Microsoft : ចិនប្រើប្រព័ន្ធបច្ចេកវិទ្យាបញ្ញាសិប្បនិមិត្តដើម្បីសាបព្រោះភាពចម្រូងចម្រាស
រដ្ឋអំណាចចិនប្រើប្រាស់ប្រព័ន្ធបច្ចេកវិទ្យាបញ្ញាសិប្បនិមិត្ត ដើម្បីសាបព្រោះភាពចម្រូងចម្រាស និងបង្កភាពមិនចុះសម្រុង នៅលើពិភពលោក រួមទាំងនៅសហរដ្ឋអាមេរិកដែរ។ ការនេះបង្កជាក្តីបារម្ភខ្លាំង ក្នុងឱកាសដែល សហរដ្ឋអាមេរិក ត្រូវរៀបចំការបោះឆ្នោតប្រធានាធិបតី ហើយប្រទេសដទៃទៀត ដូចជា ឥណ្ឌា និងកូរ៉េខាងត្បូង ជាដើម ក៏ត្រូវរៀបចំបោះឆ្នោតជាតិដែរ ក្នុងឆ្នាំនេះ។ ការសម្តែងក្តីបារម្ភយ៉ាងដូច្នេះ ត្រូវបញ្ជាក់ដោយមជ្ឈមណ្ឌលស្រាវជ្រាវបច្ចេកវិទ្យានៃក្រុមហ៊ុនអាមេរិក Microsoft ដែលបានចេញផ្សារបាយការណ៍ថ្មី១ក្នុងសប្តាហ៍នេះ។
ចុះផ្សាយនៅថ្ងៃ៖
ស្តាប់ - ០២:៥៥
ប្រទេសចិនកាន់តែតម្រង់ឆ្ពោះទៅការពង្រីកវាតទីឥទ្ធិពលនៅបរទេស ហើយនិងជ្រៀតជ្រែងកិច្ចប្រទេសដទៃ ដើម្បីបម្រើផលប្រយោជន៍ខ្លួន។ រដ្ឋអំណាចចិនប្រើប្រាស់កាន់តែច្រើនឡើងៗ នូវប្រព័ន្ធបច្ចេកវិទ្យាបញ្ញាសិប្បនិមិត្ត ហើយនិង គណនីប្រើប្រាស់បណ្តាញសង្គមក្លែងក្លាយ គ្មានមនុស្សជាម្ចាស់គណនីពិតប្រាកដទេ ប្រើក្នុងគោលបំណងដើម្បីសាបព្រោះភាពចម្រូងចម្រាស និងបង្កភាពមិនចុះសម្រុង នៅសហរដ្ឋអាមេរិក ក៏ដូចជានៅប្រទេសដទៃលើពិភពលោក។ នេះបើតាមការលើកឡើងរបស់ លោក Clint Watts ប្រធានមជ្ឈមណ្ឌលស្រាវជ្រាវផ្នែកការគំរាមកំហែងតាមប្រព័ន្ធបច្ចេកវិទ្យាអ៊ីនធ័រនែត នៃក្រុមហ៊ុនអាមេរិក Microsoft ក្នុងរបាយការណ៍ចេញផ្សាយពីថ្ងៃព្រហស្បតិ៍ ទី៤មេសា។
អ្នកជំនាញក្រុមហ៊ុន Microsoft បានពន្យល់ទៀតថា តាមរយៈប្រព័ន្ធបច្ចេកវិទ្យាបញ្ញាសិប្បនិមិត្ត ចិនអាចបង្កើនគណនីក្លែងក្លាយជាច្រើន ហើយប្រើវាដើម្បីខំឆ្កឺះឆ្កៀលសំណុំរឿងណាមួយ។ ប្រធានបទដែលពេញនិយមខ្លាំងនៅអាមេរិក ទាក់ទងនឹង បញ្ហានយោបាយជនភៀសខ្លួន បរិស្ថានអាកាសធាតុ គ្រឿងញៀន និងការរើសអើងប្រកាន់ពូជសាសន៍។ បច្ចេកវិទ្យាបញ្ញាសិប្បនិមិត្តនិងគណនីក្លែងក្លាយ យកប្រធានទាំងនោះ ទៅស្ទង់មតិ ដើម្បីដឹងពីទំនោររបស់អ្នកប្រើប្រាស់និងម្ចាស់ឆ្នោត ហើយក៏ដើម្បីបំភាន់មតិសាធារណៈអ្នកបោះឆ្នោតអាមេរិក ហើយនិងអាចនាំឲ្យផ្អៀងលទ្ធផលបោះឆ្នោត ទៅគណបក្សនយោបាយ ឬបេក្ខជនណាមួយ ដែលអាចនឹងជាប្រយោជន៍សម្រាប់ចិន។
មិនតែប៉ុណ្ណោះ ចិនអាចប្រើប្រាស់ប្រព័ន្ធបណ្តាញទាំងនោះ ដើម្បីឆ្លៀតកេញចំណេញទៅលើព្រឹត្តិការណ៍ណាមួយនៅក្នុងសង្គមអាមេរិក ក្នុងបំណងនឹងធ្វើឲ្យអ្នកប្រើប្រាស់អ៊ិនធ័រនែត អស់ជំនឿនិងដកទំនុកទុកចិត្តពីអាជ្ញាធរអាមេរិក។ ជាក់ស្តែង ករណីរថភ្លើងបើកខុសផ្លូវនៅរដ្ឋKentucky និងភ្លើងឆេះនៅកោះហាវៃ ដែល គណនីប្រើប្រាស់បណ្តាញសង្គមគ្មានម្ចាស់ពិតប្រាកដ បញ្ចេញសាររិះគន់ ស្តីបន្ទោស និងនាំឲ្យដកទំនុកចិត្តពីអាជ្ញាធរ។
ជាការរំឭក កាលពីចុងឆ្នាំ២០២៣ អ្នកជំនាញក្រុមហ៊ុន Microsoft បានរកឃើញដែរថា រដ្ឋអំណាចចិនបានប្រើបណ្តាញសង្គម ដើម្បីជ្រៀតជ្រែកនៅក្នុងការបោះឆ្នោតពាក់កណ្តាលអាណត្តិ នៅខែវិច្ឆិកា២០២២។
ប្រការនេះ នាំឲ្យមានគ្រោះថ្នាក់ហើយនិងក្តីបារម្ភជុំវិញការបោះឆ្នោតប្រធានាធិបតី ខែវិច្ឆិកា ឆ្នាំ២០២៤ ខាងមុខ។ ជុំវិញការជ្រៀតជ្រែកកិច្ចការផ្ទៃក្នុងអាមេរិក លោកប្រធានាធិបតី ចូ បៃដិន បានរំឭកប្រាប់និងដាស់តឿនលោកប្រមុខរដ្ឋចិន ស៊ី ជិនពីង ម្តងជាពីរដង ហើយនៅពេលជជែកគ្នាតាមទូរសព្ទ ក្នុងសប្តាហ៍នេះ ថ្នាក់ដឹកនាំអាមេរិកក៏បានព្រមានចិនពីការលូកដៃក្នុងដំណើរការបោះឆ្នោតប្រធានាធិបតីអាមេរិក ក្នុងឆ្នាំនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ