្រៀបធៀបនឹងមីស៊ីលបាលីស្ទិក។ នៅសប្តាហ៍មុននេះ កូរ៉េខាងជើងអះអាងថា ខ្លួនបានបាញ់សាកល្បងមីស៊ីលបណ្តែតទំនើបសេរីចុងក្រោយបំផុត។
សម្រាប់អ្នកជំនាញ ប្រចាំវិទ្យាស្ថានដើម្បីការសិក្សាកូរ៉េខាងជើង ដោយបង្កើនការបាញ់សាកល្បងមីស៊ីលបណ្តែត ម្តងហើយ ម្តងទៀត យ៉ាងដូច្នេះ កូរ៉េខាងជើងទំនងសម្រួចសម្រាំងមីស៊ីលបណ្តែតសម្រាប់លក់ឲ្យរុស្ស៊ី។ លោកAhn Chan-ilដែលធ្លាប់រត់គេចចេញពីកូរ៉េខាងជើង និងបានក្លាយជាអ្នកស្រាវជ្រាវនៅវិទ្យាស្ថានខាងលើ និយាយថា លោកជឿថា កូរ៉េខាងជើងបានទទួលការបញ្ជាទិញមីស៊ីលបណ្តែតពីរុស្ស៊ី។ ដូច្នេះ កូរ៉េខាងជើងចាំបាច់ត្រូវសាកល្បង មីស៊ីលប្រភេទនេះ ឲ្យបានយ៉ាងតិច ៥ដង មុននឹងយកទៅប្រើនៅក្នុងសមរភូមិ។
អាមេរិក និងកូរ៉េខាងត្បូងធ្លាប់ចោទប្រកាន់កូរ៉េខាងជើងថា បានផ្គត់ផ្គង់លក់អាវុធទៅឲ្យរុស្ស៊ី សម្រាប់ធ្វើសង្រ្គាមនៅអ៊ុយក្រែន។
ម្យ៉ាង ដោយសាកល្បងមីស៊ីលជាញឹកញាប់ នៅសមុទ្រកូរ៉េ ព្យុងយ៉ាងកំពុងអុកឡុក បង្វែងដានរបស់ប្រព័ន្ធស៊ើបការណ៍របស់កូរ៉េខាងត្បូង និងអាមេរិក។ នៅខែ ធ្នូកន្លងទៅ ទីភ្នាក់ងារស៊ើបការណ៍សម្ងាត់របស់កូរ៉េខាងត្បូងធ្លាប់ចេញសេចក្តីថ្លែងការណ៍ព្រមានថា នៅឆ្នាំ ២០២៤នេះ កូរ៉េខាងជើងនឹងបង្កើតសកម្មភាពយោធា និងវាយប្រហារព័ត៌មានវិទ្យា ក្នុងគោលដៅ វាយប្រហារ រំខានយុទ្ធនាការការបោះឆ្នោត នៅអាមេរិក និងនៅកូរ៉េខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ