អនុរដ្ឋមន្ត្រីការបរទេសចិនទៅព្យុងយ៉ាង ក្នុងពេលកូរ៉េខាងជើងបង្កើនការគំរាមកំហែងសេអ៊ូល
លោក ស៊ុន វៃទុង (Sun Weidong) អនុរដ្ឋមន្ត្រីក្រសួងការបរទេសចិន បានទៅដល់និងជួបពិភាក្សាជាមួយសមភាគីកូរ៉េខាងជើង នៅទីក្រុងព្យុងយ៉ាង នាថ្ងៃសុក្រម្សិលមិញ។ នេះបើតាមសេចក្តីផ្សព្វផ្សាយរបស់ទីភ្នាក់ងារសារព័ត៌មានផ្លូវការកូរ៉េខាងជើង KCNA នៅថ្ងៃសៅរ៍ទី២៧មករា២០២៤។
ចុះផ្សាយនៅថ្ងៃ៖
ស្តាប់ - ០២:១៣
បើតាមរបាយការណ៍ដ៏ខ្លីចុះផ្សាយក្នុងទំព័រសារព័ត៌មានផ្លូវការកូរ៉េខាងជើង ប្រតិភូនៃ ក្រសួងការបទេសចិន ដឹកនាំដោយសមមិត្ត ស៊ុងវៃទុង អនុរដ្ឋមន្ត្រីការបរទេស បានមកដល់ក្រុងព្យុងយ៉ាងកាលពីថ្ងៃទី២៥មករា និងបានជួបពិភាក្សាជាមួយសមភាគីកូរ៉េខាងជើងដឹកនាំដោយសមមិត្ត ប៉ាក់ ម្ញ៉ុងហូ នៅវិមានប្រជាជន។ រដ្ឋមន្ត្រីក្រសួងការបរទេសលោកស្រី ចយសុងហ៊ី ក៏មានវត្តមាននាឱកាសនោះដែរ។ នេះបើតាមទីភ្នាក់ងារសារព័ត៌មានផ្លូវការកូរ៉េខាងជើងដដែលដោយលម្អិតទៀតថា ភាគីទាំងពីរបានព្រមព្រៀងបន្តពង្រឹងកិច្ចសហប្រតិបត្តិការតាកទិកនិងទៅតាមល្បឿនរៀងៗខ្លួន ក្នុងបុព្វហេតុការពារផលប្រយោជន៍ជាមូលដ្ឋានគ្រឹះរួម។
កាលពីខែមករា មេដឹកនាំកូរ៉េខាងជើងលោក គីម ជុងអ៊ុន បានប្រកាសថា ព្យុងយ៉ាងនិងប៉េកាំង សម្រេចយក២០២៤ ជាឆ្នាំមិត្តភាពរវាងកូរ៉េខាងជើងនិងចិន ដោយប្រទេសទាំងពីរនឹងពន្លឿនការផ្តោះប្តូរ និងទស្សនកិច្ច ក្នុងគ្រប់វិស័យរាប់ទាំងផ្នែកនយោបាយ សេដ្ឋកិច្ច និងវប្បធម៌ ឱ្យបានស្វាហាប់បំផុត។ ផ្ទុយនឹងសារបើកទំព័រប្រវត្តិសាស្ត្រថ្មីនៃទំនាក់ទំនងប្រទេសទាំងពីរ កូរ៉េខាងជើងបានចាត់ទុកកូរ៉េខាងត្បូងជាសត្រូវ។
ទស្សនកិច្ចរបស់អនុរដ្ឋមន្ត្រីចិននៅព្យុងយ៉ាងនេះ ប្រព្រឹត្តទៅក្នុងខណៈដែលព្យុងយ៉ាងបង្កើនការគំរាមកំហែងបំផ្ទុះសង្គ្រាមកាន់តែខ្លាំងឡើងៗប្រឆាំងនឹងសេអ៊ូលនិងវ៉ាស៊ីនតោន និងតែប៉ុន្មានថ្ងៃក្រោយពីរដ្ឋមន្ត្រីការបរទេសកូរ៉េខាងជើងធ្វើដំណើរទៅជួបលោកប្រធានាធិបតីពូទីន នៅទីក្រុងមូស្គូ ប្រទេសរុស្ស៊ី សម្ព័ន្ធមិត្តដ៏យូរអង្វែងមួយទៀតរបស់កូរ៉េខាងជើង។ តាំងពីផ្ទុះសង្គ្រាមនៅអ៊ុយក្រែនមក រុស្ស៊ីនិងកូរ៉េខាងជើងបានបង្កើនទំនាក់ទំនងយោធាកាន់តែស្អិតល្មួត តែជាសម្ព័ន្ធភាពយោធាដ៏គ្រោះថ្នាក់សម្រាប់ក្រសែភ្នែកសហរដ្ឋអាមេរិកដែលអំពាវនាវឱ្យចិនជួយទប់មហិច្ឆតារបស់ព្យុងយ៉ាង។
ក្នុងពេលដែលលោកស៊ុន វៃទុង កំពុងស្ថិតនៅក្រុងព្យុងយ៉ាងនេះ ទីប្រឹក្សាសន្តិសុខជាតិអាមេរិក លោក ជេក ស៊ូលីវ៉ាន់ កំពុងជួបពិភាក្សាជាមួយរដ្ឋមន្ត្រីការបរទេសចិន លោកវ៉ាង យី នៅប្រទេសថៃ ដើម្បីសម្របសម្រួលទំនាក់ទំនងទ្វេភាគីអាមេរិកចិនឱ្យបានប្រសើរឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ