សហរដ្ឋអាមេរិកដាក់ទណ្ឌកម្មថ្នាក់ដឹកនាំហុងកុងថែមទៀត ក្រោយពីហុងកុងអនុម័តច្បាប់សន្តិសុខជាតិ
រដ្ឋមន្ត្រីការបរទេសអាមេរិក លោក អង់តូនី ប្ល៊ីងកិន ប្រកាសពីថ្ងៃ២៩មីនាថា សហរដ្ឋអាមេរិកនឹងដាក់ទណ្ឌកម្មប្រឆាំងបុគ្គលបន្ថែមទៀតទៅលើថ្នាក់ដឹកនាំអាជ្ញាធរហុងកុង។ ទណ្ឌកម្មរបស់រដ្ឋបាលទីក្រុងវ៉ាស៊ីនតោន ជាថ្មីនេះ ធ្វើឡើងក្រោយពីសភាហុងកុង បានអនុម័តច្បាប់សន្តិសុខជាតិ។ ទន្ទឹមនឹងគ្នានេះ វិទ្យុអាស៊ីសេរីដែលទទួលថវិកាពីសភាអាមេរិក ក៏បានប្រកាសបិទការិយាល័យប្រចាំហុងកុង ព្រោះតែបារម្ភពីសុវត្ថិភាពរបស់បុគ្គលិកអ្នកកាសែត។
ចុះផ្សាយនៅថ្ងៃ៖
ស្តាប់ - ០២:៤៨
សហរដ្ឋអាមេរិកនឹងដាក់ទណ្ឌកម្មផ្នែកទិដ្ឋាការឲ្យតឹងតែងចំពោះថ្នាក់ដឹកនាំហុងកុង។ នេះបើតាមការប្រកាសរបស់ប្រមុខការទូតអាមេរិក លោក អង់តូនី ប្ល៊ីងកិន ដោយពុំបានលម្អិតថាត្រូវដាក់ទណ្ឌកម្មចំពោះបុគ្គលរូបណាខ្លះទេ។ ក៏ប៉ុន្តែ រដ្ឋមន្ត្រីការបរទេសអាមេរិក បានពន្យល់ថា ទណ្ឌកម្មអាមេរិកប្រឆាំងនឹងថ្នាក់ដឹកនាំហុងកុងនេះ ជាការឆ្លើយតបចំពោះការរឹតត្បឹតរបស់ហុងកុង ទៅលើស្ថាប័នប្រជាធិតេយ្យ ទៅសិទ្ធិសេរីភាព និងការធ្វើទុក្ខបុកម្នេញសំឡេងក្រុមអ្នកប្រឆាំង នាប៉ុន្មានឆ្នាំចុងក្រោយនេះ។
ទណ្ឌកម្មជាថ្មីនេះ ធ្វើឡើងក្រោយពីក្រសួងការបរទេសអាមេរិក បានដាក់របាយការណ៍ប្រចាំឆ្នាំស្តីពីស្ថានភាពហុងកុង ទៅកាន់សភាខុនហ្គ្រេសអាមេរិក។ របាយការណ៍នេះបានវាយតម្លៃនិងពិចារណាថា តើសហរដ្ឋអាមេរិកនឹងត្រូវចាត់ចែងកិច្ចការយ៉ាងណាជាមួយហុងកុង? និងថា តើអាមេរិកត្រូវសើរើមើលកិច្ចព្រមព្រៀងពិសេសអ្វីខ្លះ ដែលធ្លាប់បានចុះជាមួយហុងកុង ជាអាទិ៍ កិច្ចព្រមព្រៀងវិស័យហិរញ្ញវត្ថុជាដើម ។
ចំណាត់ការរបស់អាមេរិកលើកនេះ ក្រោយពីឃើញសភាហុងកុងអនុម័តច្បាប់ថ្មីស្តីពីសន្តិសុខជាតិ។ ច្បាប់សន្តិសុខជាតិហុងកុង ដែលទាញខ្សែញាក់ដោយរដ្ឋអំណាចចិនប៉េកាំង មានចែងទោសព្រហ្មទណ្ឌធ្ងន់ធ្ងរ រហូតដល់ត្រូវផ្តន្ទាទោសជាប់ពន្ធនាគារអស់១ជីវិត ចំពោះករណីបទល្មើសក្បត់ជាតិ និងអប្បគមន៍បំបែករដ្ឋ។ បន្ទាប់ពីសភាហុងកុងអនុម័តច្បាប់សន្តិសុខជាតិនេះ វិទ្យុអាស៊ីសេរីបានប្រកាសបិទការិយាល័យប្រចាំហុងកុង។ មូលហេតុត្រូវអ្នកស្រី Bay Fang នាយិកាវិទ្យុអាស៊ីសេរីប្រចាំហុងកុង លើកឡើងអំពីក្តីបារម្ភពីសន្តិសុខសុវត្ថិភាពបុគ្គលិកនិងអ្នកកាសែតរបស់ខ្លួន។ អាស៊ីសេរីជាវិទ្យុទទួលថវិកាពីសភាអាមេរិក និងមានស្នាក់កណ្តាលនៅក្រុងវ៉ាស៊ីនតោន។ ចំពោះការិយាល័យនៅហុកុង, ដោយតែសម្ពាធពីរដ្ឋអំណាចហុងកុង នាប៉ុន្មានឆ្នាំចុងក្រោយនេះ វិទ្យុអាស៊ីសេរី ធ្លាប់បានផ្ទេរបុគ្គលិកមួយចំនួន ពីហុងកុង ទៅតៃវ៉ាន់ មុននឹងត្រូវប្រកាសបិទការិយាល័យទាំងស្រុងនៅពេលនេះ។ គួរជ្រាបដែរថា ក្រោមអំណាចច្បាប់សន្តិសុខជាតិហុងកុង ដែលដាក់កំហិតពីក្រុងប៉េកាំង មានបណ្តាកាសែតប្រឆាំងនៅហុងកុងជាច្រើន ត្រូវបិទ ហើយចាងហ្វាងត្រូវជាប់ពន្ធនាគារ និងត្រូវកាត់ទោសតាមផ្លូវតុលាការ ជាអាទិ៍ កាសែត Apple Daily។
យ៉ាងក៏ដោយចុះ នេះមិនមែនជាលើកទី១ឡើងដែលសហរដ្ឋអាមេរិកដាក់ទណ្ឌកម្មផ្នែកទិដ្ឋាការចំពោះថ្នាក់ដឹកនាំរដ្ឋបាលហុងកុង។ ទណ្ឌកម្មអាមេរិកមានជាហូរហែ តាំងពីឆ្នាំ២០១៩មក គ្រាដែលអាជ្ញាធរហុងកុង ប្រើកម្លាំងបង្ក្រាបបាតុករទាមទារលទ្ធិប្រជាធិបតេយ្យ និងចាប់ក្រុមអ្នកប្រឆាំងដាក់ក្រោយចម្រឹងដែក។ ទាំងលើកមុននិងទាំងលើកនេះទៀត រដ្ឋបាលក្រុងប៉េកាំងបានស្តីបន្ទោសនិងថ្កោលទោសអាមេរិកថាកំពុងតែលូកដៃជ្រៀតជ្រែកកិច្ចការផ្ទៃក្នុងរបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ