មេរោគកូវីដ១៩ បំប្លែងខ្លួន៖អង្គការសុខភាពពិភពលោកអំពាវនាវឲ្យអឺរ៉ុបពង្រឹងវិធានការបន្ថែមទៀត
នៅថ្ងៃព្រហស្បតិ៍ ទី៧ មករា នាយកអង្គការសុខភាពពិភពលោកប្រចាំតំបន់អឺរ៉ុបលោកហាន គ្លូបានអំពាវនាវឲ្យអឺរ៉ុបពង្រឹងវិធានការឲ្យបានច្រើនជាងសព្វថ្ងៃដើម្បីប្រឈមទប់នឹងការឆ្លងរាលដាលនៃមេរោគកូវីដ១៩ បំប្លែងខ្លួន។ តាមលោកហាន គ្លូ តំបន់អឺរ៉ុបកំពុងប្រឈមនឹងសន្ទុះកំណើនឆ្លងនៃមេរោគកូវីដ១៩ បំប្លែងខ្លួន។ គួរបញ្ជាក់ថា មេរោគកូវីដ១៩ បំប្លែងខ្លួនដែលមានប្រភពចេញពីប្រទេសអង់គ្លេសជាវីរុសដែលឆ្លងខ្លាំងជាងវីរុសកូវីដ១៩ ធម្មតាទៅទៀត។ ក្រៅពីប្រទេសជាច្រើនក្នុងតំបន់អឺរ៉ុប មេរោគកូវីដ១៩ បំប្លែងខ្លួននេះក៏កំពុងឆ្លងចូលប្រទេសអាស៊ី និងអាមេរិកដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ការអំពាវនាវរបស់លោកហាន គ្លូបានធ្វើឡើងនៅក្នុងសន្និសីទកាសែតតាមអនឡាញដោយលោកបញ្ជាក់ថា វីរុសកូវីដ១៩ បំប្លែងខ្លួនអាចស្គាល់កំណើនឆ្លងកាន់តែលឿននៅក្នុងតំបន់អឺរ៉ុបដូចបានសង្កេតឃើញនៅក្នុងប្រទេសអង់គ្លេស និងកាន់តែច្រើននៅក្នុងប្រទេសដាណឺម៉ាក។ តាមនាយកអង្គការសុខភាពពិភពលោកប្រចាំតំបន់អឺរ៉ុបរូបនេះដដែល មាន ៥២ប្រទេសក្នុងតំបន់អឺរ៉ុបបូកនឹងប្រទេសរុស្ស៊ីកំពុងមានវិជ្ជមានវីរុសកូវីដ១៩ បំប្លែងខ្លួន។ ផ្អែកតាមអង្គការសុខភាពពិភពលោក ល្បឿននៃការឆ្លងខ្លាំងរបស់វីរុសកូវីដ១៩ បំប្លែងខ្លួនអាចបង្កឲ្យមានកំណើនករណីធ្ងន់ធ្ងរ និងធ្វើឲ្យប្រព័ន្ធសុខាភិបាលជួបការកកស្ទះ។
« ជាស្ថានការណ៍មួយបារម្ភក្រៃលែងដែលយើងត្រូវប្រឹងប្រែង និងពង្រឹងវិធានការសុខភាព សង្គមបន្ថែមទៀតដើម្បីកាត់បន្ថយការឆ្លងរាលដាល » នេះជាការបញ្ជាក់របស់លោកហាន គ្លូ។ វិធានការដែលលោកហាន គ្លូចង់ឲ្យប្រឹងប្រែង និងពង្រឹងទប់ទល់នឹងវីរុសកូវីដ១៩ បំប្លែងខ្លួន គឺដូចគ្នានឹងវិធានការទប់នឹងការឆ្លងរាលដាលនៃវីរុសកូវីដ១៩ ធម្មតា រួមមាន ពាក់ម៉ាសជាលក្ខណៈទូទៅ កម្រិតចំនួនការជួបជុំក្នុងសង្គម រក្សាគម្លាតសុវត្ថិភាព លាងដៃឲ្យបានញឹកញាប់ រួមទាំងបង្កើនការធ្វើតេស្តិ៍រកវីរុស និងធ្វើចត្តាឡីសកចំពោះអ្នកដែលមានវិជ្ជមានវីរុសកូវីដ១៩ ឬវីរុសកូវីដ១៩ បំប្លែងខ្លួន។
លោកហាន គ្លូបានរម្លឹកថា វីរុសកូវីដ១៩ បំប្លែងខ្លួននៅតែជាវីរុសកូវីដ១៩ ដោយគ្មានការផ្លាស់ប្តូរធម្មជាតិពិតនៃជំងឺទេ និងថា កូនក្មេងហាក់មិនសូវប្រឈមឡើយ។ ដោយឡែក អង្គការសុខភាពពិភពលោកផ្តល់អនុសាសន៍មិនឲ្យបិទសាលារៀនទេ តែក៏មិនជំទាស់នឹងការបិទដែរ បើការបិទនោះអាចចូលរួមជួយកាត់បន្ថយការឆ្លងរាលដាលនៃវីរុសកូវីដ១៩ ឬវីរុសកូវីដ១៩ បំប្លែងខ្លួន។ ទាក់ទងនឹងវ៉ាក់សាំងបង្ការកូវីដ១៩ ត្រូវបានគេសន្និដ្ឋានក្នុងជំហានដំបូងថា ក៏មានប្រសិទ្ធិភាពបង្ការនឹងវីរុសកូវីដ១៩ បំប្លែងខ្លួនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ