ឥណ្ឌាចុះកិច្ចព្រមព្រៀងពាណិជ្ជកម្ម តម្លៃ១០០ពាន់លានដុល្លារ ជាមួយប្រទេសទាំង៤នៃEFTA/AELE
ប្រទេសអឺរ៉ុបទាំង៤ ដែលជាសមាជិកនៃសមាគមដោះដូរពាណិជ្ជកម្មសេរីអឺរ៉ុប ហៅកាត់ថា EFTA បានចុះហត្ថលេខាជាមួយឥណ្ឌា នូវកិច្ចព្រមព្រៀងពាណិជ្ជកម្មមួយ ដែលមានតម្លៃទឹកប្រាក់ ចំនួន១០០ពាន់លានដុល្លារ។ តាមរយៈកិច្ចព្រមព្រៀងនេះ ស្វ៊ីស ន័រវែស លិកតិនស្តាញ និងអ៊ីស្លង់ អាចឈានជើងចូលក្នុងទីផ្សារឥណ្ឌា ដ៏មានសក្តានុពល។ ចំណែកឥណ្ឌាវិញ អាចនឹងទទួលបានការវិនិយោគធំៗ និងមានគុណភាពពីប្រទេសអឺរ៉ុបទាំង៤នេះ។
ចុះផ្សាយនៅថ្ងៃ៖
ស្តាប់ - ០២:២៥
ឥណ្ឌាចុះហត្ថលេខាលើកិច្ចព្រមព្រៀងសេដ្ឋកិច្ច-ពាណិជ្ជកម្ម ជាមួយសមាគមដោះដូរពាណិជ្ជកម្មសេរីអឺរ៉ុប ដែលមានសមាជិក៤ប្រទេស គឺ ស្វ៊ីស ន័រវែស លិកតិនស្តាញ និងអ៊ីស្លង់។ កម្មវិធីចុះហត្ថលេខា ត្រូវបានប្រព្រឹត្តិធ្វើទៅនៅទីក្រុងញូដេលី កាលពីថ្ងៃទី១០មីនា ជាមួយនឹងវត្តមានរដ្ឋមន្ត្រីសេដ្ឋកិច្ច ពាណិជ្ជកម្មនៃប្រទេសទាំង៤នេះ និងលោករដ្ឋមន្ត្រីក្រសួងពាណិជ្ជកម្មឥណ្ឌា Piyush Goyal។
លោក Piyush Goyal បានឲ្យដឹងថាកិច្ចព្រមព្រៀង មានតម្លៃទឹកប្រាក់ចំនួន ១០០ពាន់លានដុល្លារ ក្នុងរយៈពេល១៥ឆ្នាំនេះ គឺជាការបោះជំហានជាប្រវត្តិសាស្ត្ររបស់ឥណ្ឌា ដែលកំពុងតែមានសក្តានុពល ក្នុងនាមជាមហាអំណាចសេដ្ឋកិច្ចពិភពលោកលំដាប់ទី៥។ កិច្ចព្រមព្រៀងនេះ នឹងបើកផ្លូវឲ្យវឌ្ឍនភាពរួមគ្នា តាមរយៈការពង្រីកការនាំចេញនាំចូល ព្រមទាំងការវិនិយោគ បង្កើតការងារថ្មីៗ។
សូមបញ្ជាក់ថា កិច្ចព្រមព្រៀងនេះ គឺជាលទ្ធផលនៃការចរចាគ្នាអស់រយៈពេល១៦ឆ្នាំ រវាងភាគីឥណ្ឌា ជាមួយនឹងប្រទេសអឺរ៉ុបទាំង៤នៃសមាគម EFTA ។ ក្នុងលិខិតប្រកាសក្រោយពេលចុះហត្ថលេខា លោកនាយករដ្ឋមន្ត្រីណារិន្ទ្រ ម៉ូដី បានអបអរសាទរ ថាកិច្ចព្រមព្រៀងនេះ គឺជាសក្ខីភាពបញ្ជាក់អំពីការសន្យារួមគ្នា ដើម្បីធ្វើឲ្យ វិស័យពាណិជ្ជកម្មអន្តរជាតិ មានភាពបើកចំហ មានយុត្តិធម៌ និងមានសមភាព។
ចំណែក លោករដ្ឋមន្ត្រីសេដ្ឋកិច្ចស្វ៊ីស Guy Parmelin បានលើកឡើងថា កិច្ចព្រមព្រៀងនេះនឹងអនុញ្ញាតឲ្យភាគីទាំងអស់ អាចប្រើប្រាស់សក្តានុពលសេដ្ឋកិច្ចឲ្យកាន់តែប្រសើរ និងបង្កើតឱកាសថ្មីៗបន្ថែម សម្រាប់ឥណ្ឌានិងសម្រាប់ប្រទេសទាំង៤របស់ EFTA។ ប្រទេសអឺរ៉ុបទាំង៤ សមាជិករបស់ EFTA នឹងបោះជើងចូលទីផ្សារដែលពេញដោយសក្តានុពលរបស់ឥណ្ឌា ចំណែកឥណ្ឌាវិញ នឹងអាចទាក់ទាញការវិនិយោគ បង្កើតការងារថ្មីៗ ដែលពោរពេញដោយវិជ្ជាជីវៈនិងសមត្ថភាព។
គួររំលឹកដែរថា សមាគមដោះដូរពាណិជ្ជកម្មសេរីអឺរ៉ុប ហៅកាត់ថា EFTA/AELE ត្រូវបានបង្កើតឡើងនៅឆ្នាំ១៩៦០។ នៅឆ្នាំ២០២១ សម្ព័ន្ធភាពអឺរ៉ុបនេះ គឺជាអ្នកចរចាសេដ្ឋកិច្ច ធំជាងគេលំដាប់ទី១០ នៅក្នុងវិស័យទំនិញ និងធំជាងគេលំដាប់ទី៨ នៅក្នុងវិស័យសេវាកម្ម។ ចំណែកឥណ្ឌាវិញ ប៉ុន្មានឆ្នាំចុងក្រោយនេះ ឥណ្ឌាបានចុះកិច្ចព្រមព្រៀងពាណិជ្ជកម្មជាមួយប្រទេសមួយចំនួន ដូចជាជាមួយអូស្ត្រាលី អារ៉ាប៊ីសាអូឌីទ ហើយបច្ចុប្បន្នកំពុងចរចាជាមួយអង់គ្លេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ