អ៊ីតាលីរិះគន់ ចំណែក អេស្ប៉ាញអំពាវនាវកុំឲ្យអឺរ៉ុបខ្វះសាមគ្គីភាព នៅចំពោះមុខជំងឺកូវីដ ១៩
នៅចំពោះមុខនៃការគំរាមកំហែងសេដ្ឋកិច្ច ដែលបណ្តាលមកពីជំងឺរាតត្បាត កូវីដ ១៩ ប្រទេសសមាជិកអឺរ៉ុបដែលរងគ្រោះខ្លាំងជាងគេ ដោយសារជំងឺរាតត្បាត កូវីដ ១៩ ដូចជាអ៊ីតាលី និងអេស្ប៉ាញ បានអំពាវនាវឲ្យអឺរ៉ុប ប្រញាប់ប្រញាល់ចាត់វិធានការបន្ទាន់ ដើម្បី ស្រោចស្រង់សេដ្ឋកិច្ចរបស់ប្រទេសសមាជិក មុននឹងអ្វីៗត្រូវហួសពេល។ ប្រធានធនាគារកណ្តាលអឺរ៉ុប លោកស្រី គ្រីស្ទីន ឡាហ្កាដ បានបានចូលរួម នៅក្នុងកិច្ចប្រជុំ ថ្នាក់ដឹកនាំអឺរ៉ុប កាលពីថ្ងៃព្រហស្បតិ៍ បានដាក់សម្ពាធឲ្យមេដឹកនាំអឺរ៉ុប ស្វែងរកយុទ្ធសាស្រ្តខ្លាំងមួយ ដើម្បី កាត់បន្ថយ ការខាតបង់សេដ្ឋកិច្ច បង្កឡើងដោយជំងឺរាតត្បាតកូវីដ ១៩។
ចុះផ្សាយនៅថ្ងៃ៖
ស្តាប់ - ០២:៤៧
មេដឹកនាំរបស់ប្រទេសទាំង២៧ សមាជិករបស់សហភាពអឺរ៉ុប ដែលបានជួបប្រជុំគ្នា ពីចម្ងាយ កាលពីថ្ងៃព្រហស្បតិ៍ និយាយមិនចុះសម្រុងគ្នា ក្នុងការស្វែងរកដំណោះស្រាយរួម សម្រាប់វិបត្តិសេដ្ឋកិច្ច ដែលបង្កឡើងដោយជំងឺរាតត្បាតកូវីដ១៩។
ដោយសារតែនិយាយមិនត្រូវគ្នា និងមិនអាចចេញសេចក្តីថ្លែងការណ៍រួម មួយ កាលពីថ្ងៃព្រហស្បតិ៍ មេដឹកនាំប្រទេសទាំង២៧ បានដាក់បន្ទុកឲ្យរដ្ឋមន្រ្តីសេដ្ឋកិច្ចរបស់ខ្លួន ជួបប្រជុំ ក្នុងរយៈពេល ១៥ ថ្ងៃ ដើម្បី ស្វែងរក ចំណុចព្រមព្រៀងគ្នា មុននឹងការជួបប្រជុំសាជាថ្មី។
សម្រាប់ប្រធានធនាគារកណ្តាលអឺរ៉ុប លោកស្រី គ្រីស្ទីន ឡាហ្កាដ សហភាពអឺរ៉ុបចាត់វិធានការយឺតយ៉ាងជ្រុលហួស នៅចំពោះមុខវិបត្តិកូវីដ ១៩ ដែលអន្តរាយ មិនត្រឹមជីវិតមនុស្ស ប៉ុន្តែ កំពុងជំរុញឲ្យមានវិបត្តិសេដ្ឋកិច្ចសកល ដែលនឹងអាចខ្លាំងក្លា ជាង វិបត្តិហិរញ្ញវត្ថុឆ្នាំ ២០០៨។
តាមប្រភពស្និទ្ធនឹងសំណុំរឿង ដែលដកស្រង់សំដីដោយទីភ្នាក់ងារព័ត៌មានបារាំង AFP នៅក្នុងកិច្ចប្រជុំជាមួយ មេដឹកនាំអឺរ៉ុប ប្រធានធនាគារកណ្តាលអឺរ៉ុបបានស្នើឲ្យមានការបោះមូលប័ត្របំណុល រួម ក្នុងក្របខ័ណ្ឌអឺរ៉ុប ដែលគាំទ្រ ដោយប្រទេសអ៊ីតាលី អេស្ប៉ាញ និងបារាំងជាដើម ដែលកំពុងប្រឈមនឹងហានិភ័យខាតបង់សេដ្ឋកិច្ច ដោយសារវិបត្តិកូរ៉ូណាវីរុសលើកនេះ។ ប៉ុន្តែ ដូចក្នុងវិបត្តិប្រាក់បំណុល ក្នុងតំបន់អឺរ៉ូ កាលពីឆ្នាំ ២០១០ និងឆ្នាំ ២០១២ អាល្លឺម៉ង់ និងហូឡង់ បានចេញមុខ ប្រឆាំងដាច់ខាត។
ដោយសារតែមានការប្រឆាំងនឹងការបោះមូលប័ត្របំណុលរួម ក្នុងក្របខ័ណ្ឌអឺរ៉ុប បារាំងបានស្នើជំរើសមួយទៀត ដើម្បីសង្រ្គោះសេដ្ឋកិច្ចរបស់ប្រទេសសមាជិកអឺរ៉ុប នោះ គឺការប្រើឥណទានពិសេស មួយទៀត របស់អឺរ៉ុប (Mecanisme européen de stabilité) ដែលជាមូលនិធិអឺរ៉ុបសម្រាប់វិបត្តិហិរញ្ញវត្ថុ។ នៅក្នុងរឿងនេះ លោកស្រីនាយករដ្ឋមន្រ្តីអាល្លឺម៉ង់បានព្រមព្រៀងហើយ ប៉ុន្តែ នាយករដ្ឋមន្រ្តីហូឡង់ បានចេញមុខជំទាស់សាជាថ្មីគេគួរប្រើមូលនិធិអឺរ៉ុប នៅក្នុងដំណាក់កាលចុងក្រោយបំផុត។
តាមប្រភពដដែល គេសង្កេតឃើញនៅតែមានការបែកបាក់គ្នារវាងក្រុមប្រទេសអឺរ៉ុប ខាងជើង ហើយនិងបណ្តាប្រទេសអឺរ៉ុបខាងត្បូង។ នៅពេលប្រទេសអឺរ៉ុបខាងត្បូង ដូចជាអ៊ីតាលី និងអេស្ប៉ាញ និយាយថា គេត្រូវធ្វើអ្វីគ្រប់យ៉ាងដើម្បីស្តារ សង្រ្គោះ សេដ្ឋកិច្ច ដែលបំផ្លាញ ដោយកូវីដ ១៩ បណ្តាប្រទេសអឺរ៉ុបខាងជើង ឯណោះវិញ អះអាងថា គេបានធ្វើគ្រប់គ្រាន់ហើយ ដូច្នេះ ត្រូវរង់ចាំមើលថា តើស្ថានការណ៍នឹងវិវឌ្ឍប្រែប្រួលយ៉ាងម៉េច។
នៅមួយថ្ងៃក្រោយកិច្ចប្រជុំ គ្មានលទ្ធផលអ្វីរបស់មេដឹកនាំអឺរ៉ុប កាសែតអ៊ីតាលីសរសេររិះគន់ នាយករដ្ឋមន្រ្តី ហូឡង់ សំដែងក្តីខឹងសម្បារ នឹងអឺរ៉ុប ដែលស្លាប់ និងមានរូបរាងអាក្រក់។ ចំណែក នាយករដ្ឋមន្រ្តីអេស្ប៉ាញ លោក Pedro Sanchez ឯណោះវិញ បានអំពាវនាវសាជាថ្មី ឲ្យប្រទេសអឺរ៉ុបសាមគ្គី ជួយគ្នា ពោលគឺមិនអាចបោះបង់ចោលប្រជាជនអឺរ៉ុប នៅចំពោះមុខ ជំងឺរាតត្បាតសម្លាប់មនុស្ស ដូចជាកូវីដ ១៩នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ