រដ្ឋមន្រ្តីហិរញ្ញវត្ថុអាមេរិកព្រមានចិនអំពីការឧបត្ថម្ភធនដែលអាចបង្កគ្រោះថ្នាក់ដល់សេដ្ឋកិច្ចសកល
ក្នុងដំណើរទស្សនកិច្ចនៅចិន រដ្ឋមន្រ្តីក្រសួងហិរញ្ញវត្ថុអាមេរិក លោកស្រី ចានែត ល្វីស យេលែន បានថ្លែងក្តីបារម្ភជាថ្មីអំពីការឧបត្ថម្ភធនរបស់រដ្ឋចិនក្នុងវិស័យឧស្សាហកម្ម ដោយចាត់ទុកថា ករណីនេះអាចបង្កគ្រោះថ្នាក់ដល់សេដ្ឋកិច្ចពិភពលោក។ ការថ្លែងដូច្នេះធ្វើឡើងក្នុងជំនួបជាមួយសហគមន៍ពាណិជ្ជករអាមេរិក នៅខេត្តក្វាងទុង ប៉ែកខាងត្បូងចិន។ ដោយឡែក ក្នុងជំនួបជាមួយអភិបាលខេត្តក្វាងទុង លោកស្រីរដ្ឋមន្រ្តីហិរញ្ញវត្ថុអាមេរិក ក៏បានលើកឡើងអំពីការប្រកួតប្រជែងដោយស្មោះត្រង់។
ចុះផ្សាយនៅថ្ងៃ៖
ស្តាប់ - ០៣:១៦
ក្វាងទុង ជាខេត្តនិមិត្តឧស្សាហកម្មផលិតកម្ម និងជាខេត្តដែលមានជាងគេនៅចិន។ ទីនេះហើយ ដែល រដ្ឋមន្រ្តីក្រសួងហិរញ្ញវត្ថុអាមេរិក ជ្រើសរើសសម្រាប់ការចាប់ផ្តើមទស្សនកិច្ច ៤ថ្ងៃនៅប្រទេសចិន។ នៅចំពោះមុខសហគមន៍ពាណិជ្ជករអាមេរិក កាលពីថ្ងៃថ្ងៃសុក្រ ទី៥មេសា លោកស្រី ចានែត ល្វីស យេលែន រដ្ឋមន្រ្តីក្រសួងហិរញ្ញវត្ថុអាមេរិក បានចង្អុលបង្ហាញពីផលវិបាកនៃការឧបត្ថម្ភធនច្រើនឡើងៗរបស់រដ្ឋចិន ក្នុងវិស័យឧស្សាហកម្មផលិតកម្ម។ ការធ្វើដូច្នេះ ត្រូវលោកស្រីរដ្ឋមន្រ្តីហិរញ្ញវត្ថុអាមេរិក ចានែត ល្វីស យេលែន បញ្ជាក់ថា វានឹងអាចឲ្យចិនបានផលិតទំនិញច្រើនពិតមែន រហូតដល់ច្រើនជ្រុលលើសតម្រូវការក្នុងស្រុក ហើយនិងជន់ជោរលើសទីផ្សារក្រៅស្រុកថែមទៀត។ ប្រការនេះ ក៏នាំឲ្យទាញតម្លៃធ្លាក់ទាបខ្លាំង ហើយថែមទាំងអាចបង្កគ្រោះថ្នាក់គំរាមកំហែងដល់ក្រុមហ៊ុនអាមេរិកនិងប្រទេសដទៃទៀត ដែលនៅទីបំផុត វាបង្កគ្រោះថ្នាក់ដល់សេដ្ឋកិច្ចពិភពលោកទាំងមូល។
ប្រសាសន៍របស់រដ្ឋមន្ត្រីអាមេរិកចាក់ចំចំណុចឧបត្ថម្ភធនបែបនេះ ពុំចម្លែកសោះឡើយចំពោះអ្នកវិភាគសេដ្ឋកិច្ច។ មិនចម្លែក ដ្បិតថា តាំងពីងើបពីវិបត្តិកូវីដ១៩មក រដ្ឋអំណាចចិនប្រើវិធីសាស្ត្រកែទម្រង់សេដ្ឋកិច្ច ដោយជ្រោមជ្រែងជួយសម្បើមណាស់ទៅលើវិស័យឧស្សាហកម្មផលិត ពិសេសការផលិតឡានអគ្គិសនី និងអភិវឌ្ឈបច្ចេកវិទ្យាទំនើប។ សហរដ្ឋអាមេរិក វិញ ក៏ប្រឹងវិនិយោគខ្លាំងដែរទៅលើការផលិតរថយន្តដើរដោយថាមពលកកើតឡើងវិញ ហើយរដ្ឋបាលរបស់លោក ចូ បៃដិន ក៏បានយកចំណុចនេះជាឧបករណ៍ឃោសនា១សម្រាប់ការបោះឆ្នោតជាថ្មីផង។ ប្រសាសន៍របស់រដ្ឋមន្ត្រីអាមេរិក ក៏ជាការនិយាយស្កាត់ទុកជាមុន ជៀសវាងទំនាស់ធំនៅពេលអនាគត ក្នុងការវិស័យផលិតរថយន្តអគ្គិសនីដ៏ច្រើនជ្រុលហួសកម្រិត ពីសំណាក់ស្រុកចិន។ នេះបើតាមលោក Paul Triolo អ្នកជំនាញកិច្ចការចិន ក្នុងក្រុមហ៊ុនប្រឹក្សាយោបល់អាមេរិក Albright Stonebridge Group។
ដោយឡែក កាសែតក្នុងស្រុកចិន បានកោតសរសើររដ្ឋមន្រ្តីអាមេរិក ថាចេះកាន់ចង្កឹះបានយ៉ាងប្រសព្វ។ នេះជាលើកទី២ ក្នុងរយៈពេល១ឆ្នាំ ដែលរដ្ឋមន្រ្តីក្រសួងហិរញ្ញវត្ថុអាមេរិកអញ្ជើញទៅស្រុកចិន។ ដូចកាលពីដំណើរទស្សនកិច្ចកាលពី៩ខែមុនដែរ លោកស្រី ចានែត ល្វីស យេលែន បានលើកឡើងពីការប្រកួតប្រជែងទីផ្សារដោយសុចរិតស្មោះត្រង់។ ក្នុងជំនួបជាមួយអភិបាលខេត្តក្វាងទុង លោកស្រីរដ្ឋមន្ត្រីបានធានាថា សហរដ្ឋអាមេរិករំពឹងបានទំនាក់ទំនងរកស៊ីផ្នែកសេដ្ឋកិច្ចល្អជាមួយចិន ក៏ប៉ុន្តែ ចិនក៏ចាំបាច់បង្កលក្ខណៈប្រកួតប្រជែងដោយយុត្តិធម៌សម្រាប់ក្រុមហ៊ុនអាមេរិកនិងបុគ្គលិកពួកគេ ព្រមទាំងទាក់ទងផ្តល់ព័ត៌មានឲ្យគ្នា ដោយសេរីនិងបើកចំហំ ចំពោះវិស័យដែលយល់ឃើញខ្វែងគ្នា។
នៅថ្ងៃសៅរ៍ លោកស្រីរដ្ឋមន្រ្តីហិរញ្ញវត្ថុអាមេរិកបន្តដំណើរទៅរដ្ឋធានីប៉េកាំង។ ក្នុងឱកាសនៅស្រុកចិន លោកស្រី ចានែត ល្វីស យេលែន ត្រូវទទួលជួបជាមួយលោក លី ឈាំងនាយករដ្ឋមន្ត្រីចិន, លោក He Lifeng អនុនាយករដ្ឋមន្ត្រីចិន, លោក Lan Fo’an រដ្ឋមន្ត្រីក្រសួងហិរញ្ញវត្ថុ ព្រមទាំងអគ្គទេសាភិបាលធនាគារជាតិចិន លោក Pan Gongsheng។ ពួកគេនឹងជជែកគ្នាអំពីសំណុំរឿងរស៊ើបជុំវិញការរឹតត្បិតប្រឆាំងទំនិញផលិតចិនមិនឲ្យនាំចូលសហរដ្ឋអាមេរិកព្រោះតែហេតុផលសន្តិសុខជាតិ ហើយនិង ការគាំទ្រសេដ្ឋកិច្ចហិរញ្ញវត្ថុរបស់ចិនចំពោះរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ