ចិនបន្តកំញើញតៃវ៉ាន់ដោយបញ្ជូនយន្តហោះចម្បាំង ៣៦ គ្រឿង ហោះក្បែរជុំវិញកោះតៃវ៉ាន់
ក្រសួងការពារជាតិតៃវ៉ាន់ បានប្រកាសនៅថ្ងៃសុក្រ ទី២២មីនា ថា គ្រាន់តែ២៤ម៉ោងចុងក្រោយ រដ្ឋអំណាចចិន បានបញ្ជូនយន្តហោះចម្បាំង ៣៦ គ្រឿង ហោះក្រវែលជុំវិញកោះតៃវ៉ាន់។ នេះជាការពង្រាយយន្តហោះយោធាច្រើនបំផុត នៅឆ្នាំ២០២៤។ អ្នកជំនាញកិច្ចការយោធា វិភាគមើលឃើញថា ចិនប៉េកាំងធ្វើបែបនេះ ជាការសម្តែងក្តីខឹងសម្បារចំពោះថ្នាក់ដឹកនាំតៃវ៉ាន់ ដែលកំពុងបំពេញទស្សនកិច្ចនៅអឺរ៉ុប ក្នុងវត្ថុបំណងអំពាវនាវរកការគាំទ្រឯករាជ្យតៃវ៉ាន់។
ចុះផ្សាយនៅថ្ងៃ៖
ស្តាប់ - ០២:២៨
យ៉ាងហោច យន្តហោះចម្បាំងចិន ៣៦ គ្រឿង ហោះមកក្រវែលជាច្រើនទិស ជុំវិញកោះតៃវ៉ាន់ នៅថ្ងៃល្ងាចព្រហស្បតិ៍ និងព្រឹកថ្ងៃសុក្រ។ មិនត្រឹមតែយន្តហោះយោធាមួយមុខទេ ក៏មានដែរ នាវាចម្បាំង ហើយនិងយន្តហោះដ្រូន ទៀតផង។ នេះបើតាមការអះអាងរបស់ ក្រសួងការពារជាតិតៃវ៉ាន់។
ភាពតានតឹងរវាង តៃវ៉ាន់ និង ចិន ចាប់កម្រើកកាន់តែឡើងខ្លាំង តាំងពីមុនអំលុងពេលបោះឆ្នោតប្រធានាធិបតីតៃវ៉ាន់ ក្នុងខែមករា ដើមឆ្នាំនេះ។ អនុប្រធានាធិបតី លោក ឡៃ ឈីង តឺ (Lai Ching-te) ឬលោក William Lai បានជាប់ឆ្នោត ក្លាយជាប្រធានាធិបតី តំណាងមកពី បក្សប្រជាធិបតេយ្យចម្រើននិយម។ ថ្នាក់ដឹកនាំរូបនេះ នឹងចូលកាន់តំណែងជាផ្លូវការ នៅខែឧសភាខាងមុខ ដើម្បីបន្តតំណែងបន្ទាត់នយោបាយពីលោកស្រីប្រធានាធិបតី សៃ អ៊ីងវេន។ នោះជាបន្ទាត់នយោបាយ មិនចុះញ៉មចំពោះមុខមហាអំណាចចិន។
ចំណែកអ្នកដឹកនាំអមប្រធានាធិបតីថ្មី គឺលោកស្រី ស្ហៅ ប៊ី-ឃីម (Hsiao Bi-khim) ដែលជាអតីតឯកអគ្គរដ្ឋទូតតៃវ៉ាន់ប្រចាំសហរដ្ឋអាមេរិក បានជាប់ឆ្នោតនៅខែមករា ក្លាយជា អនុប្រធានាធិបតីតៃវ៉ាន់។ ចាប់ពីឥឡូវនេះហើយ អនាគតអនុប្រធានាធិបតីតៃវ៉ាន់រូបនេះ ផ្តើមបំពេញសកម្មភាពនយោបាយតំណាងជាតិ។ ជាក់ស្តែង នៅពេលនេះ លោកស្រីអញ្ជើញបំពេញទស្សនកិច្ចនៅប្រទេសឆែក ហើយនិងនៅសភាសហភាពអឺរ៉ុប ក្នុងខេត្តស្ត្រាស់បួរ ប្រទេសបារាំង។ កម្មវត្ថុរបស់លោកស្រីនៅអឺរ៉ុប ត្រូវគេមើលឃើញថា គ្មានអ្វីក្រៅតែពីអំពាវនាវស្វែងរកការគាំទ្រជួយតៃវ៉ាន់។
អ្នកតំណាងរាស្ត្របារាំងប្រចាំសហភាពអឺរ៉ុប លោក ដូមីនីក រីគេ បានថ្លែងគាំទ្រថ្នាក់ដឹកនាំតៃវ៉ាន់និងបុព្វហេតុតៃវ៉ាន់ ដោយចាត់ទុកថា ការតស៊ូប្រយុទ្ធដើម្បីសេរីភាពប្រជាធិបតេយ្យដើរស្របផ្លូវគ្នាជាងពេលណាៗទាំងអស់ ហើយសូមឲ្យពលរដ្ឋតៃវ៉ាន់ ទុកចិត្តថា ប្រជាជនអឺរ៉ុប ជាមិត្តជិតដិត នឹងនៅក្បែរពួកគេជានិច្ច។
ផ្ទុយទៅវិញ ដំណើរទៅអឺរ៉ុបរបស់អនាគតអនុប្រធានាធិបតីតៃវ៉ាន់ ត្រូវរដ្ឋអំណាចចិន ចាត់ទុកថា បានដើរហួសបន្ទាត់ក្រហម។ ដូច្នេះ យន្តហោះចម្បាំងចិន ៣៦ គ្រឿង ដែលហោះក្បែរជុំវិញកោះតៃវ៉ាន់នៅគ្រានេះ ជាសម្តែងក្តីខឹងសម្បារផង និងព្រមានតៃវ៉ាន់ផង ពីសំណាក់រដ្ឋបាលចិនប៉េកាំង។ ចំពោះអ្នកជំនាញកិច្ចការយោធា, ទង្វើរបស់ចិន មិនត្រឹមតែកំហែងតៃវ៉ាន់ទេ តែក៏បង្ហាញសាច់ដុំព្រមានហ្វីលីពីនដែរ ព្រោះតែហ្វីលីពីនកាន់តែស្និទ្ធឡើងៗ នឹងសហរដ្ឋអាមេរិក ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ