ប៉ាគីស្ថានរៀបចំការបោះឆ្នោត ក្រោមខ្សែញាក់របស់ពួកកងទ័ព
ប៉ាគីស្ថានរៀបចំការបោះឆ្នោតសភា នៅក្នុងបរិយាកាសដ៏អាប់អួរដោយសារ អំពើហិង្សា ភេរវកម្មសម្លាប់មនុស្ស និងភាពវឹកវរនយោបាយ ដែលនៅក្នុងនោះ មេដឹកនាំបក្សប្រឆាំង ដែលជាអតីតនាយករដ្ឋមន្រ្តី ដ៏មានប្រជាប្រិយភាព ត្រូវចាប់ដាក់ពន្ធនាគារ មិនឲ្យចូលរួមនៅក្នុងការបោះឆ្នោត។ ប្រឈមនឹងការគំរាមកំហែងសន្តិសុខ ប៉ាគីស្ថានពង្រាយកម្លាំងប្រដាប់អាវុធ ជាង៦សែននាក់ ដើម្បីរក្សាសន្តិសុខ នៅតាមការិយាល័យបោះឆ្នោត។ ក្រសួងមហាផ្ទៃវិញ ប្រកាសផ្អាកបណ្តោះអាសន្ន បណ្តាញទូរស័ព្ទ នៅទូទាំងប្រទេស នៅក្នុងហេតុផលសន្តិសុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:២២
នៅប៉ាគីស្ថាន ការិយាល័យបោះឆ្នោតចាប់ផ្តើមដំណើរការបានតែបន្តិច ក្រសួងមហាផ្ទៃចេញមកប្រកាសផ្អាកជាបណ្តោះអាសន្ន បណ្តាញទូរស័ព្ទឆ្លើយឆ្លងនៅទូទាំងប្រទេស នៅក្នុងហេតុផលសន្តិសុខ។ តាមNetblocks ដែលជាស្ថាប័នគ្រប់គ្រងអ៊ីនធ័រនែត និងសន្តិសុខព័ត៌មាន នៅប៉ាគីស្ថាន បណ្តាញអ៊ីនធ័រនែតនៅក្នុងទូរស័ព្ទដៃក៏រអាក់រអួលដែរ។ ប្រធានNetblocks លោកAlp Toker បានបរិហារការកាត់ផ្តាច់អ៊ីនធ័រនែតថា ជាការអនុវត្តប្រឆាំងលទ្ធិប្រជាធិបតេយ្យ។
ក្រៅពីផ្អាកបណ្តាញទូរស័ព្ទ ប៉ាគីស្ថាន ដែលកំពុងប្រឈមនឹងអំពើហិង្សា ការវាយប្រហារភេរវកម្ម បន្តបន្ទាប់គ្នា បានពង្រាយកងកម្លាំង ប៉ូលិស យោធាជាង ៦សែន ៥ម៉ឺននាក់ ដើម្បីធានាសន្តិសុខ នៅតាមការិយាល័យបោះឆ្នោត នៅទូទាំងប្រទេស។ នៅព្រឹកថ្ងៃបោះឆ្នោតនេះផ្ទាល់ ការបំផ្ទុះគ្រាប់បែក នៅការិយាល័យបោះឆ្នោតមួយកន្លែង ក្នុងខេត្តបាលូឈីស្ថានបានសម្លាប់កងរក្សាសន្តិសុខ២រូប។ គឺនៅក្នុងខេត្តនេះហើយ ដែលក្រុមជីហាតអង្គការរដ្ឋអ៊ីស្លាមប្រកាសចេញមុខថា ខ្លួនជាអ្នកដាក់បង្កប់ បំផ្ទុះគ្រាប់បែក នៅក្បែរគណបក្សនយោបាយ ដែលសម្លាប់មនុស្ស ២៨នាក់ កាលពីថ្ងៃពុធម្សិលមិញ។
នៅក្នុងហេតុផលការពារសន្តិសុខនៅក្នុងថ្ងៃបោះឆ្នោត ក្រសួងការបរទេសប៉ាគីស្ថានប្រកាសបិទព្រំដែនពេញមួយថ្ងៃ ជាមួយប្រទេសអាហ្វហ្កានីស្ថាន និងអ៊ីរ៉ង់។ គួរបញ្ជាក់ថា សន្តិសុខក្នុងប្រទេសប៉ាគីស្ថានបានធ្លាក់ចុះ កាន់តែអាក្រក់ ចាប់តាំងពីក្រុមតាលីបង់ត្រលប់ចូលកាន់អំណាច នៅអាហ្វហ្កានីស្ថាន នៅឆ្នាំ ២០២១។
ក្រៅពីបញ្ហាអសន្តិសុខ និងអំពើហិង្សា ប៉ាគីស្ថានកំពុងជួបភាពវឹកវរនយោបាយ គ្មានទីបញ្ចប់។ នៅក្នុងបោះឆ្នោត ដែលមានការចូលរួមគណបក្សនយោបាយចំនួន៤៤សម្រាប់អាសនៈចំនួន ៣៦៦នៅសភា ប្រជាជនប៉ាគីស្ថានប្រមាណ ៧០%បង្ហាញថា ពួកគេគ្មានទំនុកចិត្តលើការបោះឆ្នោត។ គ្មានការជឿជាក់លើការបោះឆ្នោត ព្រោះថា មេដឹកនាំបក្សប្រឆាំងដ៏មានប្រជាប្រិយភាព និងជាអតីតនាយករដ្ឋមន្រ្តី លោកអ៊ីមរ៉ាន់ ខាន់ ត្រូវចាប់ដាក់ឃុំ ចំណែក គណបក្សរបស់លោកហាមឲ្យមិនចូលរួមនៅក្នុងការបោះឆ្នោត។ អវត្តមានរបស់អតីតជើងឯកកីឡាCriket លោកអ៊ីមរ៉ាន់ ខាន់ នៅក្នុងការបោះឆ្នោត ដោយសារសំណុំរឿងក្តីក្តាំនៅតុលាការ ជាការបើកផ្លូវឲ្យគណបក្សរបស់អតីតនាយករដ្ឋមន្រ្តី លោកណាវ៉ា ស្ហារីហ្វ អាចឈ្នះឆ្នោត ចូលកាន់អំណាច នៅប៉ាគីស្ថាន។
សម្រាប់អ្នកជំនាញ អ្នកណាឈ្នះឆ្នោតលើកនេះ មិនសំខាន់ទេ។ អ្វីដែលសំខាន់គឺអាយុកាលដឹកនាំរដ្ឋាភិបាល ព្រោះថា ចាប់តាំងពីកងទ័ពបើកផ្លូវឲ្យមានរដ្ឋាភិបាលស៊ីវិល គ្មានរដ្ឋាភិបាលណាដែលអាចកាន់អំណាចរហូតដល់ចប់អាណត្តិរបស់ខ្លួនឡើយ។ ត្រូវដឹងថា ទោះកងទ័ពបើកភ្លើងខៀវ ឲ្យមានការបោះឆ្នោត បង្កើតរដ្ឋាភិបាលស៊ីវិល ប៉ុន្តែ អំណាចពិតប្រាកដ ស្ថិតក្នុងកណ្តាប់ដៃរបស់ពួកយោធា ដែលចង់រុញ លើកស្ទួយ គណបក្សណាដែលស្តាប់បង្គាប់របស់ខ្លួន។ ធ្លាប់ជាបុគ្គលដែលមានប្រជាប្រិយភាព លោកអតីតនាយករដ្ឋមន្រ្តីអ៊ីម រាន់ខាន់ធ្លាក់បុណ្យសក្តិ ជាប់ពន្ធនាគារនៅក្នុងសំណុំរឿងប្រព្រឹត្តអំពើពុករលួយ ក្បត់ជាតិ រំលោភច្បាប់អាពាហ៍ពិពាហ៍ ចំណែកគណបក្សរបស់លោកត្រូវហាមមិនឲ្យចូលរួមនៅក្នុងការបោះឆ្នោត ក៏ដោយសារតែ កាលនៅជានាយករដ្ឋមន្រ្តី លោកហ៊ានដំឡើងសំឡេងខ្លាំងៗ រិះគន់ពួកយោធា នៅក្នុងប្រតិបត្តិការបង្រ្កាបក្រុមបាតុករដែលប្រឆាំងពួកយោធា។
អតីតនាយករដ្ឋមន្រ្តី លោកណាវ៉ា ស្ហារីហ្វ ផ្ទាល់ដែលធ្លាប់និរទេសខ្លួនទៅនៅអង់គ្លេស អស់៤ឆ្នាំ ទំនងទទួលបានភ្លើងខៀវពីកងទ័ពប៉ាគីស្ថាន ទើបអាចត្រលប់មកចូលរួមនៅក្នុងការបោះឆ្នោតលើកនេះ។
ការស្ទង់មតិបង្ហាញដែរថា ដោយសារតែគ្មានគណបក្សប្រឆាំងរបស់លោកអ៊ីមរ៉ាន់ ខាន់ ចូលរួមនៅក្នុងបោះឆ្នោត គណបក្សសម្ព័ន្ធអ៊ីស្លាមប៉ាគីស្ថាន របស់លោកណាវ៉ា ស្ហារីហ្វ សង្ឃឹមច្រើនទទួលជ័យជំនះ ចូលកាន់អំណាច ជាលើកទី៤នៅប៉ាគីស្ថាន។
មានប្រជាជន២៤០លាននាក់ (ជាប់ចំណាតថ្នាក់ទី៥ក្នុងពិភពលោក) ប៉ាគីស្ថានដែលស្ថិតនៅលើទីតាំងដ៏យុទ្ធសាស្រ្ត ចន្លោះ ចិន ឥណ្ឌា អ៊ីរ៉ង់ និងអាហ្វហ្កានីស្ថានកំពុងជួបបញ្ហារាប់ជំពូក។ ក្រៅតែពីបញ្ហាអសន្តិសុខ អំពើហិង្សា ការគំរាមកំហែងភេរវកម្ម រដ្ឋាភិបាលថ្មី ដែលចេញពីការឈ្នះឆ្នោតលើកនេះ ត្រូវប្រឈមដោះស្រាយបញ្ហាធំបំផុត បញ្ហាសេដ្ឋកិច្ច អតិផរណាហក់ឡើងជិត៣០% ចំណែកលុយរូពីធ្លាក់ដាំក្បាលចុះលឿនស្លេវនៅ ៣ឆ្នាំចុងក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ