ហុងកុងបង្ហាញច្បាប់សន្តិសុខជាតិថ្មី ទន្ទឹមគ្នានឹងចិន ក្រោមក្តីព្រួយបារម្ភរបស់បស្ចិមលោក
អាជ្ញាធរហុងកុងបានបង្ហើបបង្ហាញ នៅថ្ងៃសុក្រទី៨មីនា គម្រោងច្បាប់សន្តិសុខជាតិថ្មី ដែលគ្រោងផ្តន្ទាទោសឱ្យជាប់ពន្ធនាគារអស់មួយជីវិតចំពោះបទល្មើសបះបោរឬក្បត់ជាតិ។ ច្បាប់សន្តិសុខថ្មីនេះជាការបំពេញបន្ថែមពីច្បាប់សន្តិសុខជាតិឆ្នាំ២០២០ដែលតាក់តែងដោយប៉េកាំង។ ទន្ទឹមពេលជាមួយគ្នានោះ នៅក្នុងប្រទេសចិន សមាជសភាប្រជាមានិត ក៏គ្រោងនឹងអនុម័តច្បាប់ថ្មីដែរទាក់ទងនឹងសន្តិសុខ ដើម្បីការពារអធិបតេយ្យភាព។
ចុះផ្សាយនៅថ្ងៃ៖
ស្តាប់ - ០២:២៩
ផ្តើមត្រួតពិនិត្យជាផ្លូវការដោយសភាហុងកុងដែលគ្មានសមាជិកបក្សប្រឆាំង ច្បាប់ថ្មីស្តីពីការការពារសន្តិសុខជាតិ ឆ្លើយតបទាំងស្រុងទៅនឹងសេចក្តីត្រូវការពិតនិងបន្ទាន់របស់ហុងកុង។ នេះបើតាមពាក្យអះអាងរបស់អ្នកទទួលខុសត្រូវសន្តិសុខហុងកុង ទៅកាន់សមាជិកសភា។ ជាសរុបគម្រោងច្បាប់សន្តិសុខជាតិហុងកុងថ្មីបានបញ្ចូលបទល្មើសថ្មីចំនួន៥ទៀត គឺទោសក្បត់ជាតិ ចារកិច្ច អំពើបះបោរ អំពើបំផ្លិចបំផ្លាញ និងការជ្រៀតជ្រែករបស់បរទេសបន្ថែមពីលើច្បាប់សន្តិសុខកាលពីឆ្នាំ២០២០ដែលតាក់តែងដោយប៉េកាំង ក្រោយមហាបាតុកម្មនិស្សិតដើម្បីប្រជាធិបតេយ្យនៅហុងកុងឆ្នាំ២០១៩។
អាជ្ញាធរហុងកុងបានស្នើឱ្យមានការដាក់ទោសធ្ងន់បំផុត ពោលគឺដាក់ពន្ធនាគារអស់មួយជីវិតសម្រាប់រាល់គ្រប់បទល្មើស ដែលមានបង្កប់គ្រោះថ្នាក់ដល់សន្តិសុខជាតិ ដូចជាបទល្មើសក្បត់ជាតិ បះបោរ បំផ្លិចបំផ្លាញសន្តិសុខជាតិ និងញុះញង់ឱ្យប្រឆាំងនឹងកងកម្លាំងយោធាចិន។ ច្បាប់ថ្មីនេះ ក៏បានពង្រីកអត្ថន័យនៃពាក្យថា “បះបោរផ្តាច់ទឹកដី” (ដែលមានប្រើតាំងពីសម័យក្រោមអាណានិគមអង់គ្លេស) សម្រាប់ដាក់ទណ្ឌកម្មអ្នកញុះញង់ឱ្យមានការស្អប់ខ្ពើមមេដឹកនាំកុម្មុយនិស្ត និងប្រព័ន្ធសង្គមនិយមចិន ដោយដំឡើងការផ្តន្ទាទោសពីពីរឆ្នាំទៅដប់ឆ្នាំ។ អាជ្ញាធរអាចនឹងសុំឱ្យតុលាការឃុំឃាំងមនុស្សម្នាក់ដោយគ្មានជាប់បទចោទប្រកាន់អ្វីទាំងអស់រហូតដល់១៦ថ្ងៃ និងហាមមិនឱ្យជននោះរកមេធាវីក្នុងពេលជាប់ឃុំ។ បើតាមច្បាប់ថ្មី ការចែកចាយនិងមានព័ត៌មាន ស្តីពីបច្ចេកវិទ្យា ពីសេចក្តីសម្រេចនយោបាយធំៗ ព្រមទាំងស្តីពីការអភិវឌ្ឍន៍សេដ្ឋកិច្ចនិងសង្គម ក៏ចាត់ទុកជាអំពើខុសច្បាប់ “ការណ៍សម្ងាត់រដ្ឋ”ដែរ។
ជាចម្លើយតប ប្រធានសភាហុងកុងបានសន្យាប្រឹងប្រែងធ្វើគ្រប់យ៉ាងឱ្យច្បាប់នេះអាចចេញប្រើបានយ៉ាងឆាប់រហ័សដើម្បីបំពេញរាល់គ្រប់ចន្លោះខ្វះខាតក្នុងផ្នែកសន្តិសុខជាតិ។ ប៉ុន្តែសម្រាប់សកម្មជនAlexandre Wong ដែលជាសំឡេងប្រឆាំង តែមួយគត់នៅក្រៅសភា គម្រោងច្បាប់ថ្មីសំខាន់ខ្លាំងណាស់តែអាជ្ញាធរប្រើពេលតែមួយខែក្នុងការសាកសួរយោបល់សាធារណៈ។ ដោយក្តីព្រួយបារម្ភខ្លាំង សហភាពអឺរ៉ុប សហរដ្ឋអាមេរិកបានប្រកាសចាត់ទុកច្បាប់សន្តិសុខថ្មីហុងកុងថាជាហានិភ័យច្រោះសេរីភាពជាមូលដ្ឋានគ្រឹះរបស់ពលរដ្ឋហុងកុង និងសន្យាពិនិត្យមើលជាលម្អិតនៅពេលច្បាប់អនុម័តរួចនិងការអនុវត្តមកលើពលរដ្ឋនិងក្រុមហ៊ុនអាមេរិកលើទឹកដីហុងកុង។
ក្នុងពេលដែលហុងកុងកំពុងរៀបចំរឹតបន្តឹងច្បាប់សន្តិសុខថ្មីបន្ថែមពីច្បាប់សន្តិសុខចាស់ដែលកាត់តែងដោយប៉េកាំងនោះ នៅក្នុងសមាជសភាប្រជាមានិត មេដឹកនាំលំដាប់ទីបីចិន ក៏បានប្រកាសអនុម័តច្បាប់ថ្មីស្តីពីគ្រប់គ្រងភាពអាសន្ន ថាមពល ថាមពលនុយក្លេអ៊ែរ និងសន្តិសុខជាតិ ដើម្បីការពារអធិបតេយ្យភាពជាតិទាំងមូលតែម្តង។ ពុំទាន់មានការលម្អិតអំពីខ្លឹមសារនៃច្បាប់ថ្មី និងកាលបរិច្ឆេទអនុម័តទេ តែ គម្រោងច្បាប់ថ្មីមានទិសដៅធ្វើទំនើបកម្មប្រព័ន្ធ និងសមត្ថភាពការពារសន្តិសុខជាតិចិន ក្នុងវិស័យជាច្រើន រាប់តាំងពីហិរញ្ញវត្ថុ សុខាភិបាល អប់រំ ការពារជាតិ និងសន្តិសុខព័ត៌មានវិទ្យា។ នេះបើតាមសេចក្តីថ្លែងការណ៍របស់ទីភ្នាក់ងារសារព័ត៌មានផ្លូវការចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ