ថៃ៖ គណៈកម្មាធិការរៀបចំការបោះឆ្នោត ស្នើសុំ តុលាការធម្មនុញ្ញ រំលាយគណបក្សប្រឆាំង
នៅរាជធានីបាំងកក ថ្ងៃអង្គារ ទី១២មីនា គណៈកម្មាធិការរៀបចំការបោះឆ្នោតថៃ បានប្រកាសពីការស្នើសុំ ក្រុមប្រឹក្សារដ្ឋធម្មនុញ្ញ ឲ្យរំលាយគណបក្សប្រឆាំង ។ ថ្នាក់ដឹកនាំគណបក្សប្រឆាំង កាវក្លៃ ដែលឈ្នះសំឡេងឆ្នោតច្រើនជាងគេកាលពីឆ្នាំទៅមិញ បានត្រូវរងការចោទប្រកាន់និងបណ្តឹងជាច្រើនដែរ ព្រោះតែទំនោរនយោបាយកែទម្រង់ស្ថាប័នព្រះមហាក្សត្រ និងចង់កែប្រែច្បាប់ជេរប្រមាថព្រះមហាក្សត្រ។ ការរិះគន់ប្រមាថព្រះជេស្ដាព្រះរាជា ក្នុងយុទ្ធនាការឃោសនាបោះឆ្នោត ជាមូលហេតុចម្បងមួយ ដែល គណៈកម្មាធិការរៀបចំការបោះឆ្នោតថៃ យកទៅធ្វើជាហេតុសំអាង ដើម្បីស្នើសុំរំលាយបក្សប្រឆាំងដ៏លេចធ្លោនៅថៃ។
ចុះផ្សាយនៅថ្ងៃ៖
ស្តាប់ - ០២:៥៩
ប្រមុខមេប្រឆាំងដ៏មានប្រជាប្រិយភាព លោក ភិថា លីមចៈរើនរ៉ាត់ និង គណបក្សកាវក្លៃរបស់លោក បានជាប់ពាក្យបណ្តឹង និងការស៊ើបអង្កេតជាច្រើនករណី ចាប់តាំងពីរូបលោកនិងគណបក្សនេះ ឈ្នះសំឡេងឆ្នោត បានច្រើនជាង ក្នុងការបោះឆ្នោតសភា កាលពីខែឧសភា ឆ្នាំទៅមិញ។ ក្នុងសវនាការចុងក្រោយ ចុងខែមករា តុលាការធម្មនុញ្ញ បានសម្រេចបើកផ្លូវឲ្យលោក ភិថា លីមចៈរើនរ៉ាត់ អាចមានសិទ្ធិចូលរដ្ឋសភាវិញក៏ពិតមែន។ ក៏ប៉ុន្តែ ក្រុមប្រឹក្សារដ្ឋធម្មនុញ្ញ បានសម្តែងសេចក្តីយល់ឃើញថា ចេតនានយោបាយរបស់លោកនិងបក្សកាវក្លៃ ក្នុងការកែទម្រង់ច្បាប់ស្តីពីការប្រមាថព្រះមហាក្សត្រ គឺស្មើនឹងចេតនាចង់ផ្តួលរំលំស្ថាប័នព្រះមហាក្សត្រ។ អាស្រ័យហេតុនេះហើយ ក្រុមប្រឹក្សារដ្ឋធម្មនុញ្ញ បានបញ្ជាឲ្យ អ្នកនយោបាយរូបនេះ ដកគម្រោងផែនការកែប្រែច្បាប់ប្រមាថព្រះមហាក្សត្រ ចេញពីកម្មវិធីនយោបាយរបស់បក្ស។
ក្រោយពីការសម្រេចដូច្នេះ ស្អែកឡើង មានបណ្តឹងចំនួន២ថែមទៀត ប្តឹងទៅ គណៈកម្មាធិការរៀបចំការបោះឆ្នោតថៃ ដើម្បីស្នើសុំរំលាយបក្សកាវក្លៃតែម្តង។ តាមសេចក្តីប្រកាសព័ត៌មាន នៅថ្ងៃអង្គារ ទី១២ មីនា គណៈកម្មាធិការរៀបចំការបោះឆ្នោតថៃ បញ្ជាក់ថាបានសិក្សាពិចារណចំពោះបណ្តឹងទាំងនេះ ហើយនិងបានសម្រេចយល់ព្រមគ្នាជាឯកច្ឆន្ទៈ ដាក់សំណើទៅ តុលាការធម្មនុញ្ញ ដើម្បីរំលាយបក្សកាវក្លៃ។
លោក Parit Wacharasindhu អ្នកនាំពាក្យបក្សគណបក្សកាវក្លៃ បានប្រតិកម្មប្រាប់អ្នកកាសែត នៅបាំងកក ថា អ្វីដែលកើតឡើងថ្ងៃនេះ យើងមិនបាន មិនចង់ឃើញទេ ក៏ប៉ុន្តែ វាក៏មិនមែនជារឿងចម្លែកភ្ញាក់ផ្អើលដែរ។ ទោះជាម្តេចក្តី ខណៈនេះ គ្មាននរណាអាចសន្និដ្ឋានថា បក្សកាវក្លៃត្រូវរំលាយចោលដែរ ល្គឹកណា នៅមិនទាន់មានសាលក្រមសម្រេច នៅឡើយ។
គួររំឭកថា តុលាការធម្មនុញ្ញថៃ ធ្លាប់បានសម្រេចរំលាយគណបក្សប្រឆាំងដែលនិយមរិះគន់ស្ថាប័នព្រះរាជា និងប្រមូលយុវជនធ្វើបាតុកម្មប្រឆាំងស្តេច គឺបក្ស Future Forward របស់លោក ថាណាថន កាលពីឆ្នាំ២០២០។ តុលាការក៏បានកាត់ទោសដកហូតសិទ្ធិធ្វើនយោយរបស់ប្រមុខចលនាប្រឆាំង លោក ថាណាថន មិនឱ្យធ្វើនយោបាយ ១ ទសវត្សរ៍។
នៅស្រុកថៃ អ្នកវិភាគជំនាញកិច្ចការនយោបាយ និង ក្រុមអង្គការសង្គមស៊ីវិលការពារសិទ្ធិមនុស្ស បានមូលមាត់និយាយដូចគ្នាថា ច្បាប់ជេរប្រមាថព្រះមហាក្សត្រ ត្រូវ ក្រុមអ្នកកាន់អំណាច ប្រើប្រាស់ជាឧបករណ៍នយោបាយ ដើម្បីបំបិទសំឡេងប្រឆាំង។ បទល្មើសប្រមាថព្រះជេស្តាព្រះរាជា គ្រាន់តែ១ករណី អាចត្រូវផ្តន្ទាទោស រហូតដល់ ១៥ ឆ្នាំ។ កាលពីពាក់កណ្តាលខែមករា កន្លងទៅនេះ សកម្មជនប្រឆាំងម្នាក់ ត្រូវតុលាការថៃកាត់ទោសឲ្យជាប់ពន្ធនាគារ ៥០ ឆ្នាំ ព្រោះតែរូបគេបានប្រកាសផ្សាយយ៉ាងច្រើនសន្ធឹក តាមហ្វេសបុក នូវសារប្រមាថព្រះរាជា និងជេរព្រះរាជវង្សថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ