អាមេនីត្រៀមចរចា បង្កើតបទឈប់បាញ់ ប៉ុន្តែ អាស៊ែបៃហ្សង់ គិតតែសម្រុកវាយប្រហារ
ការប្រយុទ្ធគ្នារវាងកងទ័ពអាស៊ែបៃហ្សង់ និងកម្លាំងក្រុមអ្នកទាមទារផ្តាច់ទឹកដីនិយមក្នុងតំបន់ការ៉ាបាក់គាំទ្រដោយកម្លាំងទ័ពអាមេនីនៅតែបន្តមាន នៅថ្ងៃសៅរ៍ទី ៣ តុលា បើទោះបីជាមានការអំពាវនាវពីសហគមន៍អន្តរជាតិឲ្យភាគីប្រយុទ្ធទាំងពីរ ទម្លាក់អាវុធ។ កាលពីថ្ងៃសុក្រ រដ្ឋាភិបាលអាមេនីបានថ្លែងត្រៀមខ្លួនពិភាក្សាជាមួយ អង្គការដើម្បីសន្តិសុខ និងសហប្រតិបតិ្តការអឺរ៉ុប OSCEដើម្បីបង្កើតបទឈប់បាញ់នៅតំបន់ការ៉ាបាក់ ប៉ុន្តែ គេនៅមិនទាន់ឃើញមានចំលើយតបវិជ្ជមានពីភាគីអាស៊ែរបៃហ្សង់នៅឡើយទេ។
ចុះផ្សាយនៅថ្ងៃ៖
ស្តាប់ - ០២:៤២
នៅក្នុងសង្រ្គាមប្រយុទ្ធគ្នា ដែលបានឈានចូលដល់ថ្ងៃទី ៧ គ្រាប់ផ្លោងសំដៅទីក្រុង ភូមិ ក្នុងតំបន់ការ៉ាបាក់ បានថយចុះ ស្ងប់ស្ងាត់ នៅព្រឹកថ្ងៃសៅរ៍នេះ ប៉ុន្តែ ការប្រយុទ្ធគ្នា រវាងកងទ័ព អាស៊ៃបៃហ្សង់ និងកងកម្លាំងផ្តាច់ទឹកដីអាមេនី នៅតែសន្ធឹកខ្លាំង នៅជួរសមរភូមិមុខ។ អ្នកនាំពាក្យរបស់ក្រសួងការពារជាតិអាមេនី នៅថ្ងៃសៅរ៍នេះ បានបរិហារថ្កោលទោស ការវាយប្រហារដ៏ហិង្សា របស់កងទ័ព អាស៊ែបៃហ្សង់ ទៅលើក្រុមទាមទារផ្តាច់ទឹកដី ដែលគាំទ្រដោយ អាមេនី។ ក្រសួងការពារជាតិអាមេនីបាននិយាយថា ទាហានរបស់ក្រុមទាមទារផ្តាច់ទឹកដីគាំទ្រដោយអាមេនី ចំនួន៥១នាក់បានស្លាប់នៅក្នុងការវាយប្រហាររបស់កងទ័ពអាស៊ែបៃហ្សង់ នៅថ្ងៃសៅរ៍។
តាមអ្នកនាំពាក្យដដែល ពួកសត្រូវ (អាស៊ែបៃហ្សង់) បានពង្រាយទ័ពបន្ថែម ប៉ុន្តែ កងទ័ពអាមេនីបានបង្ហាញភាពក្លាហាន វាយទប់ទល់វិញ ដោយវីរភាព។ ចាប់តាំងពីផ្ទុះសង្រ្គាម ប្រយុទ្ធគ្នានៅការ៉ាបាក់ មនុស្ស ១៩១នាក់បានស្លាប់ ដែលនៅក្នុងនោះ១៨៥នាក់ ទាហានរបស់ក្រុមទាមទារផ្តាច់ទឹកដី អាមេនី និង១៤នាក់ ជាប្រជាជនស៊ីវិល។ អាស៊ែបៃហ្សង់ មិនដែលបញ្ជាក់ពីតួលេខជនរងគ្រោះ និងការខូចខាតនៅភាគីរបស់ខ្លួននោះទេ ប៉ុន្តែ បានអះអាងថា បានសម្លាប់ទាហានអាមេនី ជាង ២៣០០នាក់។ ចំណែក អាមេនី និង ក្រុមទាមទារផ្តាច់ទឹកដី នៅការ៉ាបាក់ បានវាយបកទៅវិញថា ខ្លួនបានសម្លាប់ទាហានអាស៊ែបៃហ្សង់ ជាង៣០០០នាក់ ចាប់តាំងពីថ្ងៃចាប់ផ្តើមប្រយុទ្ធគ្នា កាលពីថ្ងៃអាទិត្យសប្តាហ៍មុន។
នៅថ្ងៃសុក្រ អគ្គលេខាធិការអង្គការសហប្រជាជាតិបានអំពាវនាវឲ្យភាគីជម្លោះ ទម្លាក់អាវុធ ចំណែក ប្រធានាធិបតី រុស្ស៊ី លោកវ្លាឌីមៀរ ពូទីន ជាលើកទី១ បានសំដែងក្តីបារម្ភជុំវិញ វត្តមានរបស់កម្លាំងប្រយុទ្ធទ័ពបរទេស ដែលតួកគី បញ្ជូនពីតំបន់ដើមបូព៌ា ដើម្បីឲ្យទៅជួយទាហានអាស៊ែបៃហ្សង់។ នៅថ្ងៃព្រហស្បតិ៍លោកប្រធានាធិបតី បារាំង ម៉ាក្រុងបានទាមទារឲ្យតួកគីបកស្រាយពីវត្តមានរបស់ទាហានជីហាត ប្រមាណ៣០០នាក់ ដែល បានចាកចេញពីភាគខាងជើង ស៊ីរី ឆ្លងកាត់តួកគី សំដៅ ទឹកដី អាស៊ែបៃហ្សង់។ តាមអង្គការឃ្លាំមើលសិទ្ធិមនុស្សស៊ីរី ដែលមានបណ្តាញរបស់ខ្លួន នៅក្នុងទឹកដីស៊ីរី តួកគីបានបញ្ជូន ទាហានស៊ីរី ដែលគាំទ្រតួកគី ប្រមាណ ៨៥០នាក់ ពីតំបន់អាឡិប របស់ស៊ីរី ទៅជួយទាហានអាស៊ែបៃហ្សង់។
អង្គការការពារសិទ្ធិមនុស្សស៊ីរីអះអាងផងដែរថា មានទាហានស៊ីរី ២៣នាក់ស្លាប់ក្នុងការប្រយុទ្ធគ្នា នៅការ៉ាបាក់។ គ្រួសាររបស់ទាហានស៊ីរី មួយចំនួនបានបញ្ជាក់ប្រាប់ទីភ្នាក់ងារព័ត៌មានបារាំងAFP ថា ពិតជាមានទាហានស៊ីរី ទៅប្រយុទ្ធក្នុងជួរកងទ័ពអាស៊ែបៃហ្សង់។ ក្រៅតែតួកគី អាមនីបានចោទប្រកាន់ផងដែរអ៊ីស្រាអែល ថា បានលក់ដ្រូន និងសព្វាវុធទំនើប ដែលធ្វើឲ្យកងទ័ពអាស៊ែបៃហ្សង់ មានប្រៀប នៅក្នុងសមរភូមិប្រយុទ្ធ។
នៅពេលតួកគី នៅស្ងៀម មិនទាន់ប្រតិកម្ម អ្វី អាស៊ែបៃហ្សង់បានបដិសេធការចោទប្រកាន់ របស់អាមេនី និងវាយបកទៅវិញថា គឺអាមេនីដែលបានប្រើទាហានស៊ីឈ្នួលអាមេនី មកពីប្រទេសលីបង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ