នុយក្លេអ៊ែរអ៊ីរ៉ង់៖ប្រទេសហត្ថលេខីកិច្ចព្រមព្រៀងឆ្នាំ ២០១៥ រួមប្រជុំដើម្បីបញ្ចុះភាពតានតឹង
នៅថ្ងៃពុធ ទី១៦ ធ្នូ ក្រុមប្រទេសហត្ថលេខីលើកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ បានរួមប្រជុំគ្នាតាមអនឡាញ។ តែការប្រជុំលើកនេះគ្មានវត្តមានសហរដ្ឋអាមេរិកទេ បន្ទាប់ពីប្រធានាធិបតីអាមេរិកលោកដូណាល់ ត្រាំបានដកសហរដ្ឋអាមេរិកចេញពីកិច្ចព្រមព្រៀងកាលពីឆ្នាំ ២០១៨។ កម្មវត្ថុនៃកិច្ចប្រជុំមានពីរ ទី១ ដើម្បីព្យាយាមកាត់បន្ថយភាពតានតឹងរវាងអ៊ីរ៉ង់ និងសហរដ្ឋអាមេរិកក្នុងពេលរង់ចាំរដ្ឋបាលអាមេរិកថ្មីរបស់ប្រធានាធិបតីជាប់ឆ្នោតលោកចូ បៃដិន និងទី២ ដើម្បីរម្លឹកអ៊ីរ៉ង់ឲ្យគោរពត្រឹមត្រូវនូវកាតព្វកិច្ចដែលមានចែងនៅក្នុងកិច្ចព្រមព្រៀង។
ចុះផ្សាយនៅថ្ងៃ៖
ស្តាប់ - ០២:១៨
តាំងពីលោកដូណាល់ ត្រាំបានដកសហរដ្ឋអាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់ក្នុងឆ្នាំ ២០១៨ និងបានដាក់ទណ្ឌកម្មសេដ្ឋកិច្ចជាថ្មីប្រឆាំងអ៊ីរ៉ង់មក កិច្ចព្រមព្រៀងដែលបានចុះហត្ថលេខាដោយសមាជិកអចិន្រ្តៃយ៍ទាំង ៥ប្រទេសនៃក្រុមប្រឹក្សាសន្តិសុខ បូកនឹងប្រទេសអាល្លឺម៉ង់កាលពី ៥ឆ្នាំមួយនេះកំពុងផុយស្រួយខ្លាំង និងឈានទៅរកការស្លាប់តែម្តង។ មូលហេតុ គឺមកពីអ៊ីរ៉ង់បានសងសឹកដាក់សហរដ្ឋអាមេរិកវិញតាំងពីខែឧសភា ឆ្នាំ ២០១៩ដោយផ្តើមមិនគោរពពាក្យសន្យាមួយចំនួនដែលមានចែងនៅក្នុងកិច្ចព្រមព្រៀង ពិសេសបង្កើនការស្តុក និងចម្រើនធាតុអ៊ុយរ៉ាញ៉ូមលើសអត្រាកំនត់។
លើសពីនេះ និងក្រោយពីមានឃាតកម្មសម្លាប់អ្នកជំនាញនុយក្លេអ៊ែរអ៊ីរ៉ង់លោក Mohsen Fakhrizadeh នាដំណាច់ខែវិច្ឆិកា អ៊ីរ៉ង់បានបង្កើនការផ្គើនដាក់សហគមន៍អន្តរជាតិមួយកម្រិតទៀតដោយដំឡើងឧបករណ៍ចម្រើនធាតុអ៊ុយរ៉ាញ៉ូមចំនួន ៣បន្ថែមនៅមជ្ឈមណ្ឌលនុយក្លេអ៊ែរ Natanz។ ដូច្នេះកម្មវត្ថុសំខាន់នៃជំនួបរវាងក្រុមប្រទេសហត្ថលេខីនៃកិច្ចព្រមព្រៀងដែលគ្មានវត្តមានភាគីអាមេរិកពេលនេះ គឺដើម្បីស្វែងរកមធ្យោបាយបន្តរក្សាទុកកិច្ចព្រមព្រៀង និងរម្លឹកភាគីអ៊ីរ៉ង់ឲ្យគោរពកិច្ចព្រមព្រៀងត្រឹមត្រូវ ពេញលេញឡើងវិញ។
ម្យ៉ាងទៀត ក្រុមប្រទេសហត្ថលេខីក៏ចង់ប្រាប់អ៊ីរ៉ង់ថា ការចូលកាន់អំណាចរបស់រដ្ឋបាលថ្មីនៅសហរដ្ឋអាមេរិកជាមួយប្រធានាធិបតីជាប់ឆ្នោតលោកចូ បៃដិនជាឱកាសដ៏ល្អដើម្បីស្តារទំនាក់ទំនងរវាងក្រុងវ៉ាស៊ីនតោន និងក្រុងតេហេរ៉ង់ឡើងវិញ។ ទំនាក់ទំនងដែលត្រូវបានជាន់ពន្លិចដោយរដ្ឋបាលរបស់លោកដូណាល់ ត្រាំ។ គួររម្លឹកថា លោកបៃដិនធ្លាប់បានបញ្ជាក់ពីឆន្ទៈចង់នាំសហរដ្ឋអាមេរិកត្រឡប់ចូលក្នុងកិច្ចព្រមព្រៀងនុយក្លេអ៊ែរអ៊ីរ៉ង់ដែលលោកត្រាំបានដកចេញ។
ប្រធានាធិបតីអ៊ីរ៉ង់លោកហាសាន រ៉ូហានីបានថ្លែងក្នុងថ្ងៃពុធ ទី១៦ ធ្នូថា លោកសប្បាយចិត្តខ្លាំងណាស់ចំពោះការចាកចេញពីសេតវិមានរបស់លោកត្រាំ ព្រមទាំងបានចាត់ទុកលោកត្រាំជាភេវរជន និងជនផ្តាច់ការ។ តែប្រមុខសាសនាអ៊ីស្លាមអ៊ីរ៉ង់លោកអាលី ខាមេណីបានបញ្ជាក់ថា អរិភាពរបស់សហរដ្ឋអាមេរិកចំពោះអ៊ីរ៉ង់នឹងមិនបញ្ចប់ដោយការចាកចេញរបស់ប្រធានាធិបតីផុតអាណត្តិលោកដូណាល់ ត្រាំទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ